ЖАҢАЛЫҚТАР

Қазақстан мұсылмандары діни басқармасы қасиетті Рамазан айының қарсаңында Telegram-ботты іске қосты, деп хабарлады Алатау телеарнасы басқарманың баспасөз қызметін сілтеме жасап.

Дерекке сүйенсек, бот @MuftyatBot деп аталады. Әрі ол діни сұрақтарға жауап беру үшін арнайы әзірленген. Сонымен қатар, бот арқылы шариғат мәселелері бойынша ақпарат алуға және кеңес сұрауға болады. 

Одан бөлек қолданушылар бот арқылы Рамазан кестесін жүктей алады.

Айта кетейік, қасиетті Рамазан айы 1 наурызда басталады. 

Ал наурыз айының 26-нан 27-не қараған түн – қасиетті Қадір түні. 

30 наурыз – Ораза айт мерекесі.

Қазақстан Президентінің Кеңесшісі – Президенттің Баспасөз хатшысы Берік Уәли Абай облысының әкімі қызметіне тағайындалды, деп хабарлайды Алатау телеарнасы Ақорданың баспасөз қызметіне сілтеме жасап.

“Мемлекет басшысының өкімімен Берік Уәли Абай облысының әкімі болып тағайындалды, ол бұрынғы атқарған лауазымынан босатылды”, — делінген хабарламада.

Берік Уәли 1977 жылы Семей облысында дүниеге келген.

Т.Жүргенов атындағы Қазақ мемлекеттік театр және кино институтын «Кинотанушы», Әл-Фараби атындағы Қазақ ұлттық университетін «Журналистика» (магистратура), сондай-ақ Қазақ инновациялық гуманитарлық-заң университетін «Құқықтану» мамандықтары бойынша бітірген.

Еңбек жолын 1997 жылы «Таң» телекомпаниясында «Алматы жаңалықтары» ақпараттық бағдарламасының тілшісі болып бастаған.

• 1998-1999 жылдары – «НТК» телеарнасында «Жаңалықтар» ақпараттық бағдарламасының шығарушы редакторы.
• 2000-2007 жылдары – «31 канал» телерадиокомпаниясында» «Информбюро» ақпараттық бағдарламасының бас редакторы, «Еркін сөз» бағдарламасының авторы әрі жүргізушісі, «Дода» саяси ток-шоуының бас редакторы әрі жүргізушісі.
• 2007-2012 жылдары – «Хабар» Агенттігі» АҚ Ақпараттық бағдарламалар дирекциясы жаңалықтар қызметінің тілшісі, «Бетпе-бет» ақпараттық-сараптамалық бағдарламасының жүргізушісі.
• 2009-2012 жылдары – «Нұр Отан» партиясы «Нұр-Медиа» ЖШС Жемқорлыққа қарсы медиа-орталығының басшысы.
• 2012-2015 жылдары – Оңтүстік Қазақстан облысы әкімі аппарат басшысының орынбасары – баспасөз қызметінің жетекшісі, Ішкі саясат және дін істері басқармасының басшысы.
• 2015-2016 жылдары – «Нұр-Отан» партиясы Төрағасы бірінші орынбасарының кеңесшісі.
• 2016-2018 жылдары – Қазақстан Республикасы Инвестициялар және даму министрінің кеңесшісі, Ақпараттық қамтамасыз ету департаментінің директоры.
• 2017-2018 жылдары – «Қазақстан» ұлттық телеарнасы «1-студия» қоғамдық-саяси ток-шоуының жүргізушісі.
• 2018-2019 жылдары – Жамбыл облысы әкімдігі Ішкі саясат басқармасының басшысы.
• 2019-2022 жылдары – Қазақстан Республикасы Президентінің Баспасөз хатшысы.
• 2022-2023 жылдары – «Хабар» Агенттігі» АҚ басқарма төрағасы.
• 2023 жылғы 12 қыркүйекте Мемлекет басшысының өкімімен Қазақстан Республикасы Президентінің Кеңесшісі – Президенттің Баспасөз хатшысы лауазымына тағайындалды.

«Дарын» мемлекеттік жастар сыйлығының (2011), «Парасат» (2024), «Құрмет» (2019) ордендерінің, ҚР Президенті Алғысының (2021), ҚР Президенті Әкімшілігінің «Мінсіз қызметі үшін» төсбелгісінің (2022) және 5 мерекелік медальдің иегері.

Елімізде ата-атаның жансақтау бөліміндегі баласының қасында болуына рұқсат берілмек. Бірақ бұл жеңілдік тек белгілі ауру түрлеріне ғана байланысты болады, деп хабарлайды Алатау телеарнасы.

Құжат жобасы «Ашық НҚА» порталында жарияланды. Бұйрықта бала аурухананың реанимация бөлімінде жатқанда ата-анасы немесе заңды өкілінің қасында бірге болуға рұқсат берілетіні жазылған.

«Ашық реанимация» қағидаты — анестезиология және реанимация және қарқынды терапия бөлімшесінде балалардың тәулік бойы заңды өкілдерімен бірге болуын ұйымдастыруды көздейді, — делінген құжатта.

Осылайша «Ашық реанимация» қағидаты мүгедектігі бар, онкогематологиялық аурулары бар, паллиативтік көмекке мұқтаж балаларға, өлім аузындағы балаларға, жетім және ата-анасының қамқорлығынсыз қалған балаларға қолданылмақ. 

Денсаулық сақтау министрлігінің мәліметінше, аталған стандартты енгізу балаларға анестезиологиялық және реаниматологиялық көмек көрсетуге оң ықпал етеді. Сонымен қатар теріс салдары жоқ және қосымша шығынды қажет етпейді. 

Құжат жобасы 28 ақпанға дейін қоғамдық талқылауға ұсынылып отыр. 

Қорғаныс министрінің орынбасары Шайх-Хасан Жазықбаев әскери міндетін өтеуден жалтарып жүрген жастарды еріксіз көлікке тиеп алып кетуге қатысты түсінік берді. Сөзінше, жеке көлікпен тасымалдау заңсыз, деп хабарлайды Алатау телеарнасы. 

Министр орынбасарының айтуынша, әскерге шақырудың өзіндік алгоритмі бар көрінеді. Яғни, көшеден жеке көлікпен емес, қызметтік көлікке тиеп алып кетуге толықтай құқы бар екен. 

"Әскерге шақыру алгоритмі бар, ол жергілікті әскери басқару, атқарушы органдар және полиция қызметінің қаулысымен бекітілген. Сіздер желіде тараған видеолардан бір бөлігін ғана көретін шығарсыздар, ал негізінде қызметтік куәлігін көрсетіп, көнбеген жағдайда ғана қолданылатын шара. Ішкі істер министрлігінің өкілі көлікпен алып кетуге міндетті. Бұл жерде Қорғаныс министрлігінің қызметкерлері полицейлерге көмекші. Қорғаныс министрлігі мен Ішкі істер министрлігіне тиесілі көліктермен тасымалдайды, жеке көлікпен тасымалдаса заңсыз, — дейді Шайх-Хасан Жазықбаев. 

Еліміздегі мектептер қыркүйек айынан бастап жаңа ас мәзіріне өтеді. Бұл туралы Оқу-ағарту вице-министрі Еділ Оспанов айтты, деп хабарлайды Алатау телеарнасы.

Вице-министр, мектептердегі ас мәзірі қашан және қалай өзгеретінін былай түсіндіріп отыр.

"Былтыр мектептердегі тамақтану нормалары қайта қаралған болатын. Осы қайта қарау кезінде тұз бен тәттілердің мөлшерін азайту енгізілді. Мектеп буфеттерінде бала денсаулығына зиянды заттардың, газдалған сусындардың сатылуына тыйым салынғанын білесіздер", - деді ол ведомствоның алқа мәжілісінде.

Вице-министрдің сөзінше, бұдан былай мектептің асханасында оқушыларға қандай тамақ берілетінін денсаулық сақтау саласының мамандары ғана айқындай алады.

"Ал жаңа мәзір туралы айтсақ, алғаш рет осындай шешім қабылданғалы жатыр. Мектептердегі тамақтандыру нормалары әлемдік стандарттарға сәйкестендірілді. Осы стандарттың аясында бұдан былай мектептердің ас мәзірін денсаулық сақтау мамандары бекітеді. Бұл келесі оқу жылында, яғни, биылғы қыркүйек айынан бастап іске қосылады", - деді Еділ Оспанов.

Еліміздің бар өңірінде дабыл сиреналары іске қосылады. Төтенше жағдайлар министрлігі бұл ескерту дабылын 6 ақпан күні таңғы уақытта ойнайтынын мәлімдеуде, деп хабарлайды Алатау телеарнасы.

"Баршаның назарына!" дабылы бойынша аумақтық деңгейдегі құлақтандыру жүйесінің дайындығын тексеру мақсатында 2025 жылғы 6 ақпанда, сағат 11.00-де барлық дыбыстық электр дабылы қосылады. Осыған орай тыныштық сақтауларыңызды және үрейге бой алдырмауларыңызды сұраймыз", - делінген хабарламада.

Сонымен қатар 6-7 ақпанда еліміздің оңтүстік және батыс өңірлерінде «Су тасқыны кезеңі жағдайларындағы төтенше жағдайларды жою кезіндегі іс-қимылдарға азаматтық қорғаудың мемлекеттік жүйесінің басқару органдарын, күштері мен құралдарын дайындау» тақырыбы бойынша «Көктем-2025» республикалық командалық-штабтық оқу-жаттығудың 1-ші кезеңі өтеді.

Оқу үйлестіру және жетекшілік ету жөніндегі республикалық штаб Атырауда орналасады. Оқу-жаттығу шеңберінде екі күн бойы Алматы, Шымкент қалаларында, Алматы, Атырау, Ақтөбе, Батыс Қазақстан, Жамбыл, Қызылорда, Маңғыстау, Түркістан және Жетісу облыстарында профилактикалық іс-шаралар кешені өткізіледі.