Бүгін Абай атындағы Қазақ ұлттық педагогикалық университетіне Қазақстан Республикасының Оқу-ағарту министрі Ғани Бейсембаев арнайы келіп, университеттің профессор-оқытушылар құрамы және студенттермен кездесу өткізді. 

Сапар аясында ведомство басшысы сапалы мамандар даярлау, білім беру бағдарламаларын жетілдіру және үздіксіз педагогикалық білім беру жүйесін дамыту мәселелері және осы бағытта жүргізіліп жатқан жұмыстар туралы баяндады.

Сонымен қатар, министр Ғани Бейсембаев: «Білім басқармаларымен ақылдаса отырып, Абай университетінің барлық шәкірттерін, бірінде қалдырмай мұғалімдік қызметке тағайындау қазірден бастап қолға алынады. Осы арқылы болашақ педагогтың төртінші курсынан емес, бірінші курсынан-ақ қай мектепте және қанша сағатпен жұмыс істейтіндігі анықталады», - деді кездесу барысында.

Сондай-ақ, «Алты алаштың баласы бас қосса, төрдегі орын – мұғалімдікі» деген Мағжан Жұмабайұлының аталы сөзін мысалға келтірген министр,  қоғамның басты кейіпкері - ұстаз болуы керектігін атап өтті.  

Ал кездесу соңында Ғани Бейсембаев университетіміздің қабырғасынан түлеп ұшқан түлек екенін айта келе, Қазақстандағы тұңғыш жоғары оқу орнының ғылым мен білім берудегі әлеуетін жоғары бағалап, еліміз үшін жоғары білікті кадрлар даярлап жатқан педагогтарға алғысын білдірді.