НОВОСТИ

Елдегі қақаған қыс суығы сынады. Синоптиктер ел территориясына солтүстік атлантикалық жылы ауа массасы жылжып келе жатқанын жазды, деп хабарлайды Алатау телеарнасы. 

Казгидромет дерегіне сүйенсек, 19-21 желтоқсанда елдегі қыстың қақаған аязының беті қайтады. Қазақстанға солтүстік атлантикалық жылы ауа массасы жылжып келеді. 

"Қыстың нағыз қақаған аязды кезеңі аяқталады. Қазақстан аумағына Атлантикалық мұхиттың солтүстік бөлігіндегі жылы ауа массасы жылжып келеді. Нәтижесінде еліміздің басым бөлігінде ауа температурасы көтеріледі деп күтіледі. Кезекті солтүстік атлантикалық циклонның салдарынан метеожағдайлар нашарлап, боран соғып, қар жауады, ал қардың арты жаңбырға ұласады, - делінген ақпаратта. 

Сонымен қатар, синоптиктер еліміздің батысы мен оңтүстігінде 21 желтоқсанда кешке, сондай-ақ солтүстікте және орталықта көктайғақ болады деп болжауда.

Петропавлда қолөнершілер тіккен құрақ көрпе Қазақстанның рекордтар кітабына енді. Оның ұзындығы 500 метр, деп хабарлайды Алатау телеарнасы. 

Бұл туралы Спутник жазды. Ондағы дерекке сүйенсек, қолөнершілер республикалық "Аламан құрақ" байқауында ұлттық нақышта көрпе тіккен. Бір шыңды бағындырған шеберлер енді әлемдік рекордқа дайындалып жатыр.

"Кесте тігуді 4 жасымнан бастадым. Ол кезде кішкентай бала едім. Тұрмысқа шыққан соң көрпе тігумен айналыстым. Мұнымен әлі де әуестенемін. Жарыста 1,5 мың қатысушыдан 200 қолөнерші ақтық сынға шықты. Біз соңына дейін жетеміз деп шештік және бұл шешімімізге өкінбедік. Қанша көп күш жұмсадық, бірақ бұл ақталды", - дейді Петропавл қаласының тұрғыны Бақыт Мұстафина.

Петропавлдық қолөнершілер ұлттық тігін өнерінің дәстүрі мен тарихын кейінгі ұрпаққа мұра етуді армандайды. Қазірдің өзінде олар өз тәжірибесін және білімін бөлісуге дайын.

ҚР Еңбек және халықты әлеуметтік қорғау министрлігі (ЕӘҚМ) елдегі зейнеткерлер саны қанша екенін нақтылады, деп хабарлайды Алатау телеарнасы.

Дерекке сүйенсек, 1 желтоқсандағы жағдай бойынша зейнеткерлер саны 2 миллион 328 мың адамды құрайды.

"2023 жылғы 1 желтоқсандағы жағдай бойынша зейнетақының орташа мөлшері 120 838 теңгені құрады, оның ішінде ынтымақты зейнетақы мөлшері – 82 950 теңге, базалық зейнетақы – 37 888 теңге", – делінген 13 желтоқсандағы хабарламада.

Елімізде 2023 жылдың басынан бері республикалық бюджеттен 3 триллион 33,7 миллиард теңге зейнетақы төленсе, оның 930,6 миллиард теңгесі базалық зейнетақыны төлеуге, 2 триллион 103,1 миллиард теңгесі ынтымақты зейнетақыға бағытталған.

Ведомство 2018 жылдың 1 шілдесінен бастап мемлекеттік базалық зейнетақы төлемі әрбір алушыға оның зейнетақы жүйесіне қатысу өтілі ескеріле отырып, жеке тағайындалатынын еске салды. Бұл ретте, зейнетақы жүйесіне қатысу өтіліне 1998 жылғы 1 қаңтардағы жағдай бойынша ынтымақтастығы жүйесінде әзірленген еңбек өтілі, сондай-ақ міндетті зейнетақы жарналары (МЗЖ) төленген кезеңдер кіреді.

Ал міндетті зейнетақы жарналары неғұрлым жүйелі және толық көлемде төленсе, зейнеткерлік жасқа жеткенде базалық зейнетақы төлемінің мөлшері соғұрлым жоғары болады.

Әлемдегі ең бай бес отбасы тізімі жарияланды. Көш басында Әл Нахайян әулеті тұр, деп хабарлайды Алатау телеарнасы. 

Тізімді Bloomberg агенттігі жариялады. Дерекке сүйенсек, Әбу-Дабидің билеуші Әл Нахайян әулеті 2023 жылғы әлемдегі ең бай отбасылар рейтингінде көш бастаған. Әулет өкілдерінің бірі – Біріккен Араб Әмірліктерінің Президенті Мұхаммед бен Заид Әл Нахаян. Бұл әулеттің байлығы 305 миллиард долларға бағаланып отыр. 

Екінші орынды Walmart дүкендер желісінің иесі Уолтон отбасы иеленді. «Bloomberg» отбасының байлығы 259,7 миллиард долларға жететінін атап өтті.

Hermes сән үйінің негізін қалаған Гермес отбасы 150,9 миллиард доллармен үшінші орынға жайғасты.

Одан кейінгі орындарды 141,9 миллиард доллар байлығымен Mars брендіне иелік ететін Марс отбасы, сондай-ақ Катар шейхтері мен әмірлерінің билеуші әулеті Ас-Санидың отбасы (133 миллиард) иеленді. 

Алматыда жұмыс істейтін жастарды сатып алу құқығынсыз жалға берілетін баспанамен қамту бағдарламасы басталады, деп хабарлайды Алатау телеарнасы. 

Бұл туралы Аlataunews.kz жазды. Онда 11-15 желтоқсан аралығында Алматы қаласының коммуналдық инфрақұрылымды дамыту басқармасы «Жұмыс істейтін жастар үшін сатып алу құқығынсыз жалға берілетін тұрғын үй» бағдарламасы аясында Алматы қаласының жұмыс істейтін 35 жасқа дейінгі жастарынан өтініш пен құжаттарды қабылдайтыны жазылған. 

Бұл тұрғын үй жалға 3 жыл мерзімге беріледі. Наурызбай ауданында жалпы саны – 2 100 пәтер. 

Бағдарламаға қатысуға қойылатын негізгі талаптар:

‒ 35 жасқа толмаған, жалпы білім беретін мектептердің және (немесе) техникалық және кәсіптік және (немесе) орта және (немесе) жоғары және (немесе) жоғары оқу орнынан кейінгі білім беру ұйымдарының білім беру оқу бағдарламаларын меңгерген және еңбек қызметін жүзеге асыратын ҚР азаматтары;

– Алматы қаласында тұрғылықты жері бойынша 3 жылдан кем емес тұрақты тіркеуді растау (осы қалада тұрғын үй сатып алуға үміткерлер үшін);
– Алматы қаласында 14 жастан асқан өтініш берушінің отбасы мүшелерінің (жұбайы және болған жағдайда балалары) тұрақты тіркелуі;

– өтініш берушінің, жұбайының (зайыбының), кәмелетке толмаған балаларының өтініш берудің алдындағы 5 жыл ішінде меншік құқығында, жалдау құқығымен немесе сатып алу құқығынсыз жалға берілетін тұрғын үйдің жоқтығын растау (жергілікті атқарушы органның тиісті анықтамасымен расталатын апатты жағдайдағы, құлау қаупі бар тұрғын үйлерді қоспағанда);

– соңғы алты айда кемінде 40 айлық есептік көрсеткіш (2023 жылға – 138 мың теңге) мөлшерінен кем емес ай сайынғы табыстың болуы;

– банктік жинақ шотында 40 айлық есептік көрсеткіш (2023 жылға – 138 мың теңге) мөлшерінен кем емес қалдық болуы.

Қатысушыларды іріктеу балдық жүйе негізінде (ең көп балл саны бойынша) жүргізіледі. Балл беру критерийлері, сондай-ақ қажетті құжаттар тізімі жоғарыда көрсетілген сайтта орналастырылған.

Өтініш пен құжаттарды тапсырғаннан кейін бағдарламаға қатысушылар жоғарыда көрсетілген сайттағы жеке кабинеті арқылы берілген өтініштің нәтижесін дербес бақылайды.

Елімізде жол саласы жұмысшыларының айлығы көтеріледі. Осылайша ұзаққа тұрақтамайтын кадр мәселесін оңалту көзделіп отыр, деп хабарлайды Алатау телеарнасы. 

Бұл туралы көлік министрі Марат Қарабаев айтты. Закон.кз-тің жазуынша бүгінде жол саласындағы жұмысшылардың айлығы аз болғандықтан білікті маман тұрақтамайды. Ал елде жыл сайын 10 мың шақырым жол жөнделеді екен. Оның 3 мың 600 шақырымы республикалық, қалғаны жергілікті жолдар. 

"Келесі жылдан бастап әкімдік өз есебінен 15 пайызға көтеру жоспарлап отыр. Екіншіден ол кісілер аудандарда тағы да бір қосымша жұмыс алып, соның есебінен тағы да ақшасын көтереміз деп отыр. Үшінші мәселе біздің өзіміздің әрбір жолға бөлінген ақшаны келесі жылы көтеріп, нәтижесінде айлығын көтеруге тырысатын боламыз”, - деді министр.