ЖАҢАЛЫҚТАР

Қостанай облысында көбік кешінде тоқ соққан 9 жастағы қыз көз жұмды, деп хабарлайды Алатау телеарнасы.

Оқиға 25 тамыз күні Қостанай облысындағы Ұзынкөл кентінде тіркелді. Жастар күніне арналған іс-шарада 9 жасар қызды тоқ соққан болатын. Анықталғандай ол 12 қыркүйек күні таңертең көз жұмды. Жасөспірім ауруханаға ес-түссіз күйде ауыр жағдайда түсіп еді. Қыздың қайтыс болғанын Қостанай облыстық балалар ауруханасының бас дәрігері Нұрлан Ержанов растады.

"Дәрігерлеріміз бар күшін салды. Өкінішке орай ем-дом нәтиже бермеді. Жасөспірім қыздың жүрегі тоқтады. Әзірге толық ақпарат бере алмаймыз. Біз тек 9 жастағы қыздың көз жұмғанын растауға жиналып отырмыз", - деді Нұрлан Ержанов.

Мемлекет басшысы шахматтан Қазақстанның әйелдер құрамасын Польшада өткен командалық әлем чемпионатында күміс медальға ие болуымен құттықтады, деп хабарлайды Алатау телеарнасы. 

Президент құттықтауын Іnstagram-дағы парақшасында жазды. Онда мемлекет адамның ой-өрісін жетілдіретін бекзат өнерді дамытуға барынша қолдау көрсете беретініне тоқталған. 

“Шахматтан Қазақстан құрамасын әйелдер арасындағы командалық әлем чемпионатында тұңғыш рет күміс медальға ие болуымен құттықтаймын! Бұл – еліміздің шахмат тарихындағы айтулы оқиға. Байрақты бәсекеде қыздарымыз асқан шеберліктің және жеңіске деген шексіз ерік-жігердің озық үлгісін көрсетті. Сіздердің тамаша жетістіктеріңіз шахмат спортын жан-жақты дәріптеп, өскелең ұрпақтың оған деген қызығушылығын арттыра түсетіні анық. Мемлекет адамның ой-өрісін жетілдіретін бекзат өнерді дамытуға барынша қолдау көрсете береді.  Еліміздегі кәсіби және әуесқой шахматшыларға тек жарқын жеңістер тілеймін! – деп жазды Президент. 

Айта кетейік, шахматтан 2023 жылғы командалық әлем чемпионаты Польшаның Быдгощ қаласында өтті. Онда 12 команда бақ сынады. Турнир 2007 жылдан бері ұйымдастырылып келеді. Бірақ Қазақстан бұған дейін ширек финалдан әрі асып көрген емес.

Биылғы Ұлттық құрама сапында Бибісара Асаубаева, Ксения Балабаева, Әсел Серікбай, Меруерт Камалиденова, Алуа Нұрманова және Әмина Қайырбековалар өнер көрсетті.

Финалда қазақстандық шахматшылар Грузия құрамасына жол берді.

Сыртқы істер министрлігі Мароккодағы зілзаладан зардап шеккен жерлестеріміз жоқ екенін мәлімдеді, деп хабарлайды Алатау телеарнасы.

Сыртқы істер министрлігінің ресми өкілі Айбек Смадияров ведомствода өткен брифингте Мароккода ел азаматтары тұратынын айтты. Сөзінше олардың бәрі де дін аман. 

“Мароккода Елшілігіміз бар. Елшілік қызметкерлері мен басқа да қазақстандықтарды қосқанда 30-дан астам азаматымыз тұрады. Барлығы аман-есен. Ешкім зардап шеккен жоқ. Бәрімен байланысып отырмыз. Зардап шеккендер мен қаза тапқандардың арасында Қазақстан азаматы жоқ”, - деді Айбек Смадияров. 

Айта кетейік, 8 қыркүйек Мароккода 6,9 балл болатын жер сілкінісі тіркелді. Салдарынан көптеген ғимарат қирап, адамдар зардап шекті. Соңғы дерекке сүйенсек, зілзаладан қайтыс болғандар қатары 3 мыңға жуықтаған. 

Жыл басынан бері елімізде теміржол арқылы 13,5 миллион жолаушы тасымалданыпты. Басым бөлігі Астанаға билет алған, деп хабарлайды Алатау телеарнасы. 

Мұндай деректі Ұлттық статистика бюросы жариялады. Онда 2023 жылғы қаңтар-тамызда теміржол көлігімен тасымалданған жолаушылар саны 13,5 миллион адамды құрағаны, әрі бұл көрсеткіш 2022 жылдың тиісті кезеңімен салыстырғанда 3,3 пайызға артық екені көрсетілген. 

Жолаушылардың басым бөлігі, яғни 42,2 пайызы жаз айларында тасымалданған. Мысалға маусым айында 1,7 миллион жолаушы, шілдеде 1,9 миллион, ал тамыз айында 1,9 миллион жолаушы пойызбен жол жүріпті. 

Жолаушылар таңдаған ең танымал бағыт – Астана, 8 ай ішінде елордаға 3,7 миллион жолаушы билет сатып алған. Одан кейін жиі барған өңір Ақтөбе облысы – 1,2 миллион жолаушы, үшінші танымал бағыт – Қызылорда облысы, 1 миллион жолаушы.

2023 жылғы қаңтар-тамызда теміржол көлігімен жолаушыларды тасымалдаудан түскен табыс 82,7 миллиард теңгені құрады. Бұл өткен жылдың сәйкес кезеңімен салыстырғанда 4,9 пайызға көп.

2022 жылы және 2023 жылдың 6 айында мемлекеттік қызметшілер өздеріне тарту етілген 438 сыйлықты мемлекеттік мүлік жөніндегі уәкілетті органға тапсырған. Ол қатарда қымбат телефонда бар, деп хабарлайды Алатау телеарнасы ҚазАқпаратқа сілтеме жасап. 

“2022 жылы және 2023 жылдың бірінші жартыжылдығында Қазақстан Республикасының Сыбайлас жемқорлыққа қарсы іс-қимыл туралы заңнамасына сәйкес өзіне сыбайлас жемқорлыққа қарсы шектеулерді қабылдайтын адамдар комитеттің аумақтық бөлімшелеріне 438 дана сыйлықты тапсырды. 438 сыйлықтың ішінде 188 сыйлық аукцион арқылы сатылды. Аукцион арқылы сатылған ең бағалы сыйлық «Iphone 13» маркалы телефон 327 079 теңгеге саудаланды”, - делінген Қаржы министрлігі Мемлекеттік мүлік және жекешелендіру комитеті жауабында. 

Айта кетейік, мемлекеттік қызметшілерге немесе “Сыбайлас жемқорлыққа қарсы іс-қимыл туралы” Қазақстан Республикасының Заңына сәйкес өзіне сыбайлас жемқорлыққа қарсы шектеулер қабылдайтын өзге де адамдарға және олардың отбасы мүшелеріне хаттамалық және басқа да ресми іс-шаралар кезінде берілген (табыс етілген) сыйлықтар мемлекетке берілген сыйлықтар болып есептеледі. Бұл сыйлықтар Қазақстан Республикасының заңнамасында айқындалған тәртіппен және мерзімдерде оларды мемлекеттік мүлік жөніндегі уәкілетті органға өтеусіз беру арқылы мемлекеттік мүліктің құрамына түседі. Сыйлықтарды сатудан түскен ақша республикалық бюджетке аударылады.

Биыл қараша айының басында елімізге Түркия Президенті Режеп Тайип Ердоған келеді, деп хабарлайды Алатау телеарнасы ҚазАқпаратқа сілтеме жасап. 

Бұл туралы елімізге ресми сапармен келген Түркияның Сыртқы істер министрі Хакан Фиданмен кездескен ҚР Сыртқы істер министрі Мұрат Нұртілеу мәлім еткен. 

“Осы ретте, үстіміздегі жылдың 3 қарашасына жоспарланған Түркі мемлекеттері ұйымының мерейтойлық 10-шы саммитіне Президент Режеп Тайип Ердоғанның сапарын ұйымдастырып, оны жоғары деңгейде өткізуге күш жұмылдыруға уағдаластық. Бұл – серіктестігімізді стратегиялық рухта дамытудың тағы бір жолы”, - деді Мұрат Нұртілеу.

Еске салайық, Түркі мемлекеттерінің 10-шы мерейтойлық саммиті Түркістан қаласында өтеді.