НОВОСТИ

Бұрынғы экология және табиғи ресурстар министрі Зүлфия Сүлейменова жаңа қызметке тағайындалды. Ол енді Президенттің кеңесшісі, деп хабарлайды Алатау телеарнасы. 

“Мемлекет басшысының өкімімен Зүлфия Болатқызы Сүлейменова Қазақстан Республикасы Президентінің кеңесшісі – Президенттің халықаралық экологиялық ынтымақтастық жөніндегі арнаулы өкілі лауазымына тағайындалды”, - делінген Ақорда ақпаратында. 

Айта кетейік, Зүлфия Сүлейменова Қазақстан Республикасының экология және табиғи ресурстар министрі қызметін атқарған болатын.

Ол 1990 жылы Ақтөбе қаласында дүниеге келген. Л. Гумилев атындағы Еуразия ұлттық университетін бітірген. Президенттік жастар кадрлық резервінің мүшесі.

Еңбек жолын 2014 жылы Жаһандық саясат және қауіпсіздік орталығының өңірлік және жаһандық қауіпсіздік бөлімінің ғылыми қызметкері болып бастады.

2020-2021 жылдары — Қазақстан Республикасының Экология, геология және табиғи ресурстар министрлігінде басшылық қызметтер атқарған.

2021 жылғы қаңтардан бастап осы уақытқа дейін VII сайланған ҚР Парламенті Мәжілісінің депутаты болды.

Мысырда ерекше Құран Кәрім табылды. Небәрі 2 сантиметр болатын шағын көшірменің тіпті 150 жылдық тарихы бар көрінеді, деп хабарлайды Алатау телеарнасы.

Бұл туралы Yeniakit басылымы жазды. Дерекке сүйенсек, қасиетті кітап Мысырдың Эль-Минуфие провинциясында анықталған. Тұрғын Абде Месуд бұл кітап көшірмесінің арғы аталарынан мұраға қалғанын айтып берген. 

"Осман империясының баспаханаларында басылған "Мушаф-и Шериф" жұқа және өте кішкентай қағазға кішкентай әріптермен жазылған. Месуд Құранды лупамен оқиды", - делінген ақпаратта.

Құран Кәрім көшірмесінің ерекшелігі оның өлшемінде. Яғни шағын ғана қасиетті кітап 2 сантиметр. 

Айта кетейік, бұған дейін Мемлекет басшысының БҰҰ мінберінде қасиетті кітапты өртеу әрекеттеріне байланысты пікір білдіргенін жазған едік.

Мемлекет басшысы Қасым-Жомарт Тоқаев БҰҰ Бас Ассамблеясы 78-сессиясының Жалпы дебатында Құранды өртеу әрекеттеріне байланысты пікір білдірді, деп хабарлайды Алатау телеарнасы. 

Бұл туралы Ақорда жазды. Онда Мемлекет басшысы БҰҰ Бас хатшы ұсынған “Бейбітшіліктің жаңа күн тәртібін” қолдайтынын, әрі бұл стратегиялық құжат әлемде белең алған сенімсіздік пен өшпенділікке қарсы тұруы керегіне тоқталды. Сонымен қатар жақында Еуропа мемлекеттерінде Құранды өртеу әрекеттерін де сөз етті. 

“Жуырда қасиетті кітаптарға құрметсіздік таныту актілері болды. Біз осы жағдайға алаңдаушылық білдіреміз. Исламға және басқа да діндерге қатысты жасалған мұндай тағылық әрекеттерден еркіндіктің, сөз бостандығының және демократияның нышаны білінбейді. Құран секілді қасиетті кітаптардың бәрі вандализмнен құқықтық тұрғыда қорғалуға тиіс”, - деді Президент. 

Тоқаев осы орайда келер жылы өтетін Болашақ саммитінде Қазақстан қолдаушы рөлін атқаратынын атап өтті.

“Қазақстан келесі жылы өтетін Болашақ саммитінде Болашақ пактісін қабылдау ісінде сындарлы және қолдаушы рөлін атқарады. Бірақ қару-жараққа тыйым салумен немесе декларацияға қол қоюмен ғана бейбітшілік орнамайды. Бейбітшілік мәдениетін қалыптастыруда дінаралық және конфессияаралық диалог маңызды рөл атқарады, - деді Мемлекет басшысы. 

Еске салайық, бұған дейін Данияда құран кітабы өртеліп, кейін билік қоғамдық орындарда діни мәтіндерді қорлауға тыйым салатын заң жобасын ұсынғанын жазған едік. 

Қарағанды облысы Шахтинск қаласына қарасты Шахан кентінде бірнеше көше атауы қазақшаланды, деп хабарлайды Алатау телеарнасы inbusiness.kz-ке сілтеме жасап. 

Атап айтқанда:

Добровольский көшесі – Кенесары Қасымұлы көшесіне;

Спортивная көшесі – Тұран көшесіне;

Суворов көшесі – Әділ Нұркенов көшесіне;

Свердлов көшесі – Гүлдер көшесіне;

Вишневая көшесі – Шиелі көшесіне;

Строителей және Строительная көшелері – Бауыржан Момышұлы көшесіне;

Старый Шахан, Совхозная, Центральная Абай көшелері – Мәнжі батыр көшесіне өзгертілді.

Тиісті шешім күшіне енді.

Сербияның Белград қаласында өтіп жатқан еркін күрестен әлем чемпионатында қазақ балуаны топ жарды. Ол 92 келі салмақ дәрежесінде қарсылас шақ келтірген жоқ, деп хабарлайды Алатау телеарнасы. 

Финалға дейін қазақстандық балуан үш қарсыласты жалпы 32:4 есебімен жеңді. Шешуші айқаста спортшы әзербайжандық Осман Нурмагомедовке есе жібергенімен, 5:2 есебімен жеңісті жұлып алды.

Жалпы 92 келі дәрежесіндегі жетістік бұрын-соңды ел тарихында болмаған. 

Мемлекет басшысы Қасым-Жомарт Тоқаев  та әлем чемпионы Ризабек Айтмұқанды жеңіске жетуімен құттықтады. 

"Еркін күрес шебері Ризабек Айтмұқанды Белградта өткен күрес түрлерінен әлем чемпионатында алтын медаль иеленуімен құттықтаймын! Ол қазақ балуандары арасында тұңғыш рет Әлем чемпионы атанды. Бұл – тарихи жетістік. Ризабек Айтмұқанның жарқын жеңісі жас буынның спортқа құлшынысын арттырады деп сенемін", – деді Президент.

Мемлекет басшысы Қасым-Жомарт Тоқаев астық өндіретін фермерлер мен шаруа қожалықтарына қаржылай және өзге де қажетті көмек көрсетуді тапсырды, деп хабарлайды Алатау телеарнасы. 

Бұл туралы Ақорда жазды. 

“Еліміздің солтүстік өңірлеріндегі ауа райының қолайсыздығы мен жайсыз жағдайларға байланысты Президент Қасым-Жомарт Тоқаев Үкіметке астық өндіретін фермерлер мен шаруа қожалықтарына қаржылай және өзге де қажетті көмек көрсетуді тапсырды”, - делінген ақпаратта. 

Айта кетейік, бұған дейін БАҚ беттерінде Солтүстік өңірдегі толассыз жауған жаңбыр алқаптағы астықты бүлдіріп, шаруаларды шарасыз күйде қалдырғаны жазылған еді.