ЖАҢАЛЫҚТАР

Қасым-Жомарт Тоқаев Тәжікстан Президентіне құттықтау жеделхатын жолдады, деп хабарлайды Алатау телеарнасы Ақордаға сілтеме жасап.

Мемлекет басшысы Қасым-Жомарт Тоқаев Президент Эмомали Рахмонды және тәжік халқын ұлттық мерекесі – Тәуелсіздік күнімен құттықтады.

"Қазақстан мен Тәжікстан арасындағы жоғары қарқынмен дамып келе жатқан ынтымақтастық жаңа мән-мазмұнға ие болды және байланыстарымыз стратегиялық серіктестік пен одақтастық деңгейіне толық сай келеді", – деп жазылған жеделхатта.

Президент бірлескен күш-жігердің нәтижесінде Қазақстан мен Тәжікстанның көпжақты қарым-қатынасы алдағы уақытта екі елдің игілігі мен мүддесі үшін нығая беретініне сенім білдірді.

Сондай-ақ Қасым-Жомарт Тоқаев Эмомали Рахмонның жауапты мемлекеттік қызметіне табыс, ал бауырлас Тәжікстан халқына бақ-береке тіледі.

Алматыдағы ақылы автотұрақтар қайта іске қосылады. Алдымен Медеу ауданы, осылайша жыл соңына дейін өзге нүктелердегі тұрақтар толықтай жұмысын жалғастырмақ, деп хабарлайды Алатау телеарнасы.

Қаладағы ақылы автотұрақтар 11-ші қыркүйектен бастап іске қосылады. Алдымен Медеу ауданы қамтылмақ. Мұнан кейін өзге аудандардағы тратуар түріндегі тұрақтар өз жұмысын бастайды.

Автотұрақтар 2023 жылғы 15 шілдеден 2023 жылғы 11 қыркүйекке дейін тегін болды. Өйткені ақылы автотұрақтың жаңа бірыңғай операторы "Алматы паркинг" бағдарламасы қосылмаған еді. Осылайша Медеу ауданында жаңартылған ақпараттық тақтайшалар бойынша барлығы 12 тұрақ аймағы жұмыс істейді. Оның 4828 тротуар тұрағы, 360 мүгедектерге арналған орын. Ақылы автотұрақтың жұмыс режимі - күн сайын сағат 08:00-ден 19:00-ге дейін. Бір сағаттың құны – 100 теңге.

Тек "Көк базар" маңындағы №6547 тұрақ аймағының тарифі - сағатына 150 теңге болмақ.

Алматы қалалық мобилділік басқармасы дерегіне сүйенсек, жаңа ақпараттық тақталарда оператор, аймақ нөмірі, тұрақ уақыты және төлем әдістері көрсетіледі.

Жалпы жыл аяғына дейін қаланың қалған аудандарын қосу жоспарланып отыр. Яғни:
Алмалы - 9 қазан,
Бостандық - 23 қазан,
Түрксіб және Жетісу - 6 қараша,
Әуезов, Алатау, Наурызбай аудандары - 2023 жылғы 25 желтоқсанға дейін.

Автотұрақтарға қызмет көрсету бойынша барлық өкілеттік Алматы әкімдігіне, Алматы қалалық мобилділік басқармасының "Алматы паркинг" шаруашылық жүргізу құқығындағы коммуналдық мемлекеттік кәсіпорнына берілді.

Мемлекет басшысы Қасым-Жомарт Тоқаев “Қазақтелеком” АҚ басқарма төрағасы Қуанышбек Есекеевті қабылдады, деп хабарлайды Алатау телеарнасы. 

Бұл туралы Ақорда жазды. Онда Қуаныш Есекеевтің Президентке “Қазақтелеком” компаниялар тобының биылғы бірінші жартыжылдықта атқарған қызметінің негізгі қаржы-шаруашылық көрсеткіштері туралы есеп бергені жазылған. 

Яғни еліміздің телекоммуникация саласындағы ірі операторының былтырғы осы кезеңмен салыстырғандағы табысы 10 пайызға, ал таза пайдасы 16 пайызға өскен. Сондай-ақ 5G желісін құру – “Қазақтелеком” үшін басымдықтардың бірі саналады. Бұл бастама аясында 2027 жылға қарай бүкіл ел бойынша 7 мыңнан астам базалық станция салынуға тиіс көрінеді. 

Компания басшысы осы жылдың соңына дейін бесінші буын желісінің 782 базалық станциясын салу жоспарланып отырғанына тоқталып, Әзербайжанмен бірлескен жоба аясында Каспий теңізінің табаны арқылы талшықты-оптикалық желі салу жөніндегі тапсырмасының орындалу барысы туралы баяндады. Әрі “Қолжетімді интернет” ұлттық жобасы аясында компания 1200-ге жуық ауылды оптикалық технологиялар арқылы интернет желісіне қосуды және республикалық автожолдарды LTE технологиясы бойынша сапалы интернетпен қамтамасыз етуді көздеп отыр.

“Қазақтелекомға” байланыс сапасына қатысты проблемаларды шешу және Қазақстан қалаларындағы кең жолақты интернет желісімен қамтылмаған аймақтардың мәселесін тезірек ретке келтіру міндеті жүктелді. 

Қасым-Жомарт Тоқаев ауылдық жерлердегі халықтың қала тұрғындары сияқты заманауи цифрлық қызметтер мен өнімдерге қол жеткізуге тиіс екенін атап өтті. Осыған байланысты компанияға тиісті инфрақұрылым құрылысының қарқынын арттыру тапсырылды.

Черногорияның Брезна өңірінде жалқаулықтан жарыс өтіп жатыр. Қазірдің өзінде 7 адам рекорд орнатқан, деп хабарлайды Алатау телеарнасы CNN-ге сілтеме жасап. 

Черногорияның ең жалқау адамы атағы үшін ұйымдастырылған жарыстың бүгін 20-шы күні. Жүлдеге тігілген қомақты қаржы үшін 7 адам жерге төселген көрпеден әлі тұрмаған. 

Тіпті олар жалқаулық рекордын жаңартты деп жазады агенттік. Яғни 463 сағат қимылсыз жатыр. Өткен жылы жеңімпаз 117 сағатта жүлдені алған еді. 

"Жағдайымыз жақсы. Денсаулыққа шағым жоқ. Біздің басты міндетіміз орнымыздан тұрмай жата беру", - дейді 38 жастағы қатысушылардың бірі. 

Жалқаулық сайысы Черногорияда дәстүрге айналған. Себебі Еуропада аталмыш елдің халқына деген көзқарас дәл осылай қалыптасқан. Содан да болар елде биыл 12 жыл қатарынан өткізілуде. 

Жарыстың ерекшелігі қомақты жүлдесінде. Яғни жеңімпаз 1000 евро алады. Бұл Қазақстан теңгесімен шамамен 500 мың теңге. 

Әзірге жарыстың тағы қанша күнге созылатыны белгісіз.

Елімізде биыл әскери борышын өтеуге шақырылған 5 мыңнан аса сарбаздың несиесін төлеу мерзімі тоқтатылған. Бұл шамамен 1,4 миллиард теңге, деп хабарлайды Алатау телеарнасы. 

Бұл туралы Орталық коммуникациялар қызметінде өткен брифингте ҚР Қарулы күштері Бас штабы ұйымдастыру-жұмылдыру жұмыстары департаментінің бастығы Бауыржан Артықов айтты. 

“Мерзімді әскери қызметтің беделі мен тартымдылығын арттыру бойынша жұмыс жүргізілуде. Бүгінгі таңда мерзімді қызметтегі әскери қызметшілерге кредиттік демалыстар ұсыну бойынша іс-шаралар іске асырылуда. Атап айтқанда, 2022-2023 жылдары 3,2 млрд теңге көлемінде 20 300 кредиті бар сарбаз анықталды. Бүгінгі таңда 8 800 қарыз бен микрокредит бойынша 5 мыңнан астам әскери қызметшінің 1,4 млрд теңге мөлшеріндегі төлемдері кейінге қалдырылды", - деді Бауыржан Артықов. 

Сонымен қатар ол биылғы күзгі әскерге шақыру кезеңінде 19 мыңнан аса азаматтың борышын өтеуге шақырылатынына да тоқталды. 

Сондай-ақ Қорғаныс министрлігі әскерден босату бойынша көмек ұсынатын, ол үшін ақы сұрайтын жандардан сақ болуға кеңес береді.

Ұлттық қауіпсіздік комитеті лаңкестік топтың жолын кесті. Олар Түркістандағы Қожа Ахмет Ясауи кесенесін қолдан жасалған жарылғыш құрылғымен жармақ болған, - деп хабарлайды Алатау телеарнасы ҚазАқпаратқа сілтеме жасап.  

Бұл туралы Ұлттық қауіпсіздік комитеті төрағасының орынбасары Руслан Сейсембаев Астанада өтіп жатқан ШЫҰ отырысында айтты. 

“Жыл сайын кем дегенде 2 террористік шабуылдың алды алынады. Мысалы, биыл ғана дайындықтың ерте кезеңінде Түркістандағы Қожа Ахмет Ясауи кесенесін қолдан жасалған жарылғыш құрылғымен жарудың жолы кесілді. Сондай-ақ, Астанада адамдар жаппай жиналған жерлерде қарулы шабуыл жасау әрекеттері тоқтатылды. Бізге келіп түскен ақпарат “ШЫҰ-ға мүше мемлекеттер үшін террористік қатерлердің қалыптасуы бірқатар үстем фактордың әсерінен болады” деген қорытынды жасауға мүмкіндік береді”, - деді Руслан Сейсембаев. 

Бүгін бас қалада Қазақстанның төрағалығымен Шанхай ынтымақтастық ұйымының (ШЫҰ) өңірлік терроризмге қарсы құрылым РАТС кеңесінің 40-отырысы өтіп жатыр.