ЖАҢАЛЫҚТАР
- Толығырық
- Категория: Жаңалықтар
Елімізде еңбек етіп жүрген мигранттардың нақты саны анықталды. Министрлік дерегінше бүгінде 13 мыңға жуық шетел азаматы бар, деп хабарлайды Алатау телеарнасы.
Еңбек және халықты әлеуметтік қорғау министрлігі таратқан ақпаратқа сүйенсек, Қазақстанда 12,8 мыңнан астам шетел азаматы жұмыс істейді. Олардың дені Қытай, Үндістан, Түркия, Өзбекстан мемлекеттерінен келген. Соның ішінде елімізге келіп, нәпақа тауып жүрген 565 адам басшылар мен олардың орынбасарлары қызметінде екен. Ал 2 671-і құрылымдық бөлімшелердің басшылары.
Шетелдік жұмыс күшінің негізгі бөлігі – мамандар мен білікті жұмысшылар, жалпы саны 6466 адам. Сондай-ақ маусымдық жұмыстарға 564 адам, ал корпоративтік ауыстыру аясында 2 616 адам жұмыс істейді.
Шетелдіктерге жұмыс беріп отырған қазақстандық жұмыс берушілер саны – 1 657. Оларда 456 мыңнан астам Қазақстан азаматы жұмыс істейді, бұл қызметкерлердің жалпы санының 97,2%-і.
Шетелден күнкөріс үшін келгендердің басым көпшілігі құрылыс саласын жағалайды. Одан кейінгі орында – өңдеу өнеркәсібі, тау-кен өнеркәсібі және карьерлерді қазу, кәсіби, ғылыми және техникалық қызмет. Ал ауыл, орман және балық шаруашылығында 600 шетелдік жұмыс істеп жүр.
- Толығырық
- Категория: Жаңалықтар
Тарихи отанына оралған қандастарға қанша ақша берілетіні белгілі болды. Яғни елімізге қоныс аударған азаматтар әр отбасы мүшесіне белгілі бір мөлшерде қаражат алады. Сонымен қатар, пәтер жалдау, коммуналдық төлемдерге де қолдау қарастырылған, деп хабарлайды Алатау телеарнасы.
Еңбек және халықты әлеуметтік қорғау министрлігі дерегіне сүйенсек, 2024 жылғы 1 ақпандағы жағдай бойынша 1 306 этникалық қазақ тарихи отанымен табысып, қандас мәртебесін алған. Жалпы 1991 жылдан бері республикаға 1 млн 129,6 мың этникалық қазақ оралыпты.
Жыл басынан бастап Қазақстанға келген қандастардың жартысы (48,9%) Қытайданкелсе, 29,6% – Өзбекстаннан, 8,3% – Моңғолиядан, 4,4% – Ресейден, 7,3 Түрікменстаннан және 1,5% басқа елдерден оралған.
Осы жылғы 1 ақпандағы жағдай бойынша еңбекке қабілетті жастағы этникалық қоныс аударушылар саны 56,2%-ды, еңбекке қабілетті жастан кіші 33,6%-ды және зейнеткерлер 10,2%-ды құрайды. Еңбекке қабілетті жастағы қандастардың ішінен білім деңгейі бойынша 15%-ы жоғары білімді, 20,2%-ы орта кәсіби білімді, 54,6%-ы жалпы орта білімді, және 10,2%-ының білімі жоқ.
Қоныс аударған этникалық қазақтар республиканың түрлі өңірлеріне қоныстанды. Сонымен бірге қандастарды қоныстандыру үшін келесідей еңбек күші тапшы өңірлер анықталды: Ақмола, Абай, Қостанай, Павлодар, Шығыс және Солтүстік Қазақстан облыстары.
Қоныстандыру өңірлерінде 2023 жылға арналған қандастарды қабылдау квотасы 2 433 адамды құрайды. 2023 жылғы 1 ақпандағы жағдай бойынша қоныстандыру өңірлеріне 332 қандас қоныс аударды.
"Жоғарыда аталған өңірлерде қоныстанған қандастарға көшуге субсидия түрінде мемлекеттік қолдау шаралары ұсынылады – бір мезгілде отағасына және отбасының әрбір мүшесіне 70 АЕК (258,4 мың теңге) мөлшерінде; тұрғын үй жалдауға және коммуналдық қызметтерге ақы төлеуге – бір жыл ішінде 15-тен 30 АЕК (55,3-ден 110,7 мың теңгеге дейін) мөлшерінде беріледі", - делінген ақпаратта.
Жыл басынан бері 35 қандасқа түрлі қолдау шаралары көрсетіліп, тұрақты жұмысқа орналастырылды.
Сонымен қатар ерікті қоныс аударудың тиімділігін арттыру мақсатында азаматтарды солтүстік өңірлерге қоныс аударуға қатысатын жұмыс берушілерді қолдау бойынша институционалдық шаралар қабылданды. Тұрғын үй сатып алу, салу үшін немесе ипотекалық тұрғын үй қарыздары бойынша бастапқы жарнаның бір бөлігін жабу үшін экономикалық ұтқырлық сертификаты тұрғын үй құнының 50%-ы немесе бір отбасына 4,28 млн теңгеге дейін мөлшерінде біржолғы өтеусіз және қайтарымсыз негізде енгізілді.
- Толығырық
- Категория: Жаңалықтар
Елдегі ақылы жолдардың тарифі көтеріледі. Көлік министрлігі жол ақысы 2013 жылдан бері өзгермегенін алға тартуда, деп хабарлайды Алатау телеарнасы.
Көлік министрі Марат Қарабаевтың айтуынша жол ақысы 2013 жылдан бері өзгермеген.
"Тарифті ұлғайту жоспарда бар. Неге екенін түсіндірейін. Тариф 2013 жылдан бері он бір жыл бойы өзгерген жоқ. Былтыр 20%-ке көтерілді. Сосын біздің тарифті басқа елдермен салыстырыңыздаршы. Егер Қазақстанда 1 теңге 20 тиын болса, Ресейде теңгеге шаққанда – 7 теңге", - дейді министр.
Оның айтуынша, жолдың сапасы жақсы болуы үшін оған күтім қажет. Ол үшін ҚазАвтоЖол бюджетіне жол ақысынан түскен қаржымен қарамақшы.
"Кейбіреулері екі-үш есеге өсірейік деп жатыр. Бірден айтамын, тариф екі-үш есеге көтерілмейді, бірақ белгілі бір пайызға қымбаттайтыны анық. Біздің мамандар жолды күтіп ұстауға қанша қаражат қажет, соны ескеріп есептейді. Қосымша 1 100 техника сатып алу керек", - деді ведомство басшысы.
Министр ақылы жолдардың тарифін көтеру мәселесі қоғам талқысына шығарылатынын атап өтті. Талқылауды наурыз айынан бастау жоспарланып отыр.
- Толығырық
- Категория: Жаңалықтар
Елімізде соңғы бір жылда жұмыссыздар саны айтарлықтай өскен. Мұндай деректі Еуразиялық экономикалық одақ мемлекеттерінің жұмыспен қамту органы жариялады, деп хабарлайды Алатау телеарнасы.
Спутниктің жазуынша, ЕАЭО елдерінің ішінде Қазақстан ғана жұмыссыздық көрсеткішінің төмен бағытын көрсеткен. Яғни, соңғы бір жылда айтарлықтай өскен. Мысалға 2022 жылы республиканың жұмыспен қамту қызметінде 132,3 мың адам есепте тұрса, бір жылдан кейін 168,9 мың адамға жеткен. Бұл елдегі еңбекке жарамды халықтың 1,8 пайызын құрайды.
Десе де өзге ЕАЭО елдерінде бұл көрсеткіш керісінше. Жұмыссыздар саны азайған. Бір ғана Арменияда жұмыссыздар саны 2022 жылдың желтоқсанынан 2023 жылдың желтоқсанына дейін 2,6 мыңға азайып, 46 мың адамды құраған.
Ал Ресейде 2022 жылдың аяғында 564,1 мың жұмыссыз тіркелген болса, бір жылдан кейін 424 мың немесе жұмыс істейтін халықтың 0,6%-ына қысқарып отыр. Қырғызстанда да бұл көрсеткіш төмендеу, 0,3%-ды құрады – 74,7-ден 67,6 мың адамға азайды.
- Толығырық
- Категория: Жаңалықтар
Қазгидромет мамандары 15-17 ақпанға арналған үш күндік ауа райы болжамын жариялады. Онда елдің бірқатар өңірінде қатты аяз болатыны жазылған, деп хабарлайды Алатау телеарнасы.
Синоптиктер дерегіне сүйенсек, солтүстік-батыстан арктикалық антициклон Қазақстан аумағына жылжиды. Сөйтіп республиканың көп бөлігін біртіндеп қамтымақ. Нәтижесінде елге аязды ауа райы келеді.
15 ақпан — шығыста, 16 ақпан — еліміздің оңтүстік-шығысында атмосфералық фронттардың әсерінен жауын-шашын, кей уақытта қатты жауын-шашын (жаңбыр, қар) жауады. Көктайғақ, бұрқасын соғады.
Батыста ауа температурасы түнде -12-30 градус аязға дейін, солтүстік-батыста, солтүстікте және орталықта -30-38 градусқа дейін, 16 ақпан шығыста -18-35 аязға дейін, оңтүстікте -10-30 дейін, 17 ақпанда оңтүстік-шығыста -15-28 дейін суытады.
- Толығырық
- Категория: Жаңалықтар
Елімізде соңғы екі жылда 100 мың гектардан астам орман алқабы өртеніп кеткен. Бұл мемлекетке 182 миллиард теңге шығын келтіріпті, деп хабарлайды Алатау телеарнасы.
Бұл туралы мәжіліс депутаты Еділ Жаңбыршин мәлімдеді. Ол орман шаруашылығы комитетіне көңілі толмайтынын айтып отыр.
"Соңғы екі жылда екі ірі өрттен келген залалдың сомасы 182 миллиард теңгені құраған және 100 мың гектардан астам орман жойылды. Орманды қалпына келтіруге кемі шамамен 20-30 жылдай уақыт кетеді. Ал осы іс-шараларға есептеулер бойынша 150,9 миллиард теңге қажет болады. Яғни жалпы шығын шамамен 384 миллиард теңгені құрайды", – дейді депутат.
Спутниктің жазуынша, ол азаматтық қорғау саласындағы бірінші кезектегі шаралардың 2023-2027 жылдарға арналған кешенді жоспарына сәйкес республиканың барлық орман шаруашылығын материалдық-техникалық жағынан қамтамасыз ету үшін 68 миллиард теңге қажет екенін айтқан.
"Сараң екі төлейді" деген сөз бар. Жалпы шығын қажетті сомадан бес жарым есе асып тұр. Үкімет қажетті соманы тез арада шешіп, бүкіл материалдық-техникалық базаны реттеп алғаны тиімді емес пе? Бұл мемлекет үшін де, табиғат үшін де пайдалы болатыны айтпаса да түсінікті", – дейді мәжілісмен.
Жаңбыршин орман заңнамасының сақталуын бақылайтын орман шаруашылығы комитетінің жұмысы да көңілден шықпайтынын атап өтті. Соңғы екі жылда табиғатты қорғау мекемелерінің объектілерінде 80-нен астам тексеріс жоспарланған, алайда іс жүзінде 1 ғана тексеріс жүргізіліпті.
Тағы басқа мақалалар...
10 ішінен 45 беті
Alatau News, Copyright 2023, All Rights Reserved.