https://www.youtube.com/embed/6JIWkhoGZRM?si=cEkZb8Vw4nG7206p"

Ұлттық қордан балаларға қаражат беруге қатысты заң қабылданбады.  Сенат депутаттары Мәжіліске кері қайтарды. Айтуларынша, құжат әлі де шикі. Заңға   түзетулер енгізу қажет. Соның бірі егер, бала 18 жасқа толып ол қаражатты алмайтын болса, ол ақша тағы 10 жыл сақталады. Содан кейін автоматты түрде біріңғай жинақтаушы зейнетақы қорына аударылады. Сол сәтте, яки АҚШ долларымен аудару кезінде «аударым күніне» емес, «аударым сәтіне» теңгемен айырбасталауы тиіс. Егер бұл аталған өзгерістерді Мәжіліс мақұлдаса, құжат қайтадан Сенат қарауына келіп түседі.

БЕКБОЛ ОРЫНБАСАРОВ ҚР ПАРЛАМЕНТІ СЕНАТЫНЫҢ ДЕПУТАТЫ:

«Қазақстан Республикасының кейбір заңнамалық актілеріне Ұлттық қордан балаларға арналған қаражатты есептеу, төлеу және пайдалану мәселелері бойынша өзгерістер мен толықтырулар енгізу туралы» Заңның жекелеген баптары мақұлданбады. Бұл ретте, аталған баптардың жаңа редакциясын ұсына отырып, құжат Мәжіліске қайтару ұсынылды».

https://www.youtube.com/embed/pBWJG0Sq2SY?si=zdQONIiW4NmUmora"

Мемлекет басшысы дәстүрлі Digital Bridge халықаралық технологиялық форумы аясында ұйымдастырылған роботты техника, Social Tech, Creative Economy, AI, FinTech, Industry 4.0, GovTech тақырыптық көрме аймақтарын, сондай-ақ Kaspi.kz, Қаржы нарығын реттеу және дамыту агенттігі, Astana Hub, Freedom Bank, MyCar және тағы да басқа ұйымдардың көрме стендтерін аралап көрді.

Роботты техника аймағында Мемлекет басшысы көптеген жарыстарда жеңімпаз атанған роботты техникадан Қазақстан құрамасының мүшелерімен әңгімелесті және Ustem Foundation, Alem School, MakerSpace жобаларымен танысты. Мемлекет басшысы көрмеге қатысушыларға өздерінің цифрлық жобаларын табысты жүзеге асыруына тілектестік білдірді.

Президент еліміздегі цифрландыру үрдісі тек бір саланы ғана жетілдіруге емес, сонымен қатар жалпы экономикамыз бен қоғам өмірінде елеулі өзгерістер жасауға бағытталғанын атап өтті.

https://www.youtube.com/embed/67exf_TqdaE?si=5HpmdpO5AF-Kgc_a" 

Мемлекет басшысы Қасым-Жомарт Тоқаев  Digital Bridge 2023 халықаралық форумына қатысты. Қазақстан Президенті бұл форумның кейінгі бес жылда IT индустриясының соңғы үрдістері мен даму перспективаларын талқылауға арналған Орталық Азиядағы ең ірі алаңға айналғанын атап өтті. Биыл Digital Bridge форумына 20 мыңнан астам адам жиналды. Оның ішінде 300-ден астам IT компанияның өкілдері және 30 елден келген делегация бар. Әдеттегідей Форумға қызығушылық жоғары. Бұл Қазақстанның Еуразия кеңістігінде жетекші әрі маңызды цифрлық және қаржылық технология хабы екенін тағы да нақтылай түседі. Мемлекет басшысының айтуынша, бүгінгі шараның тақырыбы – өте өзекті.

ҚАСЫМ-ЖОМАРТ ТОҚАЕВ ҚАЗАҚСТАН РЕСПУБЛИКАСЫНЫҢ ПРЕЗИДЕНТІ: «Жасанды интеллект бұдан былай ғылыми фантастика емес, өмірдің ақиқатына айналды. Жаңа дәуірдің басталғанына куә болып отырмыз. Кезінде электр жарығы мен интернетті ойлап табу тіршілігімізді қалай түбегейлі өзгертсе, жасанды интеллекті технологиясының ықпалы да дәл сондай орасан зор. Ол адамзаттың тұрмыс салтын мүлдем басқа арнаға бұрып, жұмыс процестерін автоматтандырады және ауқымды экономикалық құндылық қалыптастыра алады. Кейбір сарапшылардың бағалауынша, жасанды интеллектінің жаһандық экономикаға қосатын елеулі үлесі – дүниежүзілік ЖІӨ-нің төрттен бір бөлігіне парапар. Аталған технологияның кең қолданысқа ие болуы Қазақстанның қарқынды дамуында маңызды рөл атқара алады».

Президенттің пікірінше, қысқа мерзім ішінде жасанды интеллектіні дамыту үшін барлық жағдайды жасау қажет. Мемлекет басшысы форум қатысушыларына бұл бағыттағы жұмыстың негізгі басымдықтарын атап өтті.

ҚАСЫМ-ЖОМАРТ ТОҚАЕВ ҚАЗАҚСТАН РЕСПУБЛИКАСЫНЫҢ ПРЕЗИДЕНТІ: «Жасанды интеллектіні қолдану аясын және оны дамытудың міндеттері мен құралдарын айқындайтын стратегиялық құжат қабылдау керек. Бұл – халықаралық озық тәжірибе. Мұндай қадам елімізді технологиялық тұрғыда дамытудың орнықты бағытын айқындауға мүмкіндік береді. Ең алдымен, жасанды интеллект технологиясын экономикамыздың мұнай-газ секторы, энергетика, ауыл шаруашылығы, көлік және логистика секілді маңызды салаларына енгізуге мән беруіміз қажет деп санаймын. Жасанды интеллект қалаларымызды өмір сүруге және жұмыс істеуге қолайлы әрі толыққанды ақылды қалаға (smart city) айналдыру процесін айтарлықтай дәрежеде оңтайландыра алады. Мемлекеттік қызмет көрсету кезінде жасанды интеллект мүмкіндіктерін кеңінен пайдаланудың да маңызы зор. Бұл орайда біз елеулі нәтижеге қол жеткіздік. Атап айтқанда, азаматтардың әлеуметтік әл-ауқатының деңгейін анықтауға және оларға проактивті мемлекеттік қолдау көрсетуге мүмкіндік беретін «Отбасының цифрлық картасы» іске қосылды. Мұндай өнімді «Бәйтерек» холдингі базасында бизнес үшін де енгізу керек. Менің тапсырмам бойынша бұл бағытта ауқымды цифрлық трансформациялау жұмыстары басталып кетті».

https://www.youtube.com/embed/exaLdfsafdI?si=9S1PbKhGOSBsXTU_" 

https://www.youtube.com/embed/qzegNKROjpU?si=gBDvsq9XpiQ1Ynld"

Ауғанстанда Герат провинциясында орын алған күшті жер сілкінісінің құрбандар саны артып келеді. Әр отбасы кем дегенде 3-4 адамынан айырылып отыр.

Ауғанстандық  Абдул Латиф таяудағы жер сілкінісі кезінде төрт бірдей туысынан айырылды. Оның үйі толығымен қираған. Ол әрі қарай не істерімді білмеймін,тіпті өмір сүргім келмейді дейді.

АБДУЛ ЛАТИФ ГЕРАТ ПРОВИНЦИЯСЫНЫҢ ТҰРҒЫНЫ: «Ауылдағы әр үйде бірнеше қаза тапқан жандар бар. Барлық үйлер қирап қалды. Бір үйде бірден тоғыз адам қайтыс болды».

Ауғанстандық қарт әже Пари Гюл де туған-туыстарын жоқтап отыр.

ПАРИ ГЮЛЬ ГЕРАТ ПРОВИНЦИЯСЫНЫҢ ТҰРҒЫНЫ:
«Менің екі немерем қайтыс болды. Мен бәрін жоғалттым. Барлығы үйінді астында қалды».

Магнитудасы 6,3 болатын күшті жер сілкінісі орын аған алғашқы дүмпуден кейін тағы сегіз күшті дүмпу болды. Герат қаласы, сонымен қатар жақын маңдағы ауылдар зардап шегіп 20-сы толығымен жойылған. Қазірдің өзінде 3000-ға жуық адам қаза тапқан. Әлсіз дүмпулер әлі де сезіледі. Адамдар үйінділерді тазалауды жалғастыруда, сонымен қатар көмек күтуде. Көбісі ашық аспан астында түнеуге мәжбүр.

АТАУЛЛА ГЕРАТ ПРОВИНЦИЯСЫНЫҢ ТҰРҒЫНЫ:
«Біз билік пен гуманитарлық ұйымдардың бізге назар аударып, суықтан өлмеуіміз үшін баспана мен тамақ беруін қалаймыз».

ДДҰ Ауғанстанға  көмек қажет екенін айтады. Мұнда денсаулық сақтау жүйесі түгел дерлік жойылды: ауруханалар аз, дәрі-дәрмек жеткіліксіз. Жер сілкінісінен кем дегенде 10 мыңға жуық адам, соның ішінде балалар мен әйелдер зардап шекті. Дәрігерлер мұндай жүктемені көтере алмай отыр. ДДҰ халықаралық донорларды Ауғанстанға бес миллион доллар беруге шақырды. Әзірге бірнеше ел ғана жауап берді.

https://www.youtube.com/embed/MudfMJSOVpo?si=QiT-7XmxIhsPDAF_" 

Израильден 124 қазақстандық елге оралды. Тель-Авив қаласына отандастарымызды алып қайтуға репатриациялық рейс ұйымдастырылған болатын. Сол әуе кемесі кеше түнгі сағат 12-ге таман Алматыға келіп қонды. Бортта барлығы 166 жолаушы болды. Оның 42-сі шетелдік. Әуежайда оларды туған-туыстарымен қоса біздің түсіруші топ та қарсы алды.

Алматы әуежайында отандастарымызды қарсы алушылардың қарасы көп болды. Бәрінің тілегі бір еді. Жақындарын аман-есен көру. Солардың бірі Асқаровтар отбасы. Олар апаларын тағатсыздана күтті. Әсіресе, немерелері апаларын қатты сағынған екен.

БАЯН АСҚАРОВА АЛМАТЫ ҚАЛАСЫНЫҢ ТҰРҒЫНЫ: «Тосып тұрған балаларымның апасының келінімін. Ол кісі жұмыс бабымен кеткен. Көрмегелі бес жарым жыл болды. Кіші немересін апасы туғанан көрмеді. Бірінші кездесуі. Апасы кеткен кезде балалар 2-3 жаста болған. Жетісінен бастап хабарласып тұрдық».

Оттан отанға, ұшақтан құшаққа, жақындарын ұзақ күткендер көздеріне жас алды. Ал, елден жырақта жүрген отандастарымыз туған жерге табан тіреп, жаны жай тапты.

АРТУР КОВАЛЕВСКИЙ АЛМАТЫ ҚАЛАСЫНЫҢ ТҰРҒЫНЫ: «Біз соңғы уақытқа дейін ұрыс аймағынан тез кетеміз деп үміттендік, өйткені мен ешқашан мұндай нәрсені сезінген емеспін – сиренаның жағымсыз даусы, жарылыс өте қорқынышты. Қателеспесем, Қазақстан - өз азаматтарын шұғыл қайтарып алған жалғыз ел. Чат, бәрі-бәрі дереу ашылды. Онда министрліктің, Air Astana-ның қызметкерлері жан-жақты қолдау көрсетті. Сол үшін де алғысымыз шексіз. Өз елімді өте мақтан тұтамын».

Израильде жағдай ушыққан күнен бастап Қазақстан өз азаматтарын эвакуациялаудың жолын қарастырды. Арнайы телефон желісі іске қосылып, Қазақстанның Израильдегі елшілігі елдің түрлі қалаларында қалып қойған отандастарымызбен байланыс орнатты. Ал, Air Astana әуе компаниясы арнайы рейс ұйымдастырды.

АДЕЛЬ ДӘУЛЕТБЕК  «Air Astana» КОМПАНИЯСЫНЫҢ  ВИЦЕ- ПРЕЗИДЕНТІ: «Өздеріңіз білетіндей, бұл елдегі жағдай сенбіден бастап күрт нашарлады. Осыған байланысты Air Astana рейстерді тоқтатты. Бүгін ғана эвакуациялық ұшуды жүзеге асыру мүмкін болды. Компания басшылығы азаматтарымызды эвакуациялау үшін шешуші шаралар қабылдады. Біз Тель-Авив әуежайында бірде-бір Қазақстан азаматын қалдырмадық, олардың барлығын алып кеттік. Біз бұл елдегі жағдайды жіті бақылап отырдық. Бұл өте шиеленісті жағдай. Жасыратыны жоқ, қиын қадам болды, өйткені ол жерде іс жүзінде азаматтық рейстер қалмады. Олардың барлығы тоқтатылды. Сондықтан осы рейсті орындағанымызға қуаныштымыз».

Бүгін түнде 166 азамат ұшып келді. Оның 124 – і ҚР азаматы, қалғаны — шетелдіктер. Бірі білім алып, енді бірі жұмыс бабымен жүрген. Кейбірі қонаққа барып қақтығыс ортасында қалып қойыпты. Жолаушыларды ұшаққа отырғызатын кезде басқа күнге алынған билет түгелдей жарамды деп танылды. Билеті жоқ азаматтарға арнайы төмендетілген тариф ұсынылды. Жалпы Израиль мен Қазақстан арасындағы әуе қатынасы 5-ші қазаннан бастап түгелдей тоқтады. Әзірге оның қашан қалпына келері белгісіз.

https://www.youtube.com/embed/nRcnVlx_7wY?si=HIrRT3KCN4nBxfOe" 

Мемлекеттің ұлттық тұтастығын, халқымыздың дәстүрлі дінін, ұрпағымыздың болашағын қатерге байлап бере алмаймыз. Осылай деген Мәжіліс депутаты Ермұрат Бәпи Үкімет басшыларынан ел ішіне діни іріткі салған жат ағымды санадан да, ауыл мен қаладан да қуып шығу керек дейді.

ЕРМҰРАТ БӘПИ ҚР ПАРЛАМЕНТІ МӘЖІЛІСІНІҢ ДЕПУТАТЫ:

«Депутаттар қаққан дабылды «бұлар ислам дініне қарсы шықты» деп әлдекімдер әлеуметтік желіде өңін айналдырып, дабыра салып жүр. Ескерте кетейін, жалпы исламға және елдегі исламның Ханафи мазһабына қарсы емеспіз. Біз дәстүрлі дінге бүйі тигендей болған салафизм, уахабизм идеясына қарсымыз. Қазақ халқының ежелден өмір сүру және тұрмысы мен салт-дәстүріне жат идеологиялық ағымға қарсы Үкімет жағынан жасалған концепциялық бағдарламалар бар ма?»

ТАМАРА ДҮЙСЕНОВА ҚР ПРЕМЬЕР-МИНИСТРІНІҢ ОРЫНБАСАРЫ:

«Қазір өзіңіз көтерген тақырып үлкен проблемаға айналып отыр. Тамыз айынан бастап осы мәселемен айналысып жатырмын. Біраз теологтарды, діни бірлестіктердің өкілдерін шақырып, пікір алмастық. Олардың пікірлері де депутаттар көтерген мәселемен сәйкес келіп тұр. Сіздердің ұсыныстарыңызды олар да қолдап отыр».

https://www.youtube.com/embed/1Ty4rjGHiCc?si=WQ_MRoKvjBEPV4gd" 

ХАМАС содырларының шабуылынан кейін ірі әуе компаниялары Израильге ұшуларын ішінара тоқтатты. Дүйсенбі күні кешке Тель-Авив әуежайына жоспарланған рейстердің үштен бірі орындалмады.

Delta әуе компаниясы елге рейстерді айдың соңына дейін тоқтататынын айтты. United және American Airlines, сондай-ақ көптеген еуропалық тасымалдаушылар осындай қадамға барып отыр. Нәтижесінде Тель-Авивтегі Бен Гурион әуежайында бейберекеттік орын алды.

ГЕРМАНИЯДАН КЕЛГЕН САЯХАТШЫ: «Біздің рейсіміз тоқтатылды, бірақ біз сабыр танытып отырмыз. Үйге жететінімізге сенімдіміз. Қайғылы жағдай. Бірақ мен адамдарды діттеген жеріне жеткізу үшін көп жұмыс істеліп жатқанын білемін».

Жалғыз израильдік El Al әуе компаниясы барлық израильдіктердің үйлеріне қайтуы үшін рейстер қосқан. Қазіргі уақытта Израиль өз тарихындағы ең ірі әскери жұмылдыруға күш салуда.

ИЗРАИЛЬ ТҰРҒЫНЫ: «Өткен жылы АҚШ-қа қоныс аударған 25 жастағы ұлым танк әскерлеріне қайта оралды. Әскерде сержант шенінде үш жыл қызмет еткен ол енді елді қорғау үшін үйіме оралу керек деп шешіпті».

АҚШ пен Еуропадағы авиациялық реттеушілер Израильге рейстерді тоқтату туралы ресми бұйрық шығарған жоқ. Алайда Ресей жағдайдың тұрақсыздығын алға тартып, түнгі рейстерге тыйым салып отыр.

Осы уақытта Газа секторындағы Хамастың орналасқан жерлеріне, штаб-пәтері мен қоймаларына әуе шабуылдары жалғастырылуда. Израиль анклавқа электр және су беруді  азық-түлік жеткізуді  тоқтатты. Үкімет  900-ге жуық израильдікті өлтіріп, 2600-ден астамын жаралаған топты толығымен жоймақ ниетте екенін айтты.  Ондаған адам тұтқынға алынды.Израиль әскерилері аз ғана уақыт содырлардың бақылауында болған шекарадағы ауылдардың біріне кірді. Мұнда 100-ге жуық өлген адамның денесі табылған.Израиль әскері ХАМАС басып алған барлық аймақтарды босатып, жекелеген содырларды жоюды жалғастырып жатқанын хабарлады.

https://www.youtube.com/embed/xpkGwe58lZU?si=XIrq5dd47boYuxLo" 

Денсаулық сақтау министрлігінің мәліметінше, елімізде қызылша ауруы өршіп тұр. Әсіресе Алматы қаласында кеселді жұқтырғандар көбейіп барады. Індетті жұқтырғандардың көбі – бала. Астана, Шымкент қалалары мен Жамбыл облыстарында да асқынып тұр. Қызылша жылдам таралатын дерт. Мамандар оның жалғыз емі – вакцина екенін айтып отыр.

Алматыда ағымдағы жылы наурыз айынан бастап қызылшаның зертханалық жағдайы расталған 1646 адам тіркелген. Оның ішінде 14 жасқа дейінгі балалар саны – 1397. Инфекция қалаға эпидемиологиялық жағдайы қолайсыз болған елдерден әкелініп, қызылшаға қарсы екпе алмаған тұрғындар арасында таралған. Қызылша-дене температурасының жоғарылауымен, жөтелмен, мұрынның ағуымен, конъюнктивитпен және бөртпемен сипатталатын жедел вирустық ауру.

АЛМАШ САРСЕМБАЙҚЫЗЫ АЛМАТЫ ҚАЛАСЫНЫҢ САНИТАРИЯЛЫҚ-ЭПИДЕМИЛОГИЯЛЫҚ БАҚЫЛАУ ДЕПАРТАМЕНТІНІҢ ИНФЕКЦИЯЛЫҚ ЖӘНЕ ПАРАЗИТТІК АУРУЛАРДЫ ЭПИДЕМИОЛОГИЯЛЫҚ БАҚЫЛАУ БӨЛІМІНІҢ БАСШЫСЫ:«Ең бірінші ұсынарымыз, егерде аурудың қандай да бір белгілері болған кезде, дер кезінде дәрігерлерді шақырып, дәрігердің тағайындауымен ем қабылдау. Өз бетімен емделмеу және ауырған балаларды ұйымдасқан орталарға апармау. Аурудың ең алдын алудың ең бір тиімді тәсілі – қызылшаға қарсы екпе алу.  Прафилактикалық екпелерді жүргізетін ұлттық күнтізбеге сәйкес, қызылшаға, паразитке қарсы екпе балаларға 1 жасында жасалады және екінші екпе 6 жасында жүргізіледі».

Айта кетейік, Алматы қаласы Қоғамдық денсаулық сақтау басқармасы бүгінде қызылшадан 29 ересек және Қалалық балалар клиникалық жұқпалы аурулар ауруханасында 201 бала стационарлық ем алып жатыр деп хабарлайды. Стационарлық ем қабылдап жатқан науқастың барлығының жағдайы орташа ауыр. Науқастар арасында қызылшадан қайтыс болғандар тіркелген жоқ.

https://www.youtube.com/embed/uSiiJQG6QQo?si=F7v0lwJHnVxeEK1F" 

Жұмбақ күйде көз жұмған студентке қатысты тағы да қылмыстық іс қозғалды

Щучинскіде жұмбақ жағдайда көз жұмған студенттің өліміне қатысты Мемлекет басшысы Ішкі істер министріне тапсырма берді. Еске сала кетейік, 6 қазанға қараған түні Щучинскідегі теміржол бойында жоғары техникалық колледжінің 4-курс студенті Роман Бодаговтың өлі денесі Бурабай курорты мен Кенесары арасындағы учаскеде теміржол бойында табылған. Әлеуметтік желіге марқұм студенттің анасы Президент пен Ішкі істер министріне видео үндеу жариялаған болатын.

Марқұм студенттің есімі Роман Бодагов. Анасының сөзінше, ұлы 6-шы қазанға қараған түні үйден шығып кеткен. Жоғалып кеткеннен кейін жарты сағатта темір жол өткелінде мәйіті табылған. Қайғылы оқиғаға байланысты Көкшетау станциясындағы желілік полиция бөлімшесінде Қазақстан Республикасы Қылмыстық кодексінің 344-бабы 2-бөлігі "Абайсызда адам өліміне әкеп соққан жол қозғалысы немесе теміржол көлігін пайдалану қауіпсіздігі ережелерін бұзу" бойынша соталды тергеу басталды. Алайда, туыстары мен жақындары жас жігіт өзіне қол жұмсағанына сенбейді. Надежда Бодагованың айтуынша, Богдан көңілді, жанашыр бала болған. Ұлын одан ақша бопсалағандар өлтірді деп санайды.

НАДЕЖДА БОДАГОВА-МАРҚҰМНЫҢ АНАСЫ: «Ұлым ақша туралы ештеңе айтқан жоқ. Біз ол туралы кейін білдік. Балам бақытты өмір сүргісі келді. Полиция қызметкерлерінен тәртіп орнатуды сұраймын. Біздің қалада балалар ешкімнен, еш нәрседен қорықпай жүру керек. Ұлымның өліміне кінәлілер барық заңға сәйкес қатаң жазалансын. Мұндай жағдайлар қайталанбас үшін әділдік болғанын қалаймын!»

Мемлекет басшысы Ішкі істер министріне Щучинск қаласында болған студенттің өліміне қатысты барлық мән-жайды жан-жақты тексеруді тапсырды. Кінәлілер заң талаптарына сай жауапқа тартылуы керек. Президент бұл мәселені ерекше бақылауға алды.

МҰХТАР ҚОЖАЕВ ҚР ІІМ ТЕРГЕУ ДЕПАРТАМЕНТІ БАСТЫҒЫНЫҢ МІНДЕТІН АТҚАРУШЫ: «Болған оқиғаның барлық мән-жайын анықтауға бағытталған қажетті тергеу әрекеттері жүргізіліп жатыр. Алдын-ала тергеу нәтижелері бойынша құқықтық баға берілетін болады. Тергеу барысы ішкі істер министрлігінің ерекше бақылауында».

Алдын ала тергеу нәтижелері бойынша құқықтық баға берілетін болады. Тергеу барысы Ішкі істер министрлігінің ерекше бақылауында.

https://www.youtube.com/embed/bezU8PUxr2s?si=MOPRgF-ZmK6jak8F"

Қымбат әуе билеті, тоз-тозы шыққан пойыз вагоны, жемқорлыққа белшеден батқан «7-20-25» ипотекалық бағдарламасы. Бүгін Мәжілісте депутаттар осындай түйіткілді мәселелерді көтерді. Сонымен, ұшақ билеті қашан арзандайды, сапалы вагондар қашан жолға шығады? Ол жайлы толығырақ алдағы бейнематериалда.

Елдегі күнде жолаушылар тасымалдап жүрген пойыздардың жартысына жуығы тозған. Кестеден кешігетін, вагондары талапқа сай келмейтін, билеті қымбат соның өзіне қол жетпейтін темір жол қызметінің сапасы туралы мәселе бүгін Парламент мінберінде қайта көтерілді.

МАҚСАТ ТОЛЫҚБАЙ ҚР ПАРЛАМЕНТІ МӘЖІЛІСІНІҢ ДЕПУТАТЫ:

«Айта-айта жақ талды. Сапа болса нөл. Совет заманынан қалған ескі вагондар сүйретіліп әлі жүр. Темір жол вагонының 60% тоз-тозы шыққан. Министрлік 2030-ға дейін жабдықтаймыз дейді. Бірақ біздің ҚТЖ-ға бәрібір. Өйткені шекелері шалқып жүрген менеджерлерге мен айтайын Қазақстан темір жолының құны көк тиын. 26 жылда жарытпаған саланы 7 жылда жарылқайды дегенге жан баласы сенбейді. Өйткені айтатындары ертегі, аңыз. 2030-ға дейін қала вагондарының 80% тозып, екі қолымызды мұрнымызға тығып отырмасымызға кепілдік бере аласыз ба министр мырза? Терезесі ашылмайтын, кондицонерлері істемейтін, қабырғасында тарақандар жүретін ескі вагондардың өзіне жаз мезгілінде билет таппайсың. Бағаның өзі қымбат. Сөйте тұра билетті субсидиялауда жыл сайын сытырлатып миллиард санап береміз».

Бұл мәселеден көлік министрі де хабардар. ҚТЖ компаниясы биыл 50, келесі жылы 100 жаңа вагонмен толығады. Ал, 2025 жылдан бастап тіпті халық бұрын-соңды мінбеген заманауй, бар талапқа сай пойызбен қатынайтын болады деп сендірді. Ол үшін Еуропаның «мен» деген компаниясынан вагондар арнайы сатып алынбақ екен. Сондай-ақ депуттарды алаңдатқан тағы бір маңызды мәселе: ол ұшақ билетінің қымбаттығы.

АЙДОС САРЫМ ҚР ПАРЛАМЕНТІ МӘЖІЛІСІНІҢ ДЕПУТАТЫ:

«Атап айтқанда, адамдар төмен бюджетті әуе компаниясының билет бағасының күн сайын қымбаттап бара жатқанын айтады. Air Astana әуе компаниясының еншілесі Fly Arystan жолаушыларды қолжетімді бағамен қамту үшін құрылған еді. Сонымен қатар ішкі туризмді дамытуға негізделген болатын. Ал іс жүзінде лоукестер билеттерінің бағасы бас компания бағасымен теңесіп, жылдан жылға өсіп жатыр. Осындай баға масқара емес пе?»

МАРАТ ҚАРАБАЕВ ҚР КӨЛІК МИНИСТРІ: «Мәселен, 2020, 2021 жылдармен салыстырғанда әуе тасымалына сұраныс 17%-ға өсті. Биыл 26%-ға өсіп отыр. Яғни сұраныс артып жатыр, ал ұсыныс оған төтеп бере алмай жатыр. Ол үшін ұшақтардың санын ұлғайту қажет. Былтыр 14 ұшақ сатып алынды, биыл жыл соңына дейін әуе компаниялары тағы 11 ұшақ алады. Нәтижесінде қазақстандық ұшақтарды саны 100-ге жетеді және ондағы орындықтардың саны 12 мыңнан 15 мыңға артады. Тағы 3 мың қосылады. Оған қоса 2024-2025 жылдары тағы 14 ұшақ сатып алу жоспарланып отыр».

 Жақында құрылған көлік министрлігінің басшысы бұл мәселені назарға аламын деп уәде еткендей болды. Осылайша, депутаттар өз сауалына жауап алса, халық қалаулысы Бақытжан Базарбек жер мәселесіне қатысты сұрақ жолдаймын деп басы дауға қалды.

БАҚЫТЖАН БАЗАРБЕК  ҚР ПАРЛАМЕНТІ МӘЖІЛІСІНІҢ ДЕПУТАТЫ:

«Егер жұмыс істей алмасаңыздар, министрмен қоса министрліктен қуып шығамыз. Аямаймыз»

ЕРЛАН ҚОШАНОВ ҚР ПАРЛАМЕНТІ МӘЖІЛІСІНІҢ ТӨРАҒАСЫ: «Құрметті, Бақытжан Жұмабекұлы! Бірінші кезекте депутаттық этика деген бар. Сіз қатты кетпеңіз! Агрессиясыз сөйлеңіз. Екіншіден, мен жақтап отырғаным жоқ. Қойып отырған сұрағыңыз дұрыс. 10 млн гектарға жуық жер қайтар.Бұл бірінші кезекте «Жер аманаты» комиссиясының жұмысы. Енді оны әрі қарай бөлу кезінде әділ бөлініп жатыр ма, жоқ па, сол ғой сіздің сұрағыңыз. Ол ең алдымен жергілікті әкімдердің, екінші кезекте осы құзыретті органдардың мәселесі, солардың жауапкершілігі».

 Ұлтымызды құртып жатқан екі тармақ: бірі –жемқорлық десе, енді бірі құмар ойын дейді мәжілісмендер, өйткені, суйцид жасайтындар да, қылмысқа баратындар да, ажырасатындар да осы – лодомандар. Сондықтан, бұл бизнесті түп тамырымен жоятын уақыт жетті дейді олар.

НАРТАЙ АРАЛБАЙҰЛЫ ҚР ПАРЛАМЕНТІ МӘЖІЛІСІНІҢ ДЕПУТАТЫ:

«Бұл лудомания бір адамның тағдырын емес, тұтас отбасыларды бүлдіреді. Елімізде ажырасқан әр 10 отбасының жетеуінде жанжал лудомания салдарынан шыққан. Ал біз осымен қалай күресіп жатырмыз? Елімізде қоғамдық көліктің сыртын, тұрғын үйлердің қасбетін түгелдей құмар ойындардың жарнамасына бердік. Бұл мәселені Президент Қасым-Жомарт Тоқаев та айтқан еді. Биліктің енді не күтіп отырғаны түсініксіз».

Жемқорлық демекші, депутат Дәулет Мұқаев «7-20-25 мемлекеттік ипотекалық бағдарламаны» жемқорлықтың нақ ортасына айналды деп сынады.

ДӘУЛЕТ МҰҚАЕВ ҚР ПАРЛАМЕНТІ МӘЖІЛІСІНІҢ ДЕПУТАТЫ:

«Бүгін «7-20-25»-ке лимит ашылды. 5 минутта бітті де қалды. Оқырмандардан: «Бұл не деген сұмдық» деген хаттар келіп жатыр. «Менен банк менеджері 1 млн 400 мың сұрады», «Менен 700 мың теңге сұрады» деген хаттар жіберуде. Бұл қашан тоқтайды?»

ҚАНАТ ШАРЛАПАЕВ ҚР ӨНЕРКӘСІП ЖӘНЕ ҚҰРЫЛЫС МИНИСТРІ:

«Тағы басқа бағдарлама бойынша мемлекет қаражат бөліп жатыр. Бірақ сіз өзіңіз білесіз, барлық халықты баспанамен қамту оңай емес. Егер сізде уақыт болса, сізбен бірге отырып, барлық бағдарламаны бірге қарайық».

Үш сағаттан аса уақыт бойына мәжілісмендер өзекті мәселелерді көтеріп, үкімет мүшелеріне өткір сауалдарын жолдады. Бұл айтылғандардың нақты қашан және қалай іске асатыны ол уақыттың еншісіндегі дүние.

https://www.youtube.com/embed/SI8n1jddvFA?si=a_nfxDMJz6lP67RM"

Талғар қаласының оңтүстігінде орналасқан су торабы тіршілік нәрін беруді қазан айының ортасына дейін жалғастырады. Тау жоталарындағы мұздықтардан еріген су, айтулы арна арқылы егін шаруашылығымен айналысатын диқандарға беріледі.Тәуліктік су реттегіш қоймасы 350-мың куб су сақтауға арналған.Қазіргі таңда транзиттік режимде пайдаланылады. Көктем,күз мезгілдерінде техникалық тазарту жұмыстары жүргізіліп отырады. Қуаңшылық орын алған жағдайда айтулы тоспаның көмегі тиеді.

МАДИЯР МҰХАМЕДҚАЛИЕВ ТАЛҒАР ИРРИГАЦИЯЛЫҚ СУ ШАРУАШЫЛЫҒЫ МК ДИРЕКТОРЫ

Су шаруашылығы саласында білікті мамандар жетіспейді.Айтулы мәселені шешу үшін гидротехникалық білім беретін оқу орындарымен келісім шарт жасауға дайындық жүруде.Тағы бір айта кететін өзекті жағдай, тау шатқалдарынан жүретін селдің салдары.

МАДИЯР МҰХАМЕДҚАЛИЕВ ТАЛҒАР ИРРИГАЦИЯЛЫҚ СУ ШАРУАШЫЛЫҒЫ МК ДИРЕКТОРЫ