https://www.youtube.com/embed/Lc0LY_wo72c?si=46WiMYm23pX6TQn1"

Ақтауда спорт үйірмелеріне баратын балалардың ата-аналары бас көтерді. Себебі оларға жас жеткіншектер мен бапкерлерді басқа спорт залдарға көшіру туралы нақтыланбаған ақпарат жеткен. Бауыр еті балалары үшін алаңдаған жұрт спорт басқармасы ғимараты алдына жиналып, айтылған өзгеріске қарсылықтарын білдірді.

Басқарма маңына жиналған жұрт спорт басқармасының аяқ астынан балалар мен бапкерлерді басқа спорт мектептеріне ауыстырамыз деп ұйғарған шешіміне қарсымыз деп отыр. Біріншіден қаланың бір шетінен екінші басына қатынау балалар үшін қиын, екіншіден бапкерлері мен спорт залының ауысқанын қаламайды. Бұл өзгеріс балаларға соққы болады және спортпен шұғылдануға ниеті жоғалады, - дейді шағымданушылар.

ДУЛАТ МЫРЗАБАЙҰЛЫ АТА-АНА: «Жас спортшылардың ата-аналары арасында дүрбелең туып жатыр. Себебі спорт мектептеріндегі секцияларын бәрін бір жерге топтастырамыз дейді. Ол апару бізге қиын түседі. Үйреніп қалған тренерлері бар өзінің. Баяғыдан бері результат көрсетіп жатыр. Мысалы менің қызым 5 жасынан қатысады. Республикалық, халықаралық чемпионы және жүлдегері. Дзюдодан спорт шеберіне үміткер. Енді ол қалай болады? Ол барғысы келмейді басқа спорт мектепке. Өзінің апайымын қалғысы келеді».

КАМИЛА АХМЕТОВА – АТА-АНА «Енді оған менің қарсы себебім, ең бастысы менің балам Маңғыстау аренаға бару үшін автобусқа мініп, 3 остоновкадан түсе қояды. Волна ол 12 остоновка, біріншіден. Екіншіден Волнаның залы өте кішкентай. Сосын бәсекелестік жоғалады. Одан менің 6 жасар қызымда барады. Ертең оны тасымалдау қиын болады.Балам айтады «мен бапкерімсіз бармаймын» дейді.Жүлделі орын алып отырған баланың бағын енді жанайын деп тұрған жерінен сөнейін деп тұр».

Бұл өзгеріске тек ата-аналар мен спортшы балалар емес, бапкерлер де қарсылықтарын білдірді. Әй-шәйі жоқ, басшылық келді де ауысасыңдар деген ауызша ескерту берді, - дейді.

СҮНДЕТХАН БАЙМАҒАМБЕТ ҚАЗАҚ КҮРЕСІ СПОРТЫНЫҢ БАПКЕРІ: «Ешқандай қаулы, приказ көрсеткен жоқ, ауызбен айтты болды ауысасыңдар деп бізді еріксіз түрде ауыстырып жатыр.Баршамыз қарсымыз. Біз өзіміздің спорт мектептерімізде қалуды талап етеміз.Балаларға да қиын, ата-аналарға да қиын. Бізге де үйреніп қалған спорт школымызға еңбек терімізді төккен жерден басқа жерге, бөтен жерге бару қиынға соғады».

Басқарма басшысы көпшілік алдына кездесуге шығып, мән жайды түсіндірді. Екі ай бұрын басқарма басшысы қызметіне тағайындалған Мақсат Мұқаш, Маңғыстаудағы спорт саласы ақсап, жетістіктер жылдан-жылға төмендеп бара жатқанын алға тартты. Мәселен «Теннис» орталығында теннистен бөлек басқа спорт түрлерінен үйірме ашылған. Ал сол мектепке бөлінген қаржы спорт мектебінің дамытуы тиіс спорт түріне емес, бүйірден қосалқы болып кірген спорт түріне де бөлініп кетіп тұр екен. Реформа қажет, бапкерлерді аттестациялаудан өткізу керек, балалар мен бапкерлерді мамандандырылған спорт мектебіне тіркейміз, - деді басқарма басшысы.

МАҚСАТ МҰҚАШ СПОРТ БАСҚАРМАСЫНЫҢ БАСШЫСЫ:«Спорт мектебіне бөлінген қаржының көп бөлігін сол спорт мектебінің дамытуы тиіс спорт түріне емес, басқа қосымша қосылған түріне қарай ығысып кетуі.Бізде қазақша күрес пен дзюдодан мамандандырылған спорт мектебі бар. Бұл тренерлердің барлығын сондай жекелеген спорт мектептеріне көшіргіміз келеді. Себебі ол біздегі өңірдегі конкуренцияны қалыптастырады. Екінші жағынан тренерлердің жалақысы балалар спорт жасөспірімдер спорт мектебіне қарағанда, мамандандырылған балалар жасөспірім мектебінің жалақысы 40% ға жоғары, мүмкіндігі де, әлеуеті де көп. Сондықтан біз сондай бір қатар өзгерістерге барып жатырмыз».

Ал ата-аналарға алаңдайтын еш негіз жоқ, - дейді Мақсат Мұқаш. Балалар мен бапкерлерді тек спорт түріне байланысты мектептерге тіркейді екен. Ал жаттығу жасайтын зал өзгермейді. Бұл өңірдің спорт жүйесіне осындай реформа жасаймын деген басшының көпшілік алдындағы уәдесі.

https://www.youtube.com/embed/LiCArRu3tcE?si=so-yNYTcVWxhb8Ni" 

Алматыда ер адам туған екі ұлын өлтірді деген күдікке ілінді. Куәгерлердің айтуынша, оқиға бейсенбі күні жалдамалы пәтерлердің бірінде болған. Әжелерінің қарауында болған балаларды әкесі ауруханаға апарамын деп алып кеткен екен. Балалардың үлкені 5-ші сыныпта, ал кішісі 2-ші сыныпта оқыған. Алматы қалалық Полиция департаменті аталған дерекке қатысты қылмыстық іс қозғалғанын мәлім етті.

САЛТАНАТ ӘЗІРБЕК АЛМАТЫ ҚАЛАЛЫҚ ПОЛИЦИЯ ДЕПАРТАМЕНТІНІҢ РЕСМИ ӨКІЛІ: «Алмалы аудандық полиция басқармасы ҚР Қылмыстық кодексінің 99-бабы 3-бөлігі бойынша қылмыстық іс қозғады. Сараптама тағайындалды. Жағдайлар анықталып жытыр».

https://www.youtube.com/embed/-G8QPYLsHVk?si=5fxh0xpx6LwMfgTz" 

Мыңдаған қазақстандықтарды құмар ойынға тартқан «1WIN» (уанфин) казиносының ұйымдастырушыларына іздеу жарияланды. Іздеу жұмыстары халықаралық деңгейде жүреді. Қазақстан, ТМД және алыс шет ел аумағында онлайн-казиносының заңсыз қызметіне қатысты Қаржы мониторинг агенттігінің Алматы облысы бойынша департаменті сотқа дейінгі тергеуді бастады. Аталған казиноның жалпы айналымы былтыр 4 млрд теңгені құраған. Бұл ұйым тіпті кәмелетке толмағандарға да құмар ойынға қатысуына рұқсат беріп келген.

ӘЛІБЕК ӘБДІЛОВ ҚР ҚАРЖЫ МОНИТОРИНГ АГЕНТТІГІНІҢ РЕСМИ ӨКІЛІ: «Тергеу жалғасуда, онлайн-казино сайты бұғатталды, төрт ұйымдастырушы халықаралық іздеуге жарияланды. Тәркіленуге жататын мүлікке және жалпы сомасы 1,5 млрд теңге ақшалай қаражатқа тыйым салынды, сондай-ақ «Mercedes-Maybach S500» және «Lamborghini Huracan» автокөліктері тәркіленді. ҚР ҚПК-нің 201-бабына сәйкес өзге де ақпарат жария етілуге жатпайды. Қаржылық мониторинг агенттігі Қазақстан Республикасының заңнамасына сәйкес елде онлайн-казино қызметіне тыйым салынғанын, ал букмекерлік қызметтер тиісті лицензия болған жағдайда ғана көрсетілетінін ескертеді. Сондай-ақ Агенттіктің «АФМ Insider» телеграм-ботына экономикалық құқық бұзушылық фактілері туралы хабарлауыңызға болатынын естеріңізге саламыз».

https://www.youtube.com/embed/_D-nx77G_W4?si=raKh3B-kxmBCak4F" 

https://www.youtube.com/embed/swPg11h5UhE?si=kusOOyEYtiMZO0tr" 

Талдықорғанда қарашадан бері мектепке бармай, із-түзсіз кеткен 14 жасар қыз әлі табылған жоқ. Полиция осыған байланысты күдікті ретінде қыздың туған анасы мен оның өгей әкесін ұсталып, қамауға алды.Ведомство қандай баппен іс қозғалғанын, күдіктілер қызды өлтірді ме, әлде басқа қылмыс жасады ма — ол жағын нақтылаған жоқ. Айта кетейік, мұның алдында қыздың өгей әкесі видео түсіріп, полиция әйелін ұстап әкетіп, ұрып-соққанын, рұқсат етілмеген тергеу әдістерін қолданғанын айтқан еді. Полиция күдіктілерге заңсыз тергеу әдістері жасалмағанын хабарлады.

РУСЛАН ЧАРАПИЕВ ЖЕТІСУ ОБЛЫСТЫҚ ПОЛИЦИЯ ДЕПАРТАМЕНТІ БАСТЫҒЫНЫҢ ОРЫНБАСАРЫ «Алғашқы күннен бастап адвокаттарға тергеу амалдарына қатысуға мүмкіндік берілген. Іс Ішкі істер министрлігінің ерекше бақылауында».

Еске сала кетейік, 28 желтоқсанда Талдықорған қаласының полиция бөліміне бір мектептің басшылығынан бірнеше ай бойы сабаққа келмеген 14 жасар оқушы туралы шағым түскен.

https://www.youtube.com/embed/mgFt9IfGB5k?si=Ul_XttSdXhyC7FR5" 

Сенат Спикері Мәулен Әшімбаевтың төрағалығымен Палата Бюросының отырысы өтті. Онда депутаттар 11 қаңтар күні өтетін Сенат отырысының күн тәртібін бекітті және сенаторлардың өңірлерге сапарын қорытындылады.Мәулен Әшімбаев ауылдар мен аудандардың тұрғындары көтерген мәселелер Палатаның алдағы жұмысында баса назарға алынуы керектігін айтты.

МӘУЛЕН ӘШІМБАЕВ ҚР ПАРЛАМЕНТІ СЕНАТЫНЫҢ ТӨРАҒАСЫ: «Жаңа жылдың алғашқы күндерінде өңірлерге барып, жұртшылықпен кездесулер өткіздік. Соның барысында халықты алаңдатып отырған өзекті проблемаларға назар аударып, тұрғындармен бірге талқыладық. Енді сенаторлардан маңызды мәселелер бойынша депутаттық сауалдар күтеміз. Сондай-ақ аталған түйткілдер Парламенттік тыңдаулар мен Үкімет сағаттарын өткізу кезінде де ескерілуге тиіс. Азаматтар көтерген проблемалар сенаторлардың ұдайы назарында болады. Біз оларды оң шешу бағытында нақты жұмыс жүргізуіміз керек».

Мәулен Әшімбаев отырыс барысында Мемлекет басшысының «Egemen Qazaqstan» газетіне берген сұхбатында белгіленген маңызды міндеттерге де тоқталып өтті. Палата Спикері ел Президентінің тікелей тапсырмасымен Бюджет және Салық кодекстерінің жобалары әзірленіп жатқанын айтып, сенаторларды аталған заңдардың Сенатқа келуін күтпестен, тиісті жұмысты бастай беруге шақырды. Сондай-ақ ол ортақ мақсатқа қол жеткізу үшін барша қазақстандықтың жұдырықтай жұмылып әрекет етуі аса маңызды екенін тілге тиек етті.

https://www.youtube.com/embed/QRjHtCUzfE0?si=MDOHY-y2dhJGFDmF" 

Елімізде адам денсаулығына қасақана жеңіл зиян келтіруді және ұрып-соғуды қылмыстық жауапкершілікке тарту жоспарланып отыр. Бұл туралы ІІМ әкімшілік полиция комитеті төрағасының орынбасары Ренат Зұлхайыров айтты.

РЕНАТ ЗҰЛХАЙЫРОВ ІІМ ӘКІМШІЛІК ПОЛИЦИЯ КОМИТЕТІ ТӨРАҒАСЫНЫҢ ОРЫНБАСАРЫ «Құқық бұзушының мінез-құлқына, өз-өзін ұстауына талаптар қойылып, қажет жағдайда әлеуметтік бейімделу орталықтарына жіберу қарастырылып жатыр. Сондай-ақ күш көрсетушінің психокоррекциялық курстардан өтуі қарастырылған. Жоғарыда аталған талаптар қылмыстық кодекс шеңберінде белгіленеді».

https://www.youtube.com/embed/dpjAjIRXoFk?si=HkGFi0RzBuU-1Afz" 

Оралда жарылыс болған дәмхана ғимаратын жалға алған кәсіпкер қамауға алынды. Дәмханадағы жарылыстың себебіне қатысты ақпарат беру мақсатында қалалық сәулет және қала құрылысы бөліми, «ҚазТрансГазАймақ» АҚ апаттық-диспетчерлік қызметі, БҚО ТЖД басшыларыны ң қатысуймен баспасөз брифингі өтті. Кездесуде тілшілердің бирқатар сауалдары демхана иесине қатысты болды.

Жиынның басты мақсаты-жарылыс орнында болған оқиғаның себебі жөнінде ақпарат беру. Естеріңізге сала кетейік, 4 қаңтар күні сағат 02:07 шамасында «Ел ырысы» базары маңында орналасхан «RIZYQ» демханасындағы жойқын жарылыс пен 25 метрді шарпығын өрт салдарынан 3 адам қа за тауып, 6 адам жарақат алған болатын. Салдарынан көршілес тұрғын үйге де залал келген еді.

Нысандар арасындағы қашықтық үш метр екен. Бірінші дәмхана ашылып, артынша нысанға тым тайу жерден тұрғын үй бой көтерген.

МҰРАТБЕК ТӘШЕНБАЕВ ОРАЛ ҚАЛАЛЫҚ СӘУЛЕТ ЖӘНЕ ҚАЛА ҚҰРЫЛЫСЫ БӨЛІМИНІҢ БАСШЫСЫ

Батыс Қазақстан облысының төтенше жағдайлар департаменті өкілінің айтуынша, тілсіз жау газовые баллоның жарылуынан туындаған. Бүгінде зертханалық зерттеулер жүргізілуде, тергеушилер мен анықтаушылар жұмыс істеп жатыр. Ғимараттың алдымен оң жақ қабырғасы, сосын төбеси, кейин екінші қбаты түгел опырылып ортасына түскен. Тергеу нәтижесі туралы кейинірек хабарлаймыз», - деді мамандар.

Оқиға орнында қаза тапқандар мен ауруханаға жеткізілгендерге қатысты мәліметтер айқындалды. Жарылыс салдарынан көз жұмғандар: Маргарита Мұхамбетжанова- 19 жастағы студентка, дәмханада даяшы болып жасаған. Ерхан Тоқпаев- 20 жастағы студент, снабженец дәмханаға тамақтануға келген. Үшінші қаза тапқан адам - ​​Руслан Қаржаубаев, 32 года. Көлик жөндеумен айналысып, кейин дәмханаға тамақтануға тоқтаған. Ониң артында әйелі мен ұл-қызы қалды. Русланмен бірге келген досы Бегайдар Аткешев жарылыс орнынан құтқарылып, бүгинде ауруханада жатыр. Бұдан бөлек тағы 4 адам жансақтау бөлиминде. Олардың екеуі -Айгерим Қасымқызы мен Алязи Сагиденова. Олардың еміне халықтың көмегімен қажетті қаражат жиналып, Самара қаласы дерігерлерінің қолына тапсырылды. Ал екеуи Өзбекстан азаматтары. Бірі-аспаз, бірі-кәуап писіруши болып қызмет атқарған. Осы дәмхананы жалға алған кәсіпкер қамауға алынды. Бұл туралы облыстық прокуратураның баспасөз қызметі хабарлады. Күдіктіге «Екі және одан да көп адамның өліміне әкеп соқтырған өрт қауіпсиздігі ережелерін бұзды» деген айып тағылып, сотқа дейінгі тергеу басталды. Кәсіпкер уақытша ұстау изоляторында отыр.

https://www.youtube.com/embed/G3PnSGtO2vw?si=ibMGLga2BghhY_fz" 

Мексикада шамамен 4000 адамнан тұратын үлкен керуен бөлінді. Көшіп-қонушылар АҚШ-тың оңтүстік шекарасына қарай үлкен топпен жаяу жүріп, ол жаққа көшіп, жаңа өмірді бастауға үміттенді.

Босқындарға транзитке арнайы рұқсатсыз көлікпен баруға болмайды. Бірақ Мексика үкіметі оларға осындай анықтама беруге уәде берді. Содан кейін олар адамдардың құжаттарын өңдеу үшін бірнеше көші-қон орталықтарына бөлінуі керек екенін айтқан. Кейбір мигранттар мұны биліктің қулығы деп санайды.

ГОНДУРАСТАН КЕЛГЕН БОСҚЫН: "Бұл босқындар керуенін жоюдың жолы деп ойлаймын, себебі ол өте үлкен болды. Олар оны бөлді. Мысалы, ер адамды отбасынан бөліп алып, жалғыз алып келді. Сондай-ақ жүкті әйелдер мен балаларды бір жерге апаратындарын айтты, бірақ ол өтірік сияқты".

ГОНДУРАСТАН КЕЛГЕН БОСҚЫН: "Біздің ойымызша олар көшіп-қонушылар тобын бөліп тастамақшы. Бәлкім, бұны керуенді тарқату үшін жасаған болар. Ешкім бізге нақты түсіндірмейді".

32 босқын босатылған соң керуен таратылды. Оларды Тамаулипас штатындағы автобустан белгісіз содырлар ұрлап кеткен. Арасында негізінен Латын Америкасынан келген мигранттар болды. Автобус Техас штатына бара жатқан. Баспана сұраушылар мен құқық қорғаушылар бірнеше айдан бері түрлі қылмыстық топтар ықпал ету салалары үшін күресіп жатқан Тамаулипас маңындағы адамдарды ұрлау дағдарысы күшейіп бара жатқандығын ескертіп келеді. Ал Нью-Йорк 17 автобус компаниясын штаттың заңын бұзған деп айыптап, сотқа шағым түсірді. Бұл тасымалдаушылар штатқа Техастан 33 мыңнан астам мигрантты жеткізген. Бұл науқанды шекарадан заңсыз өтетін адамдарды өз аумағынан шығарып жіберу үшін республикалық штат губернаторы ұйымдастырды. Ол Байден әкімшілігін көші-қон заңдарын әлсіреткені үшін айыптайды.

https://www.youtube.com/embed/u0ML6F2bwFs?si=KClkupV4zPxYTNzG" 

4 қаңтарда Мәскеуде 27 градус аяз тіркелді. Бұл соңғы 74 жылдағы ең төменгі температура. Синоптиктердің мәліметінше, қазір Ресейдің астанасында әдеттегіден 13-15 градус суық.

АННА – МӘСКЕУ ТҰРҒЫНЫ: "Мұндай аязды көптен бері көрмеген шығармыз. Ештеңе жоқ. Біз қыста да, мамырда да жауын-шашынға үйреніп кеттік. Сондықтан бәрі жақсы ".

Мәскеуліктерді суық қорқытпайды, бірақ кейбір туристер үшін мұндай ауа райы күтпеген жағдай болды.

АННА – МӘСКЕУ ТҰРҒЫНЫ: "Суық болсада, күннің көзі жылытады. Жандүнием қуанады. Өте жақсы ".

АЛЕКСЕЙ МАГНИТОГОРСКІДЕН КЕЛГЕН ТУРИСТ: "Біз ауа райы жылы болады деп ойладық. Солай болса екен. Сәл ұзағырақ серуендеуге болады. Аяз атаға рахмет. Ол бізге жақсы қысқы ауа райын сыйлады".

Аязға байланысты Мәскеуде мұз инесі деп аталатын сирек кездесетін атмосфералық құбылыс тіркелді. Бұл мұз кристалдары түріндегі қатты жауын-шашын. Олар күн сәулесінде немесе ай жарығында әдемі жарқырайды. Синоптиктердің болжамынша, қатты суық Мәскеуде Рождествоға дейін сақталады. Содан кейін минус 6-10 градусқа дейін жылынады. Скандинавияға да қатты аяз келді. Швецияның солтүстігінде, Полярлық шеңберден шамамен 150 шақырым оңтүстікте орналасқан Лулео қаласында температура минус 38 градусқа дейін төмендеді. Жергілікті тұрғындарға үйлерде электр жарығы өшірілетіні хабарланды.

ЛУЛЕО ТҰРҒЫНЫ: "Мен қаншалықты суық екенін көруге жоғарыға көтерілдім, минус 38 градус болып шықты. Сондықтан бізге тек пешті жағу ғана қалды ".

Күнгследен туристік тау соқпағы өтетін арктикалық Квиккьокк ауылында 44 градус аяз тіркелді. Бұл Швециядағы соңғы 25 жылдағы ең төменгі қаңтар температурасы. Ал елдің оңтүстігінде ауа райының апаты басқа. E22 Автожолында жолды қар басып қалды. Салдарынан ондаған жүк көлігі тұрып қалған. Жүргізушілерді әскерилер эвакуациялады.

https://www.youtube.com/embed/j2Sa4zR9Veo?si=dd-JoDs_cfiGnc5V" 

Маңғыстаудағы Қаракөл көлінде аққулардың жаппай қырылу себебін анықтау мақсатында Алматы қаласынан орнитологтар Ақтауға баратын болды. Бұл туралы аймақ басшысы Нұрлан Ноғаевтың төрағалығымен өткен аппараттық кеңесте белгілі болды. Өңірдегі орман шаруашылығы және жануарлар дүниесі аумақтық инспекциясының мамандары 601 сыбырлақ аққудың өлімі фактісін растаған.

Қаракөлдегі аққулардың жаппай қырылуы өткен жылдың 21-ші желтоқсан күні белгілі болған еді. Бастапқыда 30 аққудың өлексесін тапқан мамандар соңғы тәулікте өлген құстың саны 600-ден асқанын мәлімдеді. Маңғыстау облыстық орман шаруашылығы және жануарлар дүниесі аумақтық инспекциясының басшысы Ғаббас Досатов өлікселерге қатысты санақ күнде жаңартылып тұратынын айтты. Жалпы Қаракөлге 5 мыңнан астам сыбырлақ аққу қыстауға келіпті.

ТЕМІРБЕК НҰРТАЗИН ҚР АУЫЛШАРУАШЫЛЫҒЫ МИНИСТРЛІГІ ВЕТЕРИНАРИЯЛЫҚ БАҚЫЛАУ ЖӘНЕ ҚАДАҒАЛАУ КОМИТЕТІНІҢ АУМАҚТЫҚ ИНСПЕКЦИЯСЫНЫҢ БАСШЫСЫ: «Ұлттық референттік орталықтың зерттеуі бойынша, олардың қорытындысы бойынша, протокол бойынша, құс тұмауы анықталып отыр. Біздер кеше тағы 5 өлекседен под материал алып, ұлттық референд орталығына бүгін таңертең жеткізгенбіз».

Бастапқы талдаулар нәтижесі аққулардың құс тұмауын жұқтыру себебінен өлуі мүмкін екенін көрсеткен. Олардан H5N1 азиялық штаммы анықталған. Бұл вирустың адамдарға жұқпалылығы төмен, құстарға әсер етеді, басқа жануарлар жұқтырған жағдайда симптомсыз өтеді екен. Енді құстардың жаппай қырылуының себебін анықтау үшін Қазақстан биоалуантүрлілікті сақтау ассоциясының орнитологтары зерттеу жүргізеді. Қазір көпшілік бұл жағдайға алаңдаулы, әсіресе ақтаулықтар. Табиғат жанашырлары қолдан жемдеу әдісін пайдаланып көрейік деген ұсыныстарын да білдірді. Алайда мамандар, жасанды жемдеу кері әсер ету мүмкін екендігін айтады.

ЖАСҚАЙРАТ НҰРМҰХАМБЕТОВ ҮСТІРТ МЕМЛЕКЕТТІК ТАРИХИ ҚОРЫҒЫ ДИРЕКТОРЫНЫҢ МІНДЕТІН АТҚАРУШЫ: «Қаракөл көлі ерекше қорғалатын табиғи аумаққа жатады. Мұнда құстарды жемдеуге және тұрғындарға арнайы киімсіз қазіргі құс тұмауы кезінде өте қауіпті. Осы тұрғындарға алғысымызды білдіреміз. Құстарды жемдеуге, қаражат жинаймыз дегендерге алғысымызды білдіреміз. Бірақ ондай шараларды көлде жасауға болмайды. Арнайы мамандар келеді, сол мамандардың қорытындысы бойынша жұмыс әрі қарай жалғасады».

Нұрлан Ноғаев құстардың жаппай қырылуына қатысты орын алған жағдай, оның таралу себептеріне байланысты көптеген сұрақтар туындатып отырғанын, бұл жағдай егжей-тегжейлі тергеуді талап ететінін атап өтті.

НҰРЛАН НОҒАЕВ МАҢҒЫСТАУ ОБЛЫСЫНЫҢ ӘКІМІ: «Бұл өте алаңдататын мәселе. Сондықтан құрметті әріптестер, өзінің құзыретінің аясында қажетті шараларды қабылдау керек. СЭС, ветеринария, экология, ауылшаруашылығы, орман жануарлар дүниесін қорғау, мемлекеттік органдар, қажетті зерттеу, ғылыми институттары, солардың мүмкіншіліктерін қосуымыз керек. Талқыланған мәселелер бойынша әр мемлекеттік орган өзінің құзыретінің аясында қажет шараларды қабылдау керек».

Айта кетейік, Қаракөл көлі Қазақстанның қорғалатын орнитологиялық орындарының қатарына жатады. Бұл мекен жыл құстары үшін қолайлы аумақ. Бір жыл ішінде құстардың 80-нен астам түрі келеді. Бұл сулы-батпақты көлде жылдың әр мезгілінде суда жүзетін және су маңындағы құстардың 175 түрі, оның ішінде Қазақстанның Қызыл кітабына енгізілген құстардың 21 түрі мекендейді екен.

https://www.youtube.com/embed/1IO8IIfnZRo?si=TcGk022KBGVO_0JP" 

СҚО Мәмлүт ауданының Бексейіт ауылында жеке тұрғын үйде газ баллоны жарылып,нәтижесінде екі адамды күйік шалған. Төтенше жағдай туралы хабарлама 5 қаңтар күні сағат 19:43-те Мәмлүт ауданының нөмірі 15 өрт сөндіру бөліміне келіп түскен.

Жеке тұрғын үйде газ баллоны жарылып, 2 шаршы метр алаңды шарпыған. Термиялық күйікпен 1940 жылы туған әйел мен 2002 жылғы немересі ауруханаға жеткізілді. Қазіргі уақытта зардап шегушілердің жағдайы жақсы.