НОВОСТИ
- Информация о материале
- Категория: Жаңалықтар
Елімізде жазасын өтеушілердің мерзімін енді шартты түрге ауыстыру арқылы қысқартуға мүмкіндік берілмек. Бүгін сенатта дәл осы жаңа бап қолдау тапты, деп хабарлайды Алатау телеарнасы.
Сенат Қылмыстық кодекске бас бостандығынан айыру мерзімін шартты түрде қысқартуға қатысты жаңа бап енгізуді қолдады. Яғни, жазасын өтеп жатқан адам соңғы бір жыл ішінде тәртіптік жаза алмаған болса, жазаның қалған мерзімі бір айға шартты түрде қысқартылуы мүмкін.
Сенатор Марат Қожаев айтуынша, Қылмыстық кодекске жаңа 73-1 бап енгізіліп отыр. Ол бас бостандығынан айыру мерзімін шартты түрде қысқарту тәртібін қарастырады.
"Осы бапқа сәйкес, жазасын өтеп жатқан адам соңғы бір жыл ішінде тәртіптік жаза алмаған болса, сот шешімімен жазаның қалған мерзімі бір айға шартты түрде қысқартылуы мүмкін", – деді Қожаев Сенаттың бүгінгі отырысында.
Айта кетері, сенат бүгін тиісті заңды бірден екі оқылымда мақұлдап, президенттің қол қоюына жібереді.
- Информация о материале
- Категория: Жаңалықтар
Елімізде балалар саны нақтыланды. Ұлттық статистика бюросының дерегіне сүйенсек, бүгінде Қазақстанда балалар халықтың жалпы санының 33,6%-ын құрайды екен, деп хабарлайды Алатау телеарнасы.
Балалардың 62,3%-ы қалалық жерде, ал 37,7%-ы ауылдық жерде тұрады. Ұлттық статистика бюросы 1 маусым - Халықаралық балаларды қорғау күніне орай елдегі балалардың санына қатысты дерекпен бөлісті.
"2026 жылдың басындағы жағдай бойынша Қазақстанда 0-17 жас аралығындағы 6,9 миллион бала тұрады, бұл республика халқының жалпы санының 33,6% құрайды", - деп жазылған хабарламада.
Жалпы соңғы 5 жылда балалар саны 4,4%-ға артты, дейді статистика мамандары.
- Информация о материале
- Категория: Жаңалықтар
Биыл жоғары оқу орындары арасында барлығы 89 457 мемлекеттік грант таратылады. Ғылым және жоғары білім министрі Саясат Нұрбек биыл білім беру гранттары қай мамандықтарға көп бөлінетінін айтты, деп хабарлайды Алатау телеарнасы.
Спутниктің жазуынша, қазіргі кезде мемлекеттік тапсырыс ел экономикасының 2030 жылға дейінгі кадрларға деген қажеттілік болжамы бойынша үйлестіріледі. Оған сәйкес, Қазақстанға 883 мыңнан астам маман қажет болады. Соның ішінде инженерлік кадрлар (530 мың), педагогтар (185 мың) және өзге салалардың мамандары (168 мың) бар.
"Сондықтан гранттарды бөлуде инженерлік, IT, аграрлық, педагогикалық және жаратылыстану бағыттарына басымдық берілді. Гранттардың 60 проценті инженерлік-техникалық, ИТ және ауыл шаруашылығы мамандықтарына бағытталды", - деді Нұрбек үкіметтің бүгінгі отырысында.
Ал гранттардың 21 проценті педагогикалық кадрларды даярлауға бөлініп отыр.
Айта кетері, биыл жоғары оқу орындары арасында барлығы 89 457 мемлекеттік грант ( бакалавриат - 75 371 грант, магистратура - 11 007 грант, докторантура -3 079 грант) таратылады.
- Информация о материале
- Категория: Жаңалықтар
20 мамырда Еуразиялық экономикалық комиссияның (ЕЭК) кеңесі спортшыларға арналған тағам өнімдерін сәйкестендіру құралдары арқылы міндетті түрде таңбалау туралы шешім қабылдады, деп хабарлайды Алатау телеарнасы.
Спутниктің жазуынша, құжатқа сәйкес, Еуразиялық экономикалық одаққа (ЕАЭО) мүше мемлекеттер спорттық тағамдарға таңбалауды өз аумағында қашан енгізетінін және оның нақты тәртібін өздері белгілейді. Бірақ бұл туралы олар ЕЭК-ке алдын ала, кемінде алты ай бұрын хабарлауға тиіс.
Таңбалау барлық ел үшін ортақ бірыңғай ереже бойынша жүргізіледі. Бұл ЕАЭО аясында тауарларды таңбалау жүйесінің 2019 жылы бекітілген базалық технологиялық моделіне сәйкес жүзеге асады.
Осының нәтижесінде бір елде берілген таңбалау коды одаққа мүше басқа елдерде де жарамды болады. Яғни тауар одақ ішінде тасымалданғанда оны қайтадан таңбалау қажет болмайды.
- Информация о материале
- Категория: Жаңалықтар
Қазақстанда 2025-2026 оқу жылын 3,9 миллионнан астам оқушы аяқтайды. Оның ішінде екі жүз он бес мыңнан астамы – 11-сынып түлектері, деп хабарлайды Алатау телеарнасы.
Оқу-ағарту министрлігі дерегіне сүйенсек, оқу жылының аяқталуына орай 25 мамыр күні барлық мектепте "Білімім – Отаныма!" тақырыбында бірыңғай сынып сағаты өткізіледі. Оқушыларға жазғы каникул кезінде оқуға ұсынылатын әдебиеттер тізімі таныстырылады.
"Оқу жылының қорытындысы бойынша 9-сыныпты үздік аяқтауға 31 мыңнан астам, ал 11-сыныпты үздік аяқтауға 18 мың оқушы үміткер болып отыр. Бүгінде еліміздің білім беру ұйымдарында 420 мыңнан астам педагог еңбек етіп жүр. Оқу-ағарту министрлігі мен жергілікті атқарушы органдардың бірлескен бұйрығы мен қаулысына сәйкес мектепке дейінгі, орта, техникалық және кәсіптік, орта білімнен кейінгі білім беру ұйымдарында салтанатты іс-шараларды мейрамханаларда, кафелерде, банкет залдарында, демалыс базаларында және табиғат аясында өткізуге тыйым салынады", - деп ескертті министрлік.
Ата-аналардан, заңды өкілдерден және білім алушылардан салтанатты іс-шараларға байланысты ақша жинауға, сыйлықтар мен өзге де материалдық құндылықтар талап етуге жол берілмейді. Ал аттестаттар мен дипломдарды салтанатты табыстау рәсімдері тек білім беру ұйымдарының қабырғасында ұйымдастырылады.
- Информация о материале
- Категория: Жаңалықтар
Адами капиталды дамыту, қоғамның зияткерлік және мәдени әлеуетін нығайту, білім беру, тәрбиелеу және оқу-ағарту ісінің негізгі элементі ретінде кітап оқу мәдениетін насихаттау, зерделі ұлт қалыптастыру, сондай-ақ шығармашыл, жасампаз және бәсекеге қабілетті тұлғаны дамыту үшін жағдай жасау мақсатында ҚАУЛЫ ЕТЕМІН:
1. Мыналар мәдениет, білім беру және инновациялар салаларындағы мемлекеттік саясаттың басым бағыттары болып айқындалсын:
кітап оқу мәдениетін дамыту және зерделі ұлт қалыптастыру;
оқырмандарға арналған заманауи инфрақұрылымды дамыту: цифрлық құралдарды кеңінен қолдана отырып, жаңа форматтағы кітапханалар, қоғамдық кеңістіктер құру;
туындылары жас ұрпақты Қазақстан Республикасы Конституциясының негізгі қағидаттары мен ережелерін құрметтеу рухында тәрбиелеуге ықпал етіп жүрген отандық жазушылар мен ақындарды қолдау;
баспагерлер мен кітап өнімін таратушылардың мемлекет үшін пайдалы қызметтерін ынталандыру;
ұлттық әдеби мұраны ел ішінде және шетелде насихаттау.
Толығырақ мына сілтемеде: www.akorda.kz
