ЖАҢАЛЫҚТАР

Қазақстан Республикасының Мемлекеттік Елтаңбасы әлемде геральдикалық көрінісі мен мағынасы жағынан 8-орында. Бұл туралы Kazinform тілшісіне берген сұхбатында Жандарбек Мәлібеков мәлімдеді, деп хабарлайды Алатау телеарнасы.

ҚР Мемлекеттік Елтаңбасының авторы 1992 жылдан бері бірнеше рет жетілдіріліп, өзгертілгенін айтады.

Ең әуелі халқымды, елімді Рәміздер күнімен құттықтағым келеді. Біздің рәміздеріміздің жұмыс істеп келе жатқанына 30 жылдан астам уақыт болды. Біз алғаш 1992 жылы конкурстық жұмысты тапсырдық. Бірақ ол кезде Елтаңбаның нақты стандарты жасалынбаған еді. 2007 жылы біз стандарттық үлгісін жасадық. Ол кезде Елтаңбадағы «Қазақстан» жазуы кириллица әріптерімен жазылған болатын. 2014 жылға дейін біз Елтаңбаны жетілдіріп, стандарттық үлгісін жасап, оны кітап қылып шығарып, заң жүзінде бекіттік. 2014 жылдан бастап латын әрпін енгізу туралы заң шыққаннан кейін Президент Елтаңбадағы жазуды да «Qazaqstan» деп латын әріптерімен жазу туралы тапсырма берді. Сол бойынша 2019 жылы қазір қолданыста жүрген, латын әрпіндегі жетілдірілген, алтындалған ҚР Мемлекеттік Елтаңбасын жасап шықтық. Адамдар Елтаңбаны жасап, тапсырғаннан кейін сол бойынша қалды деп ойлайды. Жоқ, ол 30 жыл бойы жетілдіріліп, жаңарып, сапасы жақсарып келе жатыр, – дейді архитектор.

Сәулетші ҚР Мемлекеттік Елтаңбасы әлемдегі ең үздік мемлекеттік рәміздердің бірі екенін жеткізді. Жандарбек Мәлібеков Елтаңбадағы әр элементтің символикалық мәні барын айтады. Олардың мағынасын түсіну үшін тарихқа терең бойлау керек. Автор Елтаңбада қазақ даласының 5 мың жылдық өткенін, бүгіні мен болашағын бейнелеген.

 Дүниежүзінде геральдика деген ұғым бар. Бұл – өз алдына бір бағыт. Қазір осы геральдика бойынша арнайы комитет те ашылды. Археологиялық жұмыстар, ою-өрнектер, ордендер мен медальдарымыздың бәрі осы геральдика арқылы өтеді. Сондықтан Қазақстан Республикасының Мемлекеттік Елтаңбасы – алғашқы геральдикалық тәсілмен жасалған, ерекше көрнекі және символдық мәні жоғары мемлекеттік рәміз. Ол мағынасы мен геральдикалық көрінісі жағынан 194 елдің ішінде 8-орын алады, – дейді Жандарбек Мәлібеков.

Елімізде банкроттыққа өтініш білдірген адамдардың саны өсіп барады. Соңғы дерекке сүйенсек, биылдың өзінде банкроттықты рәсімдеуге 77 106 адам соттан тыс және сот тәртібімен өтініш берген, деп хабарлайды Алатау телеарнасы.

Бұл туралы Қаржы министрлігінің Мемлекеттік кірістер комитеті жазды. Мемлекеттік кірістер органдары арқылы 28,4 мың азамат, сот шешімі бойынша 196 азамат банкрот деп танылды. Міндеттемелердің жалпы сомасы – 147,1 млрд теңге.

"Төлем қабілеттілігін қалпына келтіру рәсімін 9,5 млрд теңге сомасына 103 азамат қолданды, оның 8-і бойынша қалпына келтіру жоспарлары бекітілді", - деп жазылған хабарламада.

Заң қолданысқа енгізілген сәттен бастап банкроттыққа өтініш білдірген адамдардың саны өсіп жатқаны байқалады: 2024 жылы 83 057 өтініш, 2025 жылдың 5 айында – 77 106 өтініш берілген.

Заңнамадағы негізгі өзгерістер

2024 жылдың 20 тамызынан бастап рәсімдерді жеңілдетуге бағытталған түзетулер күшіне енді:

төлем қабілеттілігін қалпына келтіру рәсімі мерзімі өткен және мүлік болмаған кезде, бірақ тұрақты табыс болған кезде қолжетімді болды, соттан тыс банкроттық енді микроқаржы және коллекторлық ұйымдарды қоса алғанда, қарыз шарттары бойынша талап ету құқығы бар барлық ұйым алдындағы міндеттемелер бойынша қолданылады, өтініш беру тәртібі жеңілдетілді: кредитор мен қарыз сомасы туралы мәліметтерді көрсету, сондай-ақ құжаттарды қоса беру қажеттілігі алынып тасталды.

өтеудің болмау мерзімін есептеу тәртібі нақтыланды: 1 АЕК-тен кем төлемдер өтеу болып есептелмейді, мерзім соңғы төлем күнінен бастап есептеледі.

Алда қандай өзгерістер болады

Парламентте:

2025 жылғы 1 қаңтарға дейін жасалған қарыз шарттары бойынша борышты реттеуді жүргізу туралы талапты алып тастауды;

борышкердің себебін көрсетпей соттан тыс банкроттық рәсімін тоқтату құқығын;

соттан тыс банкроттық рәсімі аяқталғаннан кейін кредиттік бюролар базасында көрсетілмегендерді қоса алғанда, банкроттың қаржы ұйымдары алдындағы барлық міндеттемесін тоқтатуын көздейтін түзетулер қаралады.

Аталған түзетулер ағымдағы жылдың соңына дейін іске асырылады деп жоспарланып отыр.

Елімізде бірден 6 кәсіби мереке пайда болмақ. Жаңа кәсіптік мерекелерді енгізуге ұсынысты тиісті қызмет салаларының уәкілетті мемлекеттік органдары бастамашылық жасады, деп хабарлайды Алатау телеарнасы.

6 кәсіби мереке туралы жаңа бұйрық жобасын Еңбек және халықты әлеуметтік қорғау министрлігі дайындаған. 10 маусымға дейін жария талқылау үшін "Ашық НҚА" порталында орналастырылып отыр.

Сонымен жаңа мерекелік даталар мыналар:

1. 31 қаңтар – кәсіпкерлер күні;
2. 7 шілде – қолөнершілер күні;
3. 9 шілде – табиғи монополиялар саласы жұмыскерлерінің күні;
4. 15 қыркүйек – санитариялық-эпидемиологиялық қызмет жұмыскерінің күні;
5. 12 қазан – кадр қызметі жұмыскерлерінінің күні;
6. 20 қазан – қоғамдық тамақтандыру саласының жұмыскері күні.

Бұдан басқа, энергетик күнін мерекелеуді желтоқсанның үшінші жексенбісінен 22 желтоқсанға өзгертіледі.

Елімізде бүгінде ат баптап, оны бәйгеге қосатындар қатары артып келеді. Тіпті сәйгүлікті Қазақстанның барлық өңірінен, шетелден іздейтіндер көп. Асыл тұқымды аттың құны қаншаға бағаланады? ҚазАқпарат осы жайтқа тоқталған, деп хабарлайды Алатау телеарнасы. 

Бәйгеге қаны таза асыл тұқымды жылқыларды қосады. Жылқының бұл түрінің мекені - Англия. Әу баста ағылшын аттары атауы болса, әлемге тараған соң ол да өзгерді.

Сонымен бірге бәйге аттары арасында асыл тұқымды Ахалтеке жылқылары да бар. Арғымақтың бұл түрі араб және қаны таза аттардан қалыс қалмайды.

Қазақстан ипподромдарынан араб жылқысында жиі кездестіруге болады.

Бағасы өзгелерге қарағанда төмен болатын жылқының тағы бір түрі бар. Ол - ағылшын-араб тұқымы. Аты айтып тұрғандай, екі тұқымның қаны араласқан жылқы.

Қайдан және қалай таңдауға болады

Бәйгеге қосар сәйгүлікті табу қиынның қиыны. Таңдау кезінде бірнеше ерекшелігіне назар аудару керек. Қай тұқымнан екені маңызды. Егер еркегі немесе ұрғашысы бәйгеде топ жарып жүрген болса, сәйкесінше бағасы да жоғары болады.

Сонымен бірге баға жылқының жасына қарай өзгеріп тұрады. 3-4 жасар аттар бәйгеге қосуға жарамды деп есептеледі. Егер бәйгеге қосып, жүлдегі орындарға ие болса, құны арта түседі. Қазақстандағы жарнама сайттарында тек соғымға және бағуға арналған жылқы, кейде үйір сатылады. Ал асыл тұқымды аттарды сататын адамдар санаулы ғана. Сондықтан бәйгеге ат қосатын адамдар шетелден, тіпті мұхиттің арғы жағынан сәйгілікті таңдап әкеледі.

Бағасы қанша

Қазақстаннан шықпай-ақ сатып алып, бәйгеге ат қосқыңыз келсе, 270-390 мың теңгеден бастауға болады. Ағылшын-араб жылқыларының ең арзанының құны осындай. 

Рейтинг бойынша екінші орында араб жылқысы тұр. Бағасы орта есеппен 300 мың теңгеден басталып, 1 500 000 теңгеге жетеді.

Ал ахалтеке тұқымды жылқы бағасы 550 мың теңгеден басталады. Тіпті бәйгеге қосып, жүлде алу үшін 2 млн 200 мың теңге төлеу қажет болады. Бірақ бұл жылқылардың бағасы одан да қымбат болуы мүмкін. 

Ең қымбаты - қаны таза жылқы. Оның бағасы 250 мың теңгеден басталғанымен, құлынының құны бәйгеге қосуға жарамды болуына байланысты бағаланады. Ал асыл тұқымды жылқыға 2,5 млн теңге төлеу қажет. 

Елімізде 25 мамырдан бастап заңсыз әкелінген, саудаланған ұялы телефондар бұғатталады. Ал бұл жағдайға тап болмас үшін не істеу керек? Осы орайда Цифрлық даму, инновациялар және аэроғарыш өнеркәсібі министрлігі мобильді құрылғылардың верификациясын қалай тексеруге болатынын жариялады, деп хабарлайды Алатау телеарнасы.

Министрлік дерегіне сүйенсек, eGov Mobile мобильді қосымшасы, www.gov.kz және imei.rfs.gov.kz порталдары арқылы ұялы телефонды тексеруге болады. Сондай-ақ нақты құрылғыға байланған нөмірлердің санын білуге мүмкіндік бар. IMEI-код тіркелген құрылғылар базасында бар болса, жүйе оның желіде тіркелгені туралы хабарлайды.

eGov Mobile мобильді қосымшасы арқылы қызметті пайдалану тәртібі:

• eGov Mobile қосымшасында авторизациядан өту керек;
• басты беттегі "Танымал қызметтер" бөлімінен "Абоненттік құрылғының IMEI кодын тексеру" сервисін таңдау қажет;
• жеке деректерге қол жеткізуге рұқсат беру керек;
• тексерудің қолжетімді әдістерінің бірін таңдап, нәтижемен танысу қажет.

www.gov.kz порталында қызметті пайдалану тәртібі:

• Қазақстан Республикасының Цифрлық даму, инновациялар және аэроғарыш өнеркәсібі министрлігінің сайтына өту;
• "Абоненттік құрылғының IMEI кодын тексеру" сервисіне сілтеме немесе баннер арқылы кіру;
• тексерудің қолжетімді әдістерінің бірін таңдап, нәтижемен танысу.
• imei.rfs.gov.kz порталында қызметті пайдалану тәртібі:
• rfs.gov.kz сайтына өту;
• тексерудің қолжетімді әдістерінің бірін таңдап, нәтижемен танысу.

Бұдан бөлек, ЖСН арқылы тексеру функциясы да қолжетімді. Сондай-ақ IMEI-код бойынша абонентті тексеру сервисі бар, ол белгілі бір құрылғыны қанша абоненттік нөмір қолданғаны жөнінде ақпарат береді.