https://www.youtube.com/embed/EwgMM4n6d10?si=6q2HXzOV20krCxVA" 

https://www.youtube.com/embed/FNiJsl6kYO0?si=ru1y0vWDc-8h_9Hz" 

Алматы қаласында техникалық және кәсіптік, орта білімнен кейінгі білім беру ұйымдарының теміржол саласы бойынша педагогтері арасында қалалық кәсіби шеберлік байқауы өтті. Шараның негізгі мақсаты — техникалық және кәсіптік білім беру жүйесінде жұмыс істейтін дарынды, шығармашыл мамандарды анықтау және қолдау көрсету.

Қатысушылар  "Алматы көлік және коммуникациялар колледжінің"базасында WorldSkills Kazakhstan талаптары мен стандарттарына сай үш практикалық модуль бойынша тапсырмалар орындады. 1-ші Еңбекті қорғау және жеке қауіпсіздікті қамтамасыз ету бойынша практикалық тапсырмалар. 2 –ші Теміржол көлігі объектілерінің жұмысын ұйымдастырудың кәсіби мәселелерін шешу. 3 –ші Теміржол көлігі саласындағы кәсіби құзыреттерді орындау және талдау.

ДИДАР СӘРСЕНҒАЛИҚЫЗЫ АЛМАТЫ ҚАЛАЛЫҚ ӘДІСТЕМЕЛІК ОРТАЛЫҚТЫҢ ТЕХНИКАЛЫҚ ЖӘНЕ КӘСІПТІК ҰЙЫМДАРЫНЫҢ ӘДІСКЕРІ

Байқау барысында мамандар өздерінің теориялық және практикалық білім деңгейін, кәсіби шеберліктері мен дағдыларын, сондай-ақ оқу-өндірістік процеске енгізіп жүрген инновациялық әдіс-тәсілдерін көрсетті. Жоғары еңбек мәдениетін меңгерген ұстаздар теміржол саласындағы өзектілігі жоғары мәселелерді кәсіби деңгейде шешуге қабілетті екендерін дәлелдеді.

ЕРБОЛ МАГАЗОВ АТКК ДИРЕКТОРЫ

Сайыс қорытындысы бойынша үздік нәтиже көрсеткен мамандар марапатталды. Бұл шара ұстаздардың кәсіби дамуына серпін беріп қана қоймай, саладағы сапалы білім беруді қамтамасыз етуге бағытталған маңызды қадамдардың бірі болды.

https://www.youtube.com/embed/8ecg0bCBYI0?si=mf-cerMH5ngX8ag3" 

Дәстүрімізді дәріптеу арқылы ғылыми жаңашылдыққа ұмтылу, кезек күттірмейтін мәселе. Алматы облысында ашық аспан астында ерекше шара ұйымдастырылды. Келесі тақырыпқа назар аударсақ.

Алматы облысы Талғар ауданына қарасты Тұздыбастау ауылында ерекше форматта өткен халықаралық семинар-тренинг жергілікті тұрғындар мен білім беру саласының мамандарын біріктірген шара болды. «Ұлттық рух – білім негізі» және «Бір кесе самаурын шайы үстіндегі ойталқы» атты бұл игі бастама ашық аспан астында ұйымдастырылып, еркін әрі бейресми жағдайда өтті. Семинар-тренингтің негізгі мақсаты – ұлттық руханиятты біліммен ұштастыру, интерактивті әдістер арқылы оқытудың тиімділігін арттыру және ғылым мен білімді интеграциялау. Іс-шара World Cafe форматында ұйымдастырылды. Бұл әдіс қатысушылар арасында еркін пікір алмасуға және тәжірибе бөлісуге кең мүмкіндік берді.Таза ауада самаурынның шәйі,көмбе наннан дәм татып, сапалы білім,саналы тәрбиені қозғаған қонақтардың ішінде елімізге танымал Жоғарғы орындарының оқытушы құрамы,профессорлар қатысты.

ЗӘУРЕ БАДАНБЕКҚЫЗЫ АЗАМАТТЫҚ АВИАЦИЯ АКАДЕМИЯСЫНЫҢ  ПРОФЕССОРЫ, ФИЛОЛОГИЯ ҒЫЛЫМДАРЫНЫҢ КАНДИДАТЫ

Семинардың ғылыми жетекшісі – педагогика ғылымдарының докторы, профессор Баданбекқызы Зәуре. Ол «Ғылым және білім беру интеграциясы: жоғары оқу орындарында World Cafe форматында интерактивті және зерттеу әдістерін енгізудің тиімділігі» атты ғылыми жобаның жетекшісі болып табылады. Сонымен қатар профессор «Оқытудың жаңашыл әдістерін жетілдіру және білім беру үдерісіне енгізу» секциясына жетекшілік етеді.

СӘЛИАҚЫН КӘРІПБАЕВ PhD ДОКТОРЫ

ЗӘУРЕ БАДАНБЕКҚЫЗЫ АЗАМАТТЫҚ АВИАЦИЯ АКАДЕМИЯСЫНЫҢ  ПРОФЕССОРЫ, ФИЛОЛОГИЯ ҒЫЛЫМДАРЫНЫҢ КАНДИДАТЫ

Аталған шара ауыл мен академиялық ортаның өзара ықпалдасуына жол ашып, ұлттық құндылықтарды дәріптеуге, білім беру саласындағы тың әдістерді талқылауға зор үлес қосты.

https://www.youtube.com/embed/EfZ7XjKnZlE?si=-ewAlzNC6npFlQn7"

1. Ләззат Тұрғынқызы, алдымен жоба туралы қысқа мәлімет берсеңіз. Қандай мақсат көзделіп отыр?

– Бұл ғылыми жобаның толық атауы – “Абай өлеңдерінің морфологиялық және поэтикалық белгіленімі” (БНҚ: BR21882334). Жоба әл-Фараби атындағы Қазақ ұлттық университетінде жүзеге асырылып жатыр. Негізгі мақсатымыз – Абай өлеңдерін қазіргі заманғы лингвистика мен цифрлық технологиялар тоғысындағы әдістермен зерттеу, нақтырақ айтсақ – кіші тілдік корпус жасау. Бұл корпус морфологиялық және поэтикалық тұрғыдан толық белгіленіп, қазақ тіліндегі поэзиялық мәтіндерді сандық талдауға жол ашады.

2. “Ішкорпус” деген ұғымға түсініктеме беріп өтсеңіз. Оның ерекшелігі неде?

– Жалпы тілдік корпус – белгілі бір ережеге сай құрылып, өңделген мәтіндер жиынтығы. Ол тілдік бірліктерді автоматты түрде іздеуге, талдауға мүмкіндік береді. А. Байтұрсынұлы атындағы Тіл білімі институтына қарасты Қазақ тілінің ұлттық корпусының: ауызша, терминологиялық, мақал-мәтел, ономастикалық, заманауи поэзия т.б. ішкорпустары  тәрізді белгілі бір автордың немесе нақты бір сала, бағытқа қатысты  мәтіндер жиынтығының морфологиялық, синтаксистік, семантикалық және поэтикалық деңгейде толық белгіленген тілдік деректер базасы,  яғни бұл корпус тек мәтіндердің жинағы емес, сонымен бірге олардың ішкі құрылымын, тілдік және поэтикалық ерекшеліктерін терең талдауға мүмкіндік береді. Осы корпус арқылы ақынның тілдік қолданысын, өлеңдерінің морфологиялық құрылымын, поэтикалық тәсілдерін тереңірек зерттеуге мүмкіндік туады.

3. Жоба аясында нақты қандай жұмыстар атқарылып жатыр?

– Бірнеше бағытта жұмыс жүріп жатыр. Ең алдымен, Абай өлеңдерінің мәтіндік базасы жинақталды. Содан кейін морфологиялық белгіленім жүргізілді – яғни әр сөздің түбір, қосымшасын,  грамматикалық түрленуі, қасиеттері анықталып, тегтелді. Сонымен бірге, поэтикалық элементтер – ұйқас, буын саны, ырғақ құрылымы, троптар мен фигуралар сияқты белгілер жүйеленіп отыр. Өздеріңіз білетіндей, бұл жұмыс тіл мамандарынан бөлек, әдебиеттанушылар мен IT мамандардың тығыз ынтымақтастығын талап етеді.

4. Абай поэзиясын цифрландыру қазақ тіл білімі мен әдебиеттануға қандай жаңа мүмкіндіктер береді деп ойлайсыз?

– Абай шығармашылығы – қазақ әдеби тілінің қалыптасуындағы ең маңызды қайнар көзінің бірі. Цифрлық корпус осы тілді жаңа қырынан тануға көмектеседі. Мысалы, автоматты түрде жиілік талдауы, сөз қолданысындағы стильдік ерекшеліктер, морфологиялық модельдер сияқты аспектілерді қарастыруға болады. Бұл деректер негізінде жасанды интеллектке қазақ тілінің поэтикалық табиғатын үйрету, білім беру ресурстарын жаңғырту, тіпті әдеби шығармашылыққа көмек көрсету құралдарын жасау мүмкіндігі туады.

5. Бұл жобаның білім беру жүйесіне ықпалы бола ма?

– Әрине, тілдік корпус негізінде мектеп пен жоғары оқу орындарына арналған интерактивті оқыту құралдарын дайындауға болады. Студенттер мен оқушылар Абайдың поэзиясын жай ғана жаттап қоймай, оның ішкі құрылымын, стильдік ерекшелігін заманауи технология көмегімен терең түсінуге мүмкіндік алады. Зерттеушілік қабілеттерді жетілдіруге және ұлттық рухани құндылықтарды насихаттауға да ықпал етеді. Сонымен қатар бұл жоба – қазақ тілін цифрлық әлемге лайықтау жолындағы нақты қадамдардың бірі.

6. Алдағы уақытта осы жобаның нәтижесі қалай пайдаланылмақ?

– Қазіргі таңда корпус беті онлайн платформа ретінде дайындалуда. Кез келген зерттеуші, оқытушы немесе студент корпусты ашып, Абай өлеңдерінің толық жинағын,  кез келген сөздің грамматикалық сипаттамасын, поэтикалық белгілерін көріп, статистикалық мәліметтер ала алады.

7. Іш корпус әзірленіп жатыр екен. Алдағы уақытта бұл жобаны қалай дамыту жоспарыңыз бар? Қандай жаңа бағыттар қарастырылуда?

 - Қазіргі таңда іш корпус негізінен морфологиялық және поэтикалық деңгейде белгіленіп жатыр. Бірақ толыққанды лингвистикалық зерттеу жүргізу үшін келесі кезеңде  синтаксистік белгіленім жұмыстарын бастауды көздеп отырмыз. Бұл – өте маңызды және күрделі кезең.

Синтаксистік белгіленім – әрбір сөйлемнің құрылысын, сөйлем мүшелерінің өзара қатынасын, сөздердің синтаксистік қызметін айқындау деген сөз. Аталған белгіленім Абай поэзиясындағы инверсия, эллипсис, экспрессивті синтаксис сияқты құбылыстарды автоматты түрде тануға мүмкіндік береді. Бұл қазақ тілі үшін әлі игеріле қоймаған сала.

Сонымен қатар, осы корпус базасында синтаксистік құрылымдарды визуалды түрде көрсету, автоматты синтаксистік талдау құралдарын жасау сияқты міндеттер тұр. Мұндай даму қазақ тілін табиғи тілдерді өңдеу (NLP) саласында жаңа деңгейге көтереді. Жоба тек филологиялық бағытта емес, цифрлық технология мен жасанды интеллектпен тығыз байланысты өріс алып отыр.

Жалпы алғанда, іш корпус – тек бір реттік зерттеу емес, көпқырлы, кезең-кезеңімен тереңдетілетін ғылыми-инновациялық жоба.

Сұхбаттасушы: Алимтаева Лаззат Тұрғынқызы, филол.ғ.к., “Абай өлеңдерінің морфологиялық және поэтикалық белгіленімі” (БНҚ: BR21882334) жоба мүшесі.

https://www.youtube.com/embed/y3zwsquVplY?si=zIv6Zj8CzrJIf17I" 

Бүгін Алматыда «Цифрлық Жібек жолы – 2025» атты халықаралық форумы өтті. Жиын Қазақстан мен Қытай арасындағы туризм және технология салаларындағы серіктестікті нығайтуға бағытталған. Шараға екі елдің туризм индустриясы мен ІТ секторындағы жетекші сарапшылары мен компаниялары қатысты. Олардың қатарында Қытайдың Ctrip, JD Travel, Tongcheng секілді ірі платформалары бар.

Форум аясында туризм саласын цифрлық трансформациялау және заманауи контент арқылы туристік маркетингті дамыту жолдары талқыланды. Сарапшылардың айтуынша, Қазақстанның туристік әлеуеті Қытай цифрлық кеңістігінде кеңінен танымал болмақ. Енді еліміздегі туристік бағыттар мен нысандар қытай тіліне аударылып, Қытайдағы ең ірі қосымшаларда қолжетімді болады. Ұйымдастырушылар бұл қадам Қытайлық туристердің Қазақстанға өз бетінше келу мүмкіндігін арттырады деп отыр. Қазірдің өзінде Қытайдан келетін қонақтар саны артып келеді. Былтыр елімізге 655 мың турист келген болса, биыл бұл көрсеткіш 1 миллионға жетуі мүмкін дейді.

ДАНИЕЛ СЕРЖАНҰЛЫ, “KAZAKH TOURISM” ҰК” АҚ БАСҚАРМА ТӨРАҒАСЫНЫҢ ОРЫНБАСАРЫ “ Бүгінгі форумның негізгі мақсаты - жалпы Kazakh Tourism мен Гуанчжоу технологиялық компаниясы Zowoyoo атты біріккен Қазақстанның бір туристік экожүйесін қалыптастыру. Ол дегеніміз не? Қытайда өзіндік, жеке туристік платформалар бар - бұл барлық әлемдегідей Booking емес, Tripadvisor емес. Оларда Ctrip, Tongcheng сияқты өздерінің жеке жеке. Бірақ оларда Қазақстан туралы ақпарат әлі де көп емес. Бүгінгі форумның нәтижесінде Гуанжоу технологиялық компаниясы алады да Қазақстан туралы - оның туристік нысандары, турлары және басқа да ақпаратты максималды түрде Қытайдың цифрлық кеңістігіне салатын болады. Осының арқасында жаңағы Қытайдың негізгі туристік қосымшаларында, платформаларында, сайттарында және түрлі әлеуметтік желілерінде Қазақстан туралы ақпарат әлдеқайда көбейетін болады. Әрине, бұл арқылы біз өз бетімізше ертең Қытайдан бізге өзімізге келетін туристердің санын еселеп арттырамыз.”

Айта кетейік, Zowoyoo компаниясы Орталық Азиядағы алғашқы өкілдігін Алматыда ашып жатыр. Бұл кеңсе аймақтағы туризм бағыттарын біріктіруге және Жібек жолының заманауи цифрлық желісін қалыптастыруға бағытталған.

Асылжан Қасымбекова Алатау ақпараты

https://www.youtube.com/embed/-mUyDKfDO9c?si=tl7rYOGYLoHZaUWD" 

Іле Алатауы мемлекеттік ұлттық табиғи паркінде «Парктер шеруі – 2025» халықаралық табиғат қорғау акциясының салтанатты жабылу рәсімі өтті. Акция аясында 8200 дана ағаш тұқымы себіліп, 10 тонна тұрмыстық қалдық жиналды. Толығырақ сюжетте.

Биыл 29-рет өткен экологиялық шара – Қазақстандағы экологиялық мәдениеттің қалыптасуы мен қоғамның табиғатқа жанашырлықпен қарауының көрінісі. Іле Алатауы ұлттық паркінде жыл басынан бері өткізілген 241 экологиялық шара мыңдаған адамның белсенді қатысуымен жүзеге асты. Сонымен қатар, 136 экологиялық сенбілік, 49 экотур мен дәріс, 56 ағаш отырғызу акциясы мен түрлі көрмелер, танымдық бастамалар ұйымдастырылды.

Сондай-ақ, 5-маусым — Дүниежүзілік қоршаған ортаны қорғау күніне орай Іле Алатауы мемлекеттік ұлттық табиғи паркінің Түрген филиалында өткен ауқымды экологиялық акция 500-ге жуық адамның басын қосты. Қатысушылар арасында оқушылар, студенттер, тәрбиешілер, ұлттық парк қызметкерлері мен еріктілер болды.

ЕЛНҰР АХМЕТОВ, ІЛЕ АЛАТАУЫ МҰТП БАС ДИРЕКТОРЫ: “Осы іс-шаралардың нәтижесінде студенттер, оқушылар, балабақша тәрбиеленушілері және көптеген еріктілер белсенді қатысып келеді. Жыл сайын ұлттық табиғи парк аумағында құстарға ұя жасау, қоршаған ортаны таза ұстау, санитарлық жағдайды бақылау, өрт қауіпсіздігін сақтау, орман екпелерін отырғызу, көшет егу сияқты көптеген акциялар жүргізілуде.”

Шара барысында табиғатты тазалау мен қоқысты сұрыптау жұмыстары жүргізіліп, ашық аспан астында сурет салу сайыстары, экологиялық тақырыптағы спорттық квесттер мен ойындар ұйымдастырылды.

АНАР ЖАҚСЫБЕКҚЫЗЫ, АБАЙ АТЫНДАҒЫ ҚАЗҰПУ СТУДЕНТІ: «Бүгін – Дүниежүзілік қоршаған ортаны қорғау күні. Бұл күн тек эколог мамандар үшін ғана емес, табиғатқа бейжай қарамайтын әрбір азамат үшін маңызды күндердің бірі. Біздің университетіміз осы жыл сайын атаулы датада әрбір іс-шараға қатысады. Атап айтатын болсақ: сенбіліктер, ағаш отырғызу акциялары, эко-білім беру сабақтары, және де қоқыстарды жинау.”

1996 жылы құрылған Іле Алатауы ұлттық мемлекеттік табиғи паркі Қазақстандағы маңызды экологиялық орталықтардың бірі. Бүгінде қоршаған ортаны аялау, экобілім беру мен табиғатты қалпына келтіру бағытында көптеген бастамалар жыл сайын жүзеге асырылып келеді.

Айгерім Есімхан, Талғат Жанбота, Алатау ақпараты.

https://www.youtube.com/embed/vn-mXHSrUlc?si=_oWzGQSSn5bUDetV" 

https://www.youtube.com/embed/mcuXkHHe6eo?si=jyHxBaDHR0CwRpvJ" 

Алматыда Арша театрының ұйымдастыруымен Талғат Теменовтың Гүлназ повесінің желісіне негізделген «Махаббат станциясы» спектакілі  алғаш рет көрермен назарына ұсынылды.Толығырақ алдағы бейнематериалда.

«Махаббат станциясы» Талғат Теменовтың шығармашылығындағы және қазақ киносы мен музыка тарихындағы орын алатын ерекше туынды. Ондаған жылдарға қарамастан, өзектілігін жоғалтпай, жастарға махаббаттың, адалдықтың және өмірге деген үміттің маңыздылығын еске салып келеді.

СЕРЖАН МОЛДАСАНҰЛЫ «АРША» ТЕАТРЫНЫҢ КӨРКЕМДІК ЖЕТЕКШІСІ «Арша» театры Қоңыр Media Group- тың тағы бір жаңа жобасы, біз  енді жаңа театр ашып жатырмыз.Оның құрамы биылғы Жүргеновты бітіретін жас таланттар.Т.Теменовтың  Махаббат станциясын қойып жатырмыз.Оның бір артықшылығы, оның киносы бар, жалпы шығарма бар повесть, бұл өзі театрда сахналанбаған бірінші рет.Сондықтан да енді бұл Аршаның ең алғашқы бір үлкен жаңа туындысы деп айтуға болады».

Арша театрының бұл туындысы өнерге енді қадам басып келе жатқан жас таланттардың алғашқы туындысы. Қойылымның сюжеті 90-шы жылдардың басындағы жас жұп –Гүлназ ен Оралдың  махаббат тарихын, сол кездегі жастардың өмірге деген көзқарасын, олардың қиындықтар алдындағы табандылығын, адалдығын және бақытқа деген ұмтылысын шынайы бейнелейді.

АБЫЛАЙХАН ЖӘНІБЕК «АРША» ТЕАТРЫНЫҢ АКТЕРЫ «Махаббат станциясының премьерасында Жеңіс атты персонажды сомдап шығамын.Жалпы Махаббат станциясымен итаныс адамдар Жеңісті де таниды.Енді бүгінгі менің актер ретіндегі мақсатым ол Жеңістің шындығын ашу.Фильмдегі Жеңісті емес нақты фильмде көрсете алмай қалған дүниелерді Жеңістің бір шындықтары бар сол нәрселерді көрерменге көрсетсем деймін».

Бүгінгі күнге дейін өз өзектілігін жоғалтпаған бұл туынды – махаббат, адалдық, арманға деген ұмтылыс секілді мәңгілік құндылықтарды насихаттайды. Ол – қазақ киносының алтын қорына енген, ұлттық мәдениетіміздің ажырамас бөлігіне айналған, махаббат пен үміттің жарқын символы.

https://www.youtube.com/embed/Zb3y2dy4meE?si=rzsYyaBoljSBqz5n" 

https://www.youtube.com/embed/73dgv5p-3Xk?si=gpe-6FVP4gg7gU18" 

5 маусым — Дүниежүзілік қоршаған ортаны қорғау күні. Биыл бұл күні пластиктік ластануға қарсы күреске арналған шаралар өтіп жатыр. Әлемде жыл сайын 11 миллион тонна пластик мұхитқа түссе, 13 миллионы топырақта шірімей жатады. Ал оның тек 9 пайызы ғана қайта өңделеді. Бірақ, елімізде бұл мәселемен нақты күрес басталды. Алматы маңындағы Аюсай шатқалында халықаралық қолдаумен ерекше экожоба іске асты. Бұл жайлы толығырақ келесі сюжетте.

Пластик – табиғат үшін ең қауіпті қалдықтың бірі. Ол жүздеген жыл бойы шірімей, топырақ пен суды улайды, ал өртелген жағдайда адам денсаулығына зиянды газдар бөледі. БҰҰ бастамасымен әлем бойынша осындай ластанумен күресуге бағытталған 100 жоба жүзеге асып жатыр. Соның бірі — Қазақстанның туристік жауһарларының бірі саналатын Аюсай шатқалында іске қосылды.Биіктігі бас айналдыратын Аюсай тауының баурайында бұрын туристер қалдырған пластик бөтелкелер мен қоқыс қалдықтары жататын. Енді бұл көрініс өзгеруде. Мұнда алғаш рет арнайы қоқыс сұрыптайтын контейнерлер орнатылып, қалдықты сығымдайтын құрылғы іске қосылды.

БАҚБЕРГЕН ДҮЙСЕНОВ  АЮСАЙ ВИЗИТ ОРТАЛЫҒЫНЫҢ ГИДІ

Әлемде жыл сайын 516 миллион тоннадан астам пластик тұтынылады. Бұл апат ауқымын еселей түсуде. Алайда Қазақстанда басталған бастама – жаһандық мәселеге қарсы нақты әрекет. БҰҰ өкілдері еліміздің бұл бастамасын жоғары бағалап отыр.

ВЛАСТИМИЛ САМЕК  БҰҰ ЖАҺАНДЫҚ КОММУНИКАЦИЯЛАР ДЕПАРТАМЕНТІНІҢ ӨКІЛІ “Өздеріңіз де көріп, біліп жүргендей, айналамыздағы заттардың басым бөлігі пластиктен жасалған. Ал пластик табиғатта ыдырамайды. Егер біз пластик бөтелкелерді, пакеттерді және басқа да пластик заттарды қоқысқа тастасақ, олар ондаған, тіпті жүздеген жылдар бойы ыдырамай жата береді.

Бұл әрине, табиғат пен қоршаған ортаға үлкен зиян келтіреді. Сонымен қатар, микропластик мәселесі де жеке қарастыруды қажет етеді. Мысалы, біз күнделікті тұтынатын су бөтелкелері мен әртүрлі өнімдер арқылы микропластик адам ағзасына түсуі мүмкін. Сондықтан қоршаған орта арқылы пластиктің адам денсаулығына тигізетін әсері де өте маңызды мәселе болып отыр”.

Статистикаға сүйенер болсақ, тауларда қызмет ететін 146 нұсқаушы мен қысқы спорт мамандары арасында жүргізілген сауалнама нәтижесі де алаңдатарлық. Олардың 63 пайызы — соңғы жылдары пластикпен ластану үдегенін мойындаса, 80 пайызы — таулы жерлерде тасталған бөтелкелер мен қаптамаларды жиі кездестіретінін айтқан.

ГҮЛЖАН КЕНЖЕҚЫЗЫ ТҰРҒЫН

Бүгінгі жасалған әрбір қадам – болашақтың экологиялық қауіпсіздігіне қосылған үлес. Ал қоршаған ортаны қорғау – бәрімізге ортақ міндет.

Айгерім Есімхан, Алатау ақпараты

https://www.youtube.com/embed/N5DD6nfKryo?si=9L1lc7m-hhGjlDF0"