Жедел жәрдем көліктері қайта ашылған Рафах өткелі арқылы жүздеген адамды Газадан Мысырға жеткізді. Катар аралығымен Египет, Израиль және Хамас арасындағы келісімге сәйкес, бірқатар шетелдіктер мен ауыр жараланған палестиналықтардың анклавтан шығуына рұқсат етілді.

Египет Синай түбегінде далалық ауруханалар дайындады. Ақпарат көздерінің мәліметінше, бақылау-өткізу бекетінен 500-ге жуық шетелдік өткен. Алайда, 7 қазанда содырлар тұтқынға алған 240 израильдіктің ешқайсысы олардың арасында болмаған. Газа тұрғындарына гуманитарлық жүк тиеген жүк көліктері де бақылау бекетінен өтуін жалғастыруда. Өткелдің қанша уақытқа дейін ашық болатыны әзірге белгісіз. Бұған дейін Израиль премьер-министрі көптеген елдер шақырған әскери операцияда «гуманитарлық үзіліс» жасаудан бас тартты. Газаның денсаулық сақтау министрлігінің мәліметінше, Израильдің әуе шабуылынан 8700-ден астам палестиналық қаза тапқан.

Азық-түлік, жанар-жағармай, ауыз су, дәрі-дәрмек тапшы, ауруханалар жаралыларды өз беттерінше  емдеуге тырысуда. Осы уақытта Израиль Қорғаныс министрі Йоав Галлант Газа секторы шекарасы маңындағы әскерлерді аралады. Оның айтуынша, Цахалдың анклав ішіндегі жерүсті операциясы сәтті жалғасуда. Армия туннельдерден лабиринт салған Хамас содырларымен соғысуда. Израиль үкіметінің мәліметінше, 7 қазандағы шабуылда шамамен 1100 израильдік бейбіт тұрғын мен 300 әскери қызметкер қаза тапқан. Содырлар тағы 240 адамды тұтқындап, Газа секторына алып кетті. Арнайы операцияның бір мақсаты – оларды босату.