ЖАҢАЛЫҚТАР

Алматы халықаралық әуежайында туристермен тоғыз тілде сәлемдеседі. Бұл туралы қала әкімдігінің баспасөз қызметі жазды, деп хабарлайды Алатау телеарнасы. 

Алматы қаласының туризм басқармасы Алматы халықаралық әуежайымен және ҚР ҰҚК Шекара қызметімен бірлесіп, қаладағы туристік тәжірибені жақсарту аясында әзірленіп, жаңартылған ұшу аймағын таныстырды. Паспорттық бақылау аймағындағы кабиналар әлемнің тоғыз тілінде: қазақ, орыс, ағылшын, араб, қытай, француз, итальян, түрік және кәріс тілінде амандасатындай жабдықталған.

“Сәлемдесу” дәстүрінің тамыры тереңде. Ол адамзат қоғамының қалыптасуының басты белгісінің бірі. База ретінде қала мен аймақтың ең танымал әрі әдемі туристік орындары таңдалды. Паспорттық бақылау аймағын жаңарту әр қонаққа Қазақстанның қонақжайлығын сезініп қана қоймай, біздің қала туралы туристік тәжірибені (visitor experience) жақсартады”, - дейді Алматы қаласының туризм басқармасы.

Туризмді дамыту тұжырымдамасы аясында қалада бірыңғай коммуникация мен навигацияны енгізу бойынша жұмысты жалғастыру жоспарланған. Қазіргі таңда қала қиылыстарында 52 ақпарат жаңартылды. Картадан қоса олар танымал туристік орындарға бағыттарды ұсынады.

Мәжіліс Төрағасы Ерлан Қошанов Парламент Палаталарының бірлескен отырысын шақыру туралы Өкімге қол қойды, деп хабарлайды Алатау телеарнасы. 

Бұл туралы Мәжілістің баспасөз қызметі жазды. Онда Сенат пен Мәжілістің бірлескен отырысы елорда уақытымен 11.00-ге белгіленгені хабарланған. 

"Қазақстан Республикасы Конституциясының 58-бабы 4-тармағының 2) тармақшасына сәйкес Қазақстан Республикасы Парламенті Палаталарының бірлескен отырысы 2023 жылғы 1 қыркүйекте сағат 11.00-де Астана қаласында шақырылсын", – деп жазылған Өкім мәтінінде.

Шымкентте 37 жастағы келіншек үшем босанды. Дәрігерлер балалардың денсаулығы жақсы екенін айтуда, деп хабарлайды Алатау телеарнасы Оtyrar.kz-ке сілтеме жасап. 

Шымкенттегі өмірге келген үшемнің салмақтары екі келіден жоғары. 37 жастағы анасы Арайлым Сарсенбековаға дәрігерлер 8-тамыз күні кесір тілігін жасап, босандырып алған.

Қуаныштысы сол, сәбилердің денсаулығында ақау жоқ дейді дәрігерлер. Анасымен бірге үшем нәрестелерді күту бөлімшесінде екі аптаға жуық медициналық бақылауда болған.Қазіргі уақытта босанған әйелдің және 3 сәбидің жағдайы жақсы. 

Сарсенбековтер әулетінде дүниеге келген үш бөбекке туыстары Амина, Хадиша, Мұхамммед деп есім қойған. Жас ана мен үшемдер Перинаталдық орталықтан бүгін үйлеріне шығарылды.

Мемлекет басшысы Қасым-Жомарт Тоқаев Эмомали Рахмонмен елордадағы Бас мешітке барды, деп хабарлайды Алатау телеарнасы. 

Бұл туралы Ақорда жазды. 

Қазақстанның бас мүфтиі Наурызбай қажы Тағанұлы Құран сүрелерін оқып, екі елдің халқына бейбітшілік пен бақ-береке тіледі. Мемлекеттер басшылары Орталық Азиядағы ең үлкен мешіттің сәулетімен танысты, - делінген ақпаратта. 

Айта кетейік, Тәжікстан Президенті Эмомали Рахмон елімізге жұмыс сапарымен күні кеше келген еді. Құрметті қонақты елорда әуежайында Мемлекет басшысы Қасым-Жомарт Тоқаев қарсы алды.

Қазақстанның мемлекеттік бюджеті 11,38 триллион теңгені құрады. Өткен жылдың сәйкес кезеңімен салыстырғанда 14,8 пайызға артқан, деп хабарлайды Алатау телеарнасы.  

Ұлттық экономика министрлігі дерегіне сүйенсек, ең үлкен үлесті салық және трансферттер түсімдері құрайды. Бұл ретте салық түсімдері дәстүрлі түрде мемлекеттік бюджетті қалыптастырудың негізгі көзі болып қала береді. Яғни, 2023 жылғы 1-жартыжылдықта барлық кірістердің 78,9 пайызын (8,98 трлн теңге) құрайды. 

Трансферттер түсімдері мемлекеттік бюджеттің кіріс бөлігінің төрттен бір бөлігін құрайды. Ол 2023 жылғы 1-жартыжылдықта 18, пайызға тең.

Осылайша, талданып отырған кезеңде Ұлттық қордан трансферттер 2,14 трлн теңгені құрады, оның ішінде кепілдендірілген трансферттер – 1,20 трлн теңге, нысаналы трансферттер – 0,94 трлн теңге. Салықтық емес түсімдер және негізгі капиталды сатудан түсетін түсімдер мемлекеттік бюджеттің кіріс бөлігіндегі ең аз үлесті алады: 2023 жылғы 1-жартыжылдықта тиісінше 1,7 пайыз (0,20 трлн теңге) және 0,6 пайыз (0,07 трлн теңге).

Елімізде жаңа оқу жылы 25 мамырда аяқталатын болды. Бұл шешімді тамыз конференциясында Премьер-Министрінің орынбасары – Еңбек және халықты әлеуметтік қорғау министрі Тамара Дүйсенова айтты, деп хабарлайды Алатау телеарнасы.  

Елордада білім беру қызметкерлерінің республикалық тамыз кеңесінің пленарлық отырысы өтті. Оған Премьер-Министрінің орынбасары – Еңбек және халықты әлеуметтік қорғау министрі Тамара Дүйсенова да қатысқан. Шара барысында вице-министр биылғы жаңа оқу жылының 25 мамырда аяқталатынын мәлімдеді. 

"Жаңашылдық енгізген кезде барынша тыңғылықты дайындық қажет. Министрліктің шешімі дұрыс, бірақ асығыс қабылданған деп санаймын. Осыған байланысты биылғы оқу жылын 25 мамырда аяқтау арқылы 34 апталық оқу жылына қайтару дұрыс болады", - деді Тамар Дүйсенова. 

Осылайша мектеп оқушылары 31 мамырда емес, жаңа оқу жылын 25-і күні аяқтайды. 

Өз кезегінде оқу-ағарту министрі Ғани Бейсембаев бүгінде Ұлттық платформа негізінде мұғалімдерді аттестациялау процесі автоматтандырылып жатқанын, сонымен қатар педагогика мен оқыту әдістемесі бойынша тестілеу алынып тасталғанын атап өтті.

Айта кетейік, биыл республикалық тамыз кеңесі жаңа форматта жүргізілді. 20 аймақтың барлығы тақырыптық бағыттарға бөлінді. Бірінші күні 12 мыңнан астам педагог-тәжірибешілер, сарапшылар, білім беру және психология саласындағы мамандар мектепке дейінгі, орта, техникалық және кәсіптік, қосымша, инклюзивті білім берудің, балалардың құқықтарын қорғаудың және білім беру сапасын қамтамасыз етудің ең өзекті мәселелерін талқылады.