"
Кардиология және ішкі аурулар ҒЗИ-да екінші жүрек трансплантациясы сәтті жасалды. 6 сағатқа созылған күрделі операция University Medical Center-пен бірлесіп белгілі кардиохирург Юрий Пяның жетекшілігімен жасалған.
43 жастағы алматылық тұрғынның жүрегі сәтті ауыстырылды. Жүрек доноры 45 жастағы Алматы облысының тұрғыны болған. Дәрігерлер ми өлімін анықтағаннан кейін, туыстары қайтыс болған азаматтың органдарын алуға келісімдерін берген.
МАРАТ ПАШИМОВ КАРДИОЛОГИЯ ЖӘНЕ ІШКІ АУРУЛАР ҒЗИ БАСҚАРМА ТӨРАҒАСЫ «Біздің науқас 43 жаста 20-шы қаңтарда жүрек трансплантациясы жасалды. Науқастың жағдайы тұрақты, жан сақтау бөлімнен кардиохирургия бөлімшесіне ауыстырылды. Науқастың жағдайы бір қалыпты. Ота 6 сағат жасалды. Біз Денсаулық сақтау министрлігіне, екіншіден Ұлттық ғылыми кардиохирургия орталығына, үшіншіден донордың туыстарына ерекше алғыс білдіргіміз келеді. Қазақстанда жүрек трансплантациясын күту парағында 140 ересек адам тұр. Осындай операцияларды жасау керек. Науқастар осындай жүректі күтіп отыр».
РҮСТЕМ ТӨЛЕУТАЕВ ИНСТИТУТТЫҢ КАРДИОХИРУРГИЯ БӨЛІМШЕСІНІҢ МЕҢГЕРУШІСІ «Донор жайлы ең бірінші сигнал жексенбі күні келді. Біз оны тексеріп шынымен де сәйкес келетін науқасты шақырдық. Сәйкестігін тексеріп ота жасалды. Жаңа жүректің ұзақ жұмысына, науқастың өмір-салты өзгеру керек. Оған қосымша өз тарапымыздан дәрілер береміз. Көптеген дәрілер. Жыл сайын дәрілердің қатары азаяды. Бірақ науқас өмір бойы дәрі ішеді. Сонда науқас ұзақ өмір сүреді.»
Науқас 5 жыл бойы энергетикалық сусындарды шамадан тыс тұтынуы дәрі-дәрмек терапиясын қабылдамайтын жүрек қызметі жеткіліксіздігінің соңғы сатысына әкелген. Науқасты аздаған физикалық жүктемеде ауа жетіспеуі, 50 метр жүру кезінде ентігу, қалыпты жағдайда, жатқан кезде ентігудің жоғарылауы, тез шаршау және жалпы әлсіздік мазалаған. Жағдайының нашарлауы 2023 жылдың желтоқсанынан бастап байқала бастаған.
ДӘУРЕН АТАМБЕКОВ НАУҚАС «Мені осы халге түсірген энергетик сусындар. Жұмыс көп істеймін деп энергетик сусындарды көп ішетін едім. Жастарға айтарым, қара су ішсе де энергетик ішпеңдер. Бала-шағаны асыраймын деп, күніне 4-5 бөтелке энергетик ішкен едім. Жастарға айтарым, бала-шағаны энргетик сусынсыз қастарыңда болыңдар.»
Елімізде 2025 жылғы 10 қаңтарда жүрек трансплантациясын күту парағында 140 ересек адам және 5 бала тұр. Айта кету керек, донордан екі бүйрек, өкпе, сонымен қатар көз қабығы алынды.
