ЖАҢАЛЫҚТАР

Алматы мен облыста биылғы көктем бірқалыпты жылы болады. Маусымның бірінші жартысында біресе жылы, біресе салқындау болып, жауын-шашынның мөлшері едәуір артады, деп хабарлайды Алатау телеарнасы. 

«Қазгидромет» РМК Алматы мен Алматы облысындағы бөлімшесінің метеорологиялық болжамдар бөлімінің басшысы Дәулет Кісебаев алдағы уақытқа осындай болжам ұсынды. Оның айтуынша, күн райы өтпелі маусымға тән сипатта болады. Наурыз айында өңір бойынша орташа ауа температурасы климаттық нормаға жуық, Алматы облысының солтүстік-батысында бір градусқа жоғары болады деп болжанып отыр. Сәуірде облыс аумағының басым бөлігінде температура нормадан бір градусқа жоғары болып, тау бөктері мен таулы аудандарда қалыпты шекте сақталады. Мамыр айында температуралық фон тұрақтанып, бүкіл облыс бойынша климаттық нормаға сәйкес болады.

"Көктемде жылда күн осылай құбылып тұрады. Биыл да солай болады. Күн жылып, қайта салқындап тұрады. Алайда аса бір күн қатты суып, қатты ысып кететіндей жағдай бола қоймайды. Бұл көктемге тән қалыпты жағдай, оған қалалық қызметтер жақсы дайындалған", – деді Дәулет Кісебаев Өңірлік коммуникациялар қызметіндегі көктемгі су тасқыны кезеңіне дайындыққа арналған баспасөз конференциясында.

Ол Алматы бойынша жеке болжам да ұсынды. Наурыз айында температура айтарлықтай ауытқуы мүмкін: айдың бірінші онкүндігінде түнгі температура −5…−10 градусқа дейін төмендеуі ықтимал, екінші онкүндікте күндіз +23 градусқа дейін жылынады, ай соңында аз уақытқа салқындауы мүмкін. Сәуір мен мамырда орташа ауа температурасы біртіндеп жоғарылайды. Наурыз бен сәуір айында Алматыда жауын-шашынның мөлшері әдеттегіден көп болады деген болжам бар. Наурызда климаттық норма 72 мм болса, әсіресе айдың бірінші және үшінші онкүндігінде жаңбыр мен қар аралас жауын-шашын жиі жауады. Сәуірде норма 112 мм болғанымен, жауын-шашын мөлшері көп болуы ықтимал. Мамырда жауын-шашын көлемі орташа көпжылдық көрсеткіштерге сәйкес, шамамен 99 мм деңгейінде болады.

"Сәуір мен мамыр Алматыда ең жаңбырлы ай саналады. Бұл уақытта жауын-шашынның көбеюі бір төтенше жағдай емес, өңірдің климаттық ерекшелігі сондай өзі. Біз болжамды кеңес беру сипатында жасап, жаңа деректерге қарай оны нақтылап отырамыз үнемі", - деді Дәулет Кісебаев.

Синоптиктердің бағалауынша, биылғы көктем Алматыда және Алматы облысында әдеттегідей қалыпты өтпек.

Италияның Милан және Кортина-д’Ампеццо қалаларында өтіп жатқан XXV қысқы Олимпиада ойындарының ерлер арасында мәнерлеп сырғанаудан жекелей бәсеке өз мәресіне жетті. Еркін бағдарламада қазақстандық Михаил Шайдоров жарыс жолына шығып, сәтті өнер көрсетті, деп хабарлайды Алатау телеарнасы. 

Отандасымыз «Confessa» және «The Diva Dance» әнін таңдады. Сонымен қатар, Михаил алғашқы техеикалық элементке үштік аксель, бір эйлер және төрттік сальхау жасап, сәтті орындап шықты. Қорытындысында, қазақстандық мәнерлеп сырғанаушы техникалық элементтер орындаудан 114.68 ұпай, ал бағдарлама компоненттерін орындауда 83.96 ұпай еншіледі. Осылайша, Михаил Шайдоров қысқа бағдарламадағы 92.94 ұпай және еркін бағдарламадағы 198.64 ұпайды қосқанда 291.58 ұпаймен бірінші орыннан көрініп, қысқы Олимпиада ойындарының алтын жүлдесін жеңіп алды. Жапондық Юма Кагияма және Сюн Сато үздік үштікті түйіндеді.

Өз кезегінде спортшы жеңіс жолының оңай болмағанын айтты.

"Маусым бойы өз-өзіммен күрестім. Жарыстарда бес бірдей төрттік секіруді шамамен үш рет орындап көруге тырыстым, бірақ бірде-бір рет сәтті шықпады. Ал бүгін бәрі сәтті орындалды. Сәті түсіп, қолымнан келді. Олимпиадаға ұзақ дайындалдым. Маусым бойы бар ойым — өз ісімді адал атқару болды. Енді еңбегімнің жемісін көріп отырмын. Бұл медальді Қазақстан халқына арнаймын. Қазақстанда мәнерлеп сырғанаудың дамығанын қалаймын. Менің медалім Денис Тен үшін де маңызды болар еді деп ойлаймын. Ол бізге жол ашты. Оның да жолы оңай болған жоқ, менікі де жеңіл болмады. Еліміздегі мәнерлеп сырғанау спортының дамуына қосқан үлесі үшін Дениске алғыс айтамын", — деді Олимпиада чемпионы.

Қазақстан өз тарихында мәнерлеп сырғанау спортынан екінші Олимпиада жүлдесін еншілеп отыр. Осыған дейін Денис Тен 2014 жылы Сочи Олимпиадасында қола медаль жеңіп алған еді.

Елімізде ауа сапасын жақсарту үшін көлік қозғалысына шектеу қойылуы мүмкін. Спутниктің жазуынша, бүгінде Қазақстанның 11 қаласында ауа тұрақты түрде ластанатыны белгілі болған, деп хабарлайды Алатау телеарнасы. 

Елімізде Мемлекет басшысы Қасым-Жомарт Тоқаев 2026 жылғы 15 наурызда республикалық референдум өткiзу туралы Жарлыққа қол қойды. Демек, өткізілетін референдум барысында жаңа Конституция қабылданған жағдайда 15 наурыз — Конституция күні болып бекітіледі, деп хабарлайды Алатау телеарнасы. 

Бұл туралы ҚазАқпарат жазды. Осылайша ел азаматтары мемлекеттік мерекені келесі жылдан бастап дәл осы датамен атап өтеді.

Сонымен қатар, жалпыхалықтық референдумға шығарылған жаңа Конституция жобасы қабылданған жағдайда Ата заңның нақты қашан күшіне енетіні анық жазылды. Жаңа Конституция жобасының «Қорытынды және өтпелі ережелер» деп аталатын соңғы бөлімінің 94-бабы 1-тармағына сәйкес, республикалық референдумда қабылданған Қазақстан Республикасының Конституциясы 2026 жылғы 1 шілдеден бастап күшіне енеді, бұған дейін қабылданған Қазақстан Республикасы Конституциясының қолданысы сол мезгілден бастап тоқтатылады.

Ал 2-тармақта республикалық референдумда Конституция қабылданған күн мемлекеттік мереке — Қазақстан Республикасының Конституциясы күні деп жарияланатыны нақты көрсетілген.

Алматыда 2026 жылы 30 желтоқсаннан бастап қатты және сұйық отынды пайдалануға тыйым енгізіледі. Бұл туралы қалалық Экология және қоршаған орта басқармасының өкілдері мәслихаттың 2025 жылы 30 желтоқсандағы шешімімен бекітілген Алматы қаласының атмосфералық ауаны қорғау қағидаларына сілтеме жасап хабарлады.

Аталған талаптар қаланың газдандырылған аумақтарына қатысты Қағидалардың 52-тармағында көзделген. Құжатқа сәйкес, газға қосылу мүмкіндігі бар жеке тұрғын үйлерде, моншаларда және көппәтерлі үйлерді жылытатын жекелеген қазандықтарда қатты және сұйық отынды пайдалануға тыйым салынады.

Төтенше жағдай кезінде жылу және энергиямен жабдықтаудың резервтік көздерін пайдалануға рұқсат етіледі.

Бұл талаптар жылыту қазандықтарын пайдаланатын шаруашылық субъектілеріне де қолданылады. Шығарындылар көздері ластаушы заттарды тазарту қондырғыларымен міндетті түрде жабдықталуы тиіс. Сонымен қатар, арнайы техника, бензин және дизель генераторлары да экологиялық талаптарға сәйкес болуы қажет.

Осылайша, шектеу тек моншаға ғана емес, газдандырылған аумақтарда орналасқан жеке тұрғын үйлерге де қатысты.

Айта кетейік, қазіргі таңда Алматыдағы жеке сектордың газдандыру деңгейі шамамен 99,6%. Бұл үй иелерінің басым бөлігінде табиғи газға қосылуға техникалық мүмкіндік бар екенін көрсетеді.

Елімізде зейнетақы жинағының шектік мөлшерін мерзімінен бұрын пайдалануда өзгерістер енгізілмек. Кемі шектік мөлшер 10 пайызға көтеріледі, деп хабарлайды Алатау телеарнасы.