НОВОСТИ

Ұлттық қауіпсіздік комитеті лаңкестік топтың жолын кесті. Олар Түркістандағы Қожа Ахмет Ясауи кесенесін қолдан жасалған жарылғыш құрылғымен жармақ болған, - деп хабарлайды Алатау телеарнасы ҚазАқпаратқа сілтеме жасап.  

Бұл туралы Ұлттық қауіпсіздік комитеті төрағасының орынбасары Руслан Сейсембаев Астанада өтіп жатқан ШЫҰ отырысында айтты. 

“Жыл сайын кем дегенде 2 террористік шабуылдың алды алынады. Мысалы, биыл ғана дайындықтың ерте кезеңінде Түркістандағы Қожа Ахмет Ясауи кесенесін қолдан жасалған жарылғыш құрылғымен жарудың жолы кесілді. Сондай-ақ, Астанада адамдар жаппай жиналған жерлерде қарулы шабуыл жасау әрекеттері тоқтатылды. Бізге келіп түскен ақпарат “ШЫҰ-ға мүше мемлекеттер үшін террористік қатерлердің қалыптасуы бірқатар үстем фактордың әсерінен болады” деген қорытынды жасауға мүмкіндік береді”, - деді Руслан Сейсембаев. 

Бүгін бас қалада Қазақстанның төрағалығымен Шанхай ынтымақтастық ұйымының (ШЫҰ) өңірлік терроризмге қарсы құрылым РАТС кеңесінің 40-отырысы өтіп жатыр.

Мемлекет басшысы Қасым-Жомарт Тоқаевтың дәстүрлі Қазақстан халқына жолдауынан кейін Үкімет құрамы жаңарды. Тіпті 4 министрлік қайта жасақталып, бес жаңа министр пайда болды. 

2022 жылдың қаңтарында Үкімет басшысы болған Әлихан Смайылов өз орнын сақтап қалды. Оның бірінші орынбасары Роман Скляр да лауазымынан босаған жоқ. Ал бұрынғы Еңбек және халықты әлеуметтік қорғау және Сауда және интеграция министрі болған Тамар Дүйсенова мен Серік Жұманғарин тек вице-премьер қызметін атқарады. Сонымен қатар Үкімет басшысының тағы 3 орынбасары Ғалымжан Қойшыбаев қосымша Үкімет аппаратының жетекшісі міндетін атқарса, Мұрат Нұртілеу Сыртқы істер министрі қызметінде. Ал Ерұлан Жамаубаев қаржы министрі. 

Жаңа жасақталған Үкіметте 4 министрлік құрылып, 5 жаңа министр лауазымға келді. Қайта құрылған экология және табиғи ресурстар министрлігін Ерлан Нысанбаев басқарады. Ол осы жылдың басында министр болып тағайындалған Зүлфия Сүлейменованың орнына келді. 

Экология министрлігі оның құрамынан су ресурстары және ирригация министрлігін бөліп, оған су қорын пайдалану мен қорғау, сумен жабдықтау және су бұру саласындағы қызметтер мен өкілеттіктерді беру арқылы қайта құрылды. Жаңа министрлікті Нұржан Нұржігітов басқарады. Нұржігітов тағайындалғанға дейін Жамбыл облысының әкімі болды.

"Бәйтерек" холдингінің бұрынғы басшысы Қанат Шарлапаев индустрия және инфрақұрылымдық даму министрлігінен бөлінген өнеркәсіп және құрылыс министрі болып тағайындалды.

Ал тағы бір жаңа құрылған көлік министрлігіне Марат Қарабаев келді. Ол бұған дейін индустрия және инфрақұрылымдық даму министрі болған.

                 Сурет: Спутник

Ақпарат және қоғамдық даму министрлігі мәдениет және ақпарат министрлігі болып қайта құрылды. Жаңа ведомствоны Аида Балаева басқарады.

Мәдениет және спорт министрлігі туризм және спорт министрлігіне айналды. Министр болып Ермек Маржықпаев тағайындалды.

Сауда және интеграция министрлігіне сол ведомство басшысының орынбасары қызметін атқарған Арман Шаққалиев жетекшілік етеді.

Ішкі істер министрі Марат Ахметжановтың орнына оның орынбасары Ержан Сәденов тағайындалды. 

Бұған дейін ҚР президенті жанындағы халықтың әлеуметтік осал топтарының құқықтары жөніндегі уәкіл қызметін атқарған Светлана Жақыпова еңбек және халықты әлеуметтік қорғау министрі болды.

Ауыл шаруашылығы министрі қызметіне Айдарбек Сапаров келді.

Қалған 9 министр өз орындарында қалды.

Венецияда 2024 жылы туристер санын азайту үшін қалаға бір күнге келетін қонақтардан 5 еуро (5,35 доллар) кіру ақысын алуды бастау жоспарланып отыр, деп хабарлайды Алатау телеарнасы inbusiness.kz-ке сілтеме жасап.

Кіру ақысы эксперимент негізінде келесі жылы 30 күн ішінде 14 жастан асқан барлық туристерден алынатын болады.

"Жаңа ереженің мақсаты — "Венецияда тұратындардың, оқитындардың немесе жұмыс істейтіндердің және қалаға келетіндердің құқықтары арасындағы жаңа тепе-теңдікті" табу", - дейді Венецияның туризм жөніндегі кеңесшісі Симон Вентурини, бұл ақша табудың амалы емес екенін ескертіп.

Кіру ақысын жинау жоспарын енгізудің нақты күндері және оны іске асыру тәртібі келесі аптада Кеңес түпкілікті мақұлдағаннан кейін айтылады.

Шамадан тыс туристер саны қала үшін үлкен проблемаға айналды. Туристер саны көбінесе 50 мыңға жуық адам тұратын қаланың тарихи орталығының тұрғындарынан едәуір асып түсетіні атап өтілген.

Шілде айында ЮНЕСКО сарапшылары Венеция мен Венеция лагунасын жаппай туризм мен климаттың өзгеруінің әсерінен жойылып кету қаупі төніп тұрған Дүниежүзілік мұра нысандарының тізіміне енгізуді ұсынды.

Мемлекет басшысы Қасым-Жомарт Тоқаев Бразилия президентіне құттықтау жеделхатын жолдады, деп хабарлайды Алатау телеарнасы Ақордаға сілтеме жасап.

Мемлекет басшысы Қасым-Жомарт Тоқаев президент Луис Инасиу Лула да Силваны Бразилияның ұлттық мерекесі – Тәуелсіздік күнімен құттықтады.

Президент жеделхатында Бразилия Қазақстанның Оңтүстік Америкадағы маңызды әрі сенімді серіктесі екеніне назар аударып, дәстүрлі достық рухындағы ынтымақтастықтың ауқымы кеңейіп келе жатқанын атап өтті.

Қасым-Жомарт Тоқаев екі ел арасындағы өзара байланыстың нығая түсетініне сенім білдіріп, Луис Инасиу Лула да Силваның аса жауапты мемлекеттік қызметіне табыс, барша Бразилия халқына құт-береке тіледі.

Үндістан мемлекеттің атын өзгертуі мүмкін. Шешім қабылданса Бхарат болады, деп хабарлайды Алатау телеарнасы Закон.кз-ке сілтеме жасап. 

Дерекке сүйенсек, Үндістанды ежелгі Бхарат атауына өзгерту туралы қарар парламенттің 18-22 қыркүйекте өтетін сессиясына енгізу жоспарланып отыр. 

Бұл ақпаратты Конгресс жетекшісі Джайрам Рамеш те растаған. Ол Раштрапати-Бхаван президент Бхараттың атынан G20 елдерінің қатысушыларына шақыру жібергенін атап өтті. 

"Демек, бұл жаңалық рас. Енді Конституцияның 1-бабында: "Үндістан болған Бхарат Штаттар одағы болуға тиіс" деп жазылуы мүмкін", – деп нақтылады Рамеш.

Бхарат – хинди тілінде Үндістанның тарихи атауы. Елдің "Үндістан" атауын солтүстік-батыс еуропалықтар елдің солтүстігінде ағып жатқан Үнді өзеніне байланысты қойған. Ал үнділер оны "Синдху" деп атайды.

Ассамның бас министрі Химанта Бисва Сарма сейсенбіде елдің атауын Бхарат деп өзгертуді қолдады.

Қазақстанда шұғыл қызметтер тізімі тағы бір байланыс нөмірімен толығады. Ол бойынша елдегі әйелдер мен балалар өз құқықтарын қорғай алады, деп хабарлайды Алатау телеарнасы. 

Жоба "Ашық НҚА" порталында жарияланды. Құжатта әйелдер мен балалардың құқықтарын қорғау жөніндегі "111 Аманат" байланыс орталығы пайда болатыны көрсетілген. 

“Байланыс қызметтерін пайдаланушылар үшін қосылуы тегін болып табылатын шұғыл медициналық, құқық қорғау, өрт, авария және басқа да қызметтердің тізбесін бекіту туралы» Қазақстан Республикасы Үкіметінің  2004 жылғы 3 қыркүйектегі № 929 қаулысына мынадай толықтыру енгізілсін. Көрсетілген қаулымен бекітілген байланыс қызметтерін пайдаланушылар үшін қосылуы тегін болып табылатын шұғыл медициналық, құқық қорғау, өрт, авария және басқа да қызметтердің тізбесі мынадай мазмұндағы реттік нөмірі 10-жолмен толықтырылсын, - делінген бұйрық жобасында. 

 Атап айтқанда тізім "отбасы, әйелдер және балалардың құқықтарын қорғау жөніндегі "111 Аманат" байланыс орталығымен" толығады.

Жобаның негізгі мақсаты – ақпараттық-анықтамалық, ұйымдастырушылық, психологиялық көмек көрсету, сондай-ақ азаматтардың заңды құқықтарын қамтамасыз етуге қатысты барлық мәселе бойынша бастапқы консультациялар өткізу үшін әрбір азаматқа тегін қосылу байланыс қызметтерін ұсыну. 

"111" бірыңғай нөміріне ересектер мен балалар қоңырау шала алады. Азаматтар отбасылық-тұрмыстық зорлық-зомбылық, балалар құқығының бұзылғаны, өмірі мен денсаулығына төнген қауіп және тағы басқалар туралы хабарлай алады.

Жоба 18 қыркүйекке дейін қоғам талқысына шығарылды.