Биылдан бастап елімізде резервтік әскери қызмет түрі енгізіледі. Бұл ерікті түрде жүзеге асырылады. Оған 60 жасқа дейінгі офицерлер мен 50 жасқа дейінгі сержант және сарбаздар кіретін болады. Жаңа заң жобасын бүгін Мәжілістің жалпы отырысында депутат Ермұрат Бәпи таныстырды. Ондағы мақсат не? Толығырақ алдағы бейнесюжетте.
Қазір бүкіл әлем теңселіп тұр, оған қоса іргемізде соғыс жүріп жатыр. Сол себепті бұл мүмкін болатын әлдебір қауіпке, туып қалуы мүмкін қатерлерге елдік, мемлекеттік, ұлттық тұрғыда дайындығымыз деді заң жобасын таныстырған депутат Ермұрат Бәпи. Резервке кірген азаматтар алдымен денсаулығын тексеріп, тесттен өтеді, соңында Қорғаныс министрлігімен келісімшартқа отырады. Сондай-ақ, олар жылына екі рет әскери жиынға жиналады және жыл ішінде бірнеше әскери сабақтан өтеді. Негізгі мақсат – әскердің санын көбейтпей, бірақ дайын тұрған резервтегі әскерді жасақтау. Қазір алғашқы бригаданы жасақтау басталып та кетті. Шамамен 2000 адам дайын тұр.
ЕРМҰРАТ БӘПИ ҚР ПАРЛАМЕНТІ МӘЖІЛІСІНІҢ ДЕПУТАТЫ:
«Атап айтқанда, депутаттар түрлі ақшалай төлемдерді (әскери қызмет өткеру кезінде алған жарақаттары үшін өтемақы төлемдері, мүгедектігі бойынша мемлекеттік әлеуметтік жәрдемақы және т. б.), заттай және азық-түлікпен қамтамасыз етуге, әскери резервистке медициналық қызмет көрсетуге, жұмыс істейтін әскери резервистің еңбек қатынастарына қатысты нормаларды ұсынды. Сонымен қатар, әскери резервшілердің міндетті әлеуметтік медициналық сақтандырылуына аударымдар мен жарналарды реттейтін нормалар енгізді. Сондай-ақ, депутаттар әскери құқық бұзушылық субъектісі ретінде резервтегі әскери адамның қылмыстық жауаптылығына қатысты түзетулер енгізді».
Одан бөлек, бүгін Мәжіліс депутаттары ЛГБТ -ға деген қарсылықтарын Парламент мінберінен көтерді. Олар кеше сайланған АҚШ-тың жаңа Президентінің саясатын мысалға келтірді.
ЕДІЛ ЖАҢБЫРШИН ҚР ПАРЛАМЕНТІ МӘЖІЛІСІНІҢ ДЕПУТАТЫ:
«Бұл – ЛГБТ-ға, яғни табиғи жаратылысқа қарсы жынойнақ топтарға біз түгілі, енді АҚШ-та заңмен тыйым салынады деген сөз. Бұл жаңалық батысты өздеріне қорғаушы санап жүрген қызтекелерге төбелерінен жай түскендей болғаны анық. Осы тұста, барлық қызтекелерге "Дядя Дональдтан" жалынды сәлем! Азғындыққа апаратын жолмен күресу керегін айтады. Өйткені біз Мәжіліске келгелі бері ұлтымыздың болашағына балта шауып жүрген азғын жолмен күресіп келе жатырмыз. Мен білетін Үкіметке кемінде бірнеше нақты депутаттық сауал жолданды. Оған қоса, ЛГБТ-ны насихаттауға тыйым салуды көздейтін арнайы заң нормаларын да әзірледік. Алайда, осы әрекеттерімізге кейбір шенеуніктер батыс елдері өкілдерінің "демократияны шектеп жатырсыңдар", "адам құқығын таптап жатырсыңдар" деген ұстанымдарын желеу қылып, қарсылық білдірді».
Ал, депутат Мақсат Толықбай полиция саласын сынады. Ұрыларды ұстай алмай жүрген тәртіп сақшылары солармен сыбайлас па деген халық қалаулысы мыңдаған адамның үндеуін жеткізді.
МАҚСАТ ТОЛЫҚБАЕВ ҚР ПАРЛАМЕНТІ МӘЖІЛІСІНІҢ ДЕПУТАТЫ:
«Маған да ондаған адам хабарласты. Ішкі істер министрлігі мәлімдеме жасар деп бес күн күттік. Алайда ешқандай реакция жоқ. Катонқарағайға қарасты Шыңғыстайдың шырқын осы ұрылар бұзып бітірді. Алақандай ауыл халқына ұры-қарының қорлығы әбден өткен. Төзімдері таусылып, сенімдері сетінеген ел енді бар үміттерін ел басшылығына артып, яғни Президенттен көмек сұрап отыр. Өйткені қой қоралап, ірі-қара табындап, жылқысы үйір-үйірімен жоғалып жатқан соң қайтсін?! Полиция дегеннен әбден күдер үзген. Осы күнге дейін қаншама малы қолды болып, ұрланса да, полиция ізін таппаған. Бұл нені көрсетеді?! Не іздеуге құлықсыз немесе ұры мен полиция ауыз жаласып, ымыралысып, ынтымақта жұмыс істейді. Ақиқаты осы. Басқаша айту мүмкін емес!».
Айта кетсек, резервтегі әскери қызметші туралы заң жобасы былтыр қарашада бірінші оқылымда мақұлданған. Резервте тіркелген әскери қызметкер міндет бойынша, соғыс бола қалған жағдайда әскери комитеттерге бармай, дабыл қағылған кезде өзінің бригадасына тікелей барып қосылуы тиіс.
