НОВОСТИ

Елдегі су тасқыны салдарынан жарықсыз қалған үй мәселесіне Энергетика вице-министрі Сұңғат Есімханов тоқталды. Сөзіне сүйенсек,бірқатар өңірлерде мұндай жағдайға тап болғандар көп, деп хабарлайды Алатау телеарнасы. 

Вице-министр жалпы елде тасқын салдарынан неше үй жарықсыз отырғанына толығырақ тоқталды.

"Тасқын кезінде электр қуатынан проблема туындаған 6 өңір бар екенін білесіздер. Бүгінде Ақтөбе, Батыс Қазақстан облыстарында жалпы мәселе толық шешілді. Ол өңірлерде тек саябақтар мен ешкім тұрмайтын, тұрғындары көшірілген жерлердің жарығы сөніп тұр. Атырау облысының Құлсары қаласында 970 абонент электр қуатынан ажыратылған. Электр компаниясы халық үйлеріне қайтқаннан кейін жарықты қосуға дайын. Солтүстік Қазақстан облысында 4 мыңға жуық абонент төтенше жағдай саласындағы әріптестердің талабы бойынша ажыратылған. Тұрғындар қайтып келгеннен кейін олар да қосылады", — деді ол.

Сонымен қатар, ол кей үйлерге дизельді генератор арқылы жарық беріліп жатқанын да жасырған жоқ.

"Қостанай облысының Жангелді ауданында 651 абонентте жарық сөніп тұр. Оның екі себебі бар. Біріншіден, бағаналарды жөндейін десек, жол жоқ. Екіншіден, халықтың кейбірі үйлеріне қайтпаған. Бірақ ол үйлерге электр желісіне жауапты компания мен жергілікті әкімдік дизельді генератор арқылы жарықпен қамтамасыз етіп отыр. Солтүстік Қазақстан облысында да сондай. Су кетіп, электрді қосуға мүмкіндік болса, тез жалғаймыз. Ал бағаналарды жөндеу керек болса, әрине, 2-3 күннің ішінде қосуға мүмкіндік бар. Бірақ әлі су қайтпаған жерлер бар. Оның бәрін күнделікті бақылауда ұстап отырмыз", — деп қорытындылады сөзін Сұңғат Есімханов.

Еліміздегі сауда орталықтары үшін жаңа ереже енгізілмек. Мәселе сенат қабырғасында талқыланды, деп хабарлайды Алатау телеарнасы. 

Енді Қазақстанның сауда орталықтары келушілерді сапалы Wi-Fi желісімен қамтамасыз етуі тиіс. Бұл туралы 2 мамырда цифрлық даму, инновациялар және аэроғарыш өнеркәсібі вице-министрі Асхат Оразбек мәлімдеді. Сөзіне сүйенсек, ол сауда орталықтары мен тамақтану орындарында нашар Wi-Fi жұмысына тап болған.

"Мен, сіздер сияқты, байланыс мәселелерімен бетпе-бет келемін, әсіресе қоғамдық тамақтану орындары мен ірі СОО-да Wi-Fi желілері сапасыз салынған. Біздің келесі қадамымыз осы бағытта болады деп ойлаймын. Заң жобасы аясында біз ірі бизнес-орталықтарды Wi-Fi желісімен қамтамасыз етуге міндеттейтін боламыз. Біз бұл сапаны бақылауда ұстаймыз. Менің ойымша, барлығына сауда орталығында немесе кафеде, сапалы интернетке ие болу ыңғайлы болады",-деп түсіндірді цифрлық даму, инновациялар және аэроғарыш өнеркәсібі вице-министрі Асхат Оразбек Сенат отырысында.

Елімізде 2023 жылы қанша бала дүниеге келгені жарияланды. Мұндай мәліметті Ұлттық статистика бюросы жазды, деп хабарлайды Алатау телеарнасы. 

Бюро дерегіне сүйенсек, 12 айда Қазақстанда 388,4 мың бала дүниеге келген (2022 жылы 403,8 мың бала). Оның ішінде 51,6%-ы ұл бала, 48,4%-ы қыз бала. 

Бұл ретте сәби босанғандардың 29%-ы 25-29 жас аралығындағы аналар, тағы 26%-ы 30-34 жастағы әйелдер.

"2023 жылы бала босанған ананың орташа жасы 29,7 жасты құрады", - дейді статистика мамандары.

Соңғы бір жылда Қазақстанда 4075 егіз (2022 жылы 4063), 48 үшем (бұрынғы жылы 50) және бір төртем дүниеге келген.

Алматыда 24-28 сәуір аралығында толассыз жаңбыр жауады деп күтілуде. Бұл туралы қалалық әкімдіктің баспасөз қызметі жазды, деп хабарлайды Алатау телеарнасы. 

Жергілікті билік дерегіне сүйенсек, жауын-шашын кезінде мотопомпа, шанц құралдарымен жабдықталған 52 жедел мобильді бригаданың кезекшілікке шығады, 2,5 мың қап құм дайындалған. Әрі күндіз жауын-шашын кезінде барлығы 465 бірлік арнайы техника, 28 мотопомпа және 810 жұмысшы, ал түнгі уақытта 236 бірлік арнайы техника және 215 жұмысшы жұмылдырылады. 

Судың кедергісіз ағып кетуін қамтамасыз етіп, су басудың алдын алу үшін 320 жұмысшы мен 92 бірлік арнайы техника арық желілерін, арық өткелдерін тазалау бойынша жоспарлы жұмыс жүргізеді. Күн сайын арықтан 250 м3 лай және кездейсоқ қоқыс шығарылады. 

Ауа-райының бұзылуына байланысты жүргізушілерге ағаштардың құлау қаупі мен электр желілерінің үзілуіне байланысты автомобильдерді жол жиектеріне қоюға кеңес берілмейді. Сондай-ақ, әкімдік қала тұрғындары мен қонақтарына тауға бармауға, су тасқынының алдын алу үшін тұрғындардан арық пен каналды қоқысқа толтырып, бітеп тастамауға шақыруда.

Елімізде былтыр 100-ге жуық келіншек 50 жастан асқанда сәбилі болған. Мәліметті Ұлттық статистика бюросы жариялады, деп хабарлайды Алатау телеарнасы. 

Бюро дерегіне сүйенсек, жалпы Қазақстанда дүниеге бала әкелетін ананың орташа жасы — 29,7. Бала туудың негізгі үлесі 25-29 аралығындағы әйелдерге тиесілі екен. Яғни 29%, 30-34 жас аралығындағыларда — 26%.

20 жасқа дейінгі әйелдер өткен жылы 12,6 мың бала, 50 жастан асқандар 96 баланы дүниеге әкелген. Бұл ретте ананың орташа жасы 2023 жылы 29,7 жасты құрады.

Дүниеге келгендердің 23% — отбасындағы екінші бала. Ал отбасында сегізінші бала болып туылғандардың саны 1 мыңнан астам. Егіз саны — 4 075.

Үшем — 48 (2022 жылы — 50), төртем — 1.

Елімізде мамыр айында жауын-шашын мөлшері шамадан көп жауады деген болжам бар. Мұндай мәліметті Казгидромет мамандары ұсынды, деп хабарлайды Алатау телеарнасы. 

“Қазгидромет” РМК мамыр айына арналған консультативтік ауа райы болжамын ұсынды.

«Бір ай бойы ауа райы тұрақсыз болады, жаңбыр жауып, найзағай ойнайды, екпінді жел соғады, кей жерлерде бұршақ түседі. Бірнеше күн жоғары температуралық фон сақталады деп болжанып отыр. Республиканың солтүстік бөлігінде күндіз ауа температурасы +35°C дейін, оңтүстік бөлігінде +40°C дейін ыстық болады", - делінген ақпаратта.

Суық толқындарда ауа температурасы төмендейді. Солтүстік, шығыс және орталық аймақтарда, сондай-ақ елдің оңтүстік-шығысындағы таулы аудандарда түнде -5 градусқа дейін, күндіз +15°C дейін, батыста және ҚР оңтүстік бөлігінде - түнде +5 градусқа дейін, күндіз +26°C дейін болжанып отыр.

"Мамыр айында ауа температурасы республиканың басым бөлігінде нормадан 1-2° жоғары болады деп болжанып отыр. Онда жауын-шашын мөлшері еліміздің батысында, оңтүстік, орталық өңірлерінде шамадан көп болады", – деді Қазгидромет баспасөз хатшысы.