НОВОСТИ

Елімізде құрбан айт қарсаңында онлайн платформа іске қосылды. Сайт онлайн құрбан шалу рәсімін өткізуге мүмкіндік береді, деп хабарлайды Алатау телеарнасы. 

Бұл туралы alataunews.kz сайты жазды. Онда дерекке сүйенсек, qurban2024.kz сайтын Қазақстан мұсылмандары діни басқармасы іске қосқан. 

Сайт қызметін Төралқа мәжілісінде ҚМДБ Цифрлық даму бөлімінің меңгерушісі Тимур Серікханұлы таныстырды. 

"Мұсылман қауымының қасиетті айт мерекесіне орай барша қазақ елін Құрбан айт күні жүзеге асатын қайырымдылық акциясына үлес қосуға шақырамыз. Халыққа, әсіресе үлкен қалаларда тұратын жамағатқа оңтайлы болу үшін биыл да құрбан шалу офлайн және онлайн форматта жүзеге асады", - деді ол. 

Айта кетейік, онлайн түрде құрбан шалам деушілер сайт арқылы құрбандық малын таңдап, Kaspi QR арқылы қажетті қаражатты аудара алады. Қой мен ешкіні жеке адам, ал ірі қара мен түйе малын бір немесе 7 адам бірігіп шалса болады. Тапсырыс сәтті өтсе ұялы телефоныңызға смс хабарлама келеді. Құрбандық шалынған соң оның фото және бейне есебі тапсырыс беруші көрсеткен нөмірге жіберілмек.

Алматы облысында Alatau Hub ашылмақ. Бұл өңірдегі IT-индустрияны дамытудың жаңа кезеңіне серпін береді, деп хабарлайды Алатау телеарнасы. 

Alatau Hub-тың ашылатыны туралы Цифрлық даму, инновациялар және аэроғарыш өнеркәсібі министрі Жаслан Мәдиев Алатау қаласының тұрғындарымен кездесу барысында айтты. Сөзінше жақын арада хабта ойын әзірлеу және дизайн негіздері бойынша білім беру курстарын өткізу жоспарда. Сондай-ақ компьютерлік сауаттылық, цифрлық маркетинг және электрондық коммерция бойынша арнайы курстардың бірлескен бағдарламасын іске қосу көзделген.

Осы ретте "Азаматтарға арналған үкімет" мемлекеттік корпорациясы" КЕАҚ басқарма төрағасы Арман Кенжеғалиев жаңа қала тұрғындарына мемлекеттік қызмет көрсету саласы мен корпорацияның қызметі туралы айтып берді.

Қазір Алматы облысында 11 ХҚКО жұмыс істейді, оның ішінде 1 арнайы ХҚКО, 42 өзіне-өзі қызмет көрсету секторы және 32 Мемлекеттік корпорацияның БЭК-офисі бар. Айта кетейік, 2023 жылы «Азаматтарға арналған үкімет» филиалының қызметкерлері 798 мыңнан астам мемлекеттік қызмет көрсетсе, ағымдағы жылдың 4 айында 295 мыңға жуық мемлекеттік қызмет көрсеткен.

"Бүгінгі таңда Алатау қаласы халқының қажеттіліктерін Қазпошта бөлімшесі ішінара жабады, онда 27 қызмет түрі көрсетіледі. Халыққа қолайлы жағдай жасау мақсатында әкімдікпен бірлесіп Алатау қаласында ХҚКО бөлімшесін ашу мәселесі пысықталды, онда азаматтар мемлекеттік қызметтердің барлық түрлерін ала алады", — деді Арман Кенжеғалиев.

Сонымен қатар, кездесуде телекоммуникация комитетінің төрағасы Ержан Мейрамов ұялы байланыс пен интернетті дамыту жоспарларымен де бөлісті. Облыста 384 елді мекен бар, оның ішінде 319 ауыл 4G-ге қосылған.

"Министрлік Алматы облысының әкімдігімен және ұялы байланыс операторларымен бірлесіп 2023-2027 жылдарға арналған байланыс және мобильді интернет сапасын жақсарту бойынша Жол картасын әзірлеп, қол қойды. Сондай — ақ, шекаралас 52 ауылда ұялы байланыс пен Интернеттің сапасын жақсартуға ниетті", — дейді Ержан Мейрамов.

БҰҰ бас хатшысы дабыл қақты. Сөзінше, әлемде жаһандық жылыну аяқталып, енді жаһандық қайнау басталған, деп хабарлайды Алатау телеарнасы. 

Гутерриштің дерегіне сүйенсек, Мексикада ауа температурасының бірден ысуынан 60-тан аса адам жапа шегіпті. Ал Үндістанда аптап ыстықтан 200 адам көз жұмған. 

Қазақстанда да синоптиктер алдағы күндері күн ыситынын хабарлауда. Тіпті бүгін елдің бірнеше өңірінде ауа температурасы 40 градусқа дейін көтерілуі мүмкін екенін болжаған. 

Маңғыстау облысының басым бөлігінде 40 градус қатты ыстық сақталса, Қарағанды, Атырау облыстарында ауа температурасы 37 градусқа көтеріледі. Сонымен қатар БҚО, Қызылорда өңірлерінде де күн ыстық болмақ.

Ішкі істер министрлігінің ресми ақпаратына сүйенсек, 2024 жылдың 4 айында тұрмыстық зорлық-зомбылық фактілері бойынша 28 189 шағым түскен, ал былтыр бұл көрсеткіш 35 202 болған, деп хабарлайды Алатау телеарнасы. 

Зорлық көрсеткен 44,4 мың адам әкімшілік жауапкершілікке тартылып, оның ішінде 11 026 мың адам қамауға алынған. 

“Өткен жылы жәбір көрушілердің арызданудан бас тартуына байланысты 60%-дан астам құқық бұзушы жазадан жалтарса, биыл тіркелген фактілер бойына айыптылардың 98%-на шара қабылданды”, - делінген Ішкі істер министрлігінің Kazinform агенттігі жолдаған ресми сауал жауабында.

Одан бөлек, полиция қызметкерлері «агрессорларға» қатысты 34 мың қорғау нұсқамасын шығарған. Сонымен қатар сот Ішкі істер органдарының өтінішхаты бойынша құқық бұзушылардың мінез-құлқына 4 мыңнан астам ерекше талаптар белгілеген.

Еліміз туристік бағыттар тізімінде 119 ел арасынан 52-ші орынға ие болды. Мұндай жетістік Бурабайда өткен кездесуде айтылды, деп хабарлайды Алатау телеарнасы.

Туризм саласындағы жаңа бастамалар туралы Бурабай ауданындағы «Discovery Borovoe» қонақ үйінде ҚР Туризм және спорт министрі Ермек Маржықпаев Ақмола облысының бизнес-қоғамдастығымен кездесу барысында айтты. Сөзінше жуырда Дүниежүзілік экономикалық форумның Саяхат және туризмді дамыту бойынша рейтингісі жарияланған. Онда Қазақстан 119 ел арасынан 52 орынға ие болып отыр.  

“Қазақстан Әзербайжан (56), Өзбекстан (78), Қырғызстан (102) сияқты елдерді басып озып, Орталық Азиядағы ең жоғары көрсеткішке ие болды”, — делінген ақпаратта.

Футболдан Қазақстан Ұлттық құрамасын енді ресейлік маман басқарады. Бас бапкерлік қызметке Станислав Черчесов келді, деп хабарлайды Алатау телеарнасы. 

Бұл туралы Қазақстан футбол федерациясы ресми түрде хабарлады. Станислав Черчесов футболшы мансабында Ресейдің «Спартак» (Орджоникидзе), «Спартак» (Мәскеу), «Локомотив» (Мәскеу) және Германияның «Динамо» (Дрезден) клубтарында ойнаған. 

Ресейдің «Спартак» (Мәскеу), «Жемчужина», «Терек», «Амкар», «Динамо» (Мәскеу) сынды командаларда еңбек етті. Сондай-ақ ол Ресей құрамасы, Польшаның «Легия», Венгрияның «Ференцварош» командаларында бас бапкер болды.

Бапкерлік мансабында Ресей чемпионатының күміс жүлдегері атанса, Польша чемпионы, Польша кубогының жеңімпазы атанды. Оған Венгрияның екі мәрте чемпионы және кубогының иегері болды. Ресей құрамасымен 2018 жылғы әлем чемпионатының 1/4 финалына дейін жетті.

Айта кетейік, бұған дейін ұлттық құраманы Магомед Адиев басқарған еді. Ол 2022 жылдың 27 сәуірінен осы күнге дейін 22 ойынның 11-інде жеңіске жетіп, 1-де тең ойнаса, қалғанында қарсыластарға есе жіберді.

Қазақстан құрамасы енді 7 мамырда Армения, 10 маусымда Әзрбайжан құрамаларымен жолдастық кездесу өткізеді.