ЖАҢАЛЫҚТАР

Елімізде лауазымды қызметтер атқаратын әйелдер саны уақыт санап артып келеді. Қазірдің өзінде олардың үлесі 39 пайызға жеткен, деп хабарлайды Алатау телеарнасы.

Бұл туралы Мәдениет және ақпарат министрлігі жазып отыр. Ондағы мәліметке сүйенсек, қазіргі кезде Парламентте 28 әйел депутат бар, бұл жалпы депутаттар санының 18,9%-ы екен. Ал мәслихаттарда әйелдердің үлесі – 22,7%-ға (3 415 депутаттың 774-і) жетті.

Мемлекеттің 21 министрлігінде, денсаулық сақтау, еңбек және халықты әлеуметтік қорғау, мәдениет және ақпарат министрліктерінде 3 әйел министр, 8 вице-министр, 3 аппарат басшысы бар. Сонымен қатар, Қазақстан Республикасы Президентіне тікелей бағынышты және есеп беретін 14 мемлекеттік органда 6 әйел басшылық қызмет атқарады. Ел бойынша судья әйелдердің жалпы саны – 1 248 адам (53%).

2025 жылғы 1 қаңтардағы жағдай бойынша, мемлекеттік қызметтегі әйелдердің үлесі 55,8%-ға (84 482 мемлекеттік қызметшінің 47 158-і – әйелдер) жетті. Басшылық лауазымдардағы әйелдердің жалпы үлесі – 39,1% (23 947 басшының 9 363-і).

Сонымен қатар, Үкімет әйелдер кәсіпкерлігін дамытуға көп көңіл бөлуде. Шағын және орта бизнес иелерінің құрылымында әйел кәсіпкерлердің үлесі 48%-ға жетіп отыр.

Елімізде 2024 жылға арналған көлік салығын төлеу мерзімі аяқталуға жақын. Осы орайда мемлекеттік кірістер комитеті дабыл қақты, деп хабарлайды Алатау телеарнасы.

Комитет дерегіне сүйенсек, жеке тұлғалардың 2024 жылға арналған көлік салығын төлеу мерзімі 2025 жылдың 1 сәуірінде аяқталады. Көлік құралдары салығы сомасын kgd.gov.kz веб-порталындағы калькулятордың және «e-Salyq Azamat» мобильді қосымшасының көмегімен дербес есептеуге болады.

Ең бастысы, яғни, ҚР ҚМ Мемлекеттік кірістер комитетінің баспасөз қызметінің хабарлауынша, 2024 жылға арналған салықты есептеу кезінде 2024 жылы қолданыста болған 3 692 теңге көлеміндегі айлық есептік көрсеткіш қолданылмақ.

Бұл ретте салық органдары есеп айырысу балансын анықтау үшін жыл сайын тиісті жылға жеке тұлғалардың көлік құралдарына салынатын салықты есептейді. Есептелген салық сомалары туралы ақпарат 2025 жылғы 11 наурыздан 31 наурызға дейін екінші деңгейлі банктердің мобильді қосымшаларын пайдаланушыларға PUSH хабарламасы түрінде жіберіледі.

Сондай-ақ, салық сомасы туралы ақпарат kgd.gov.kz веб-порталындағы «Жеке тұлғалар үшін алдағы төлемдер» қызметінде, сондай-ақ «e-Salyq Azamat» және екінші деңгейлі банктердің мобильді қосымшаларында орналастырылады.

Қырғызстан Парламенті білім беруді 12 жыл емес, 10 жылға қысқартуды ұсынды, деп хабарлайды Алатау телеарнасы ҚазАқпаратқа сілтеме жасап.

Жогорку Кенештің Әлеуметтік саясат комитеті әлеуметтік саланы дамыту мәселелері жөніндегі парламент қаулысының орындалуы туралы министрліктердің есебін тыңдады. Депутат Камила Талиева Қырғызстанда 12 жылдық білім беруге көшу жобасының жүзеге асатынына сенбейтінін мәлімдеді. Ол елдің 12 жылдық білім беруге сапалы көшетініне, қажетті оқу материалдарымен қамтамасыз етілетініне сенбейтінін айтты.

"Біз12 жылдық білім беру жүйесіне көшуге дайын емеспіз және жақын арада ауыса алмайсыз. Олар (Білім министрлігі) бұл бағдарламаны жүзеге асыратынына USAID халықаралық ұйымына сенді. USAID-тің 24 жобасының 22-сі жабылып, екі жоба ғана қалды. Олар бұл бағдарламаны USAID жасайды деп үміттенді. 10 жылдық білім беруге көшейік. Тіпті Ұлыбритания КСРО жүйесіне қайта оралуда. Одан да білімнің деңгейі мен сапасын арттырайық. Олардың қайда баратынын көреміз. Олар Сингапур туралы, Малайзия туралы айтады. Олардың мақсаты грантқа түсу, бітті. «Білім беру жүйесі сендерге ойыншық емес, оны құртып жатырсыңдар", - деді депутат.

Алайда Талиева Білім министрлігіне өз мәлімдемесіне қатысты түсінік беруден бас тартты.

Елдегі жұмыссыз адамдар саны белгілі болды. Әсіресе олардың көп бөлігі қай өңірде екені нақтыланған, деп хабарлайды Алатау телеарнасы.

Елімізде жұмысы жоқ ретінде ресми тіркелген адам ғана «жұмыссыз» саналады. ҚазАқпараттың дерегіне сүйенсек, 2024 жылдың 4 тоқсанының қорытындысы бойынша ресми 448 мың жұмыссыз адам есепте тұр.

Еңбек және халықты еңбекпен қамту министрлігінің Халықты жұмыспен қамту департаментінің директоры Азиз Ибрагимов орталық коммуникациялар қызметі алаңында өткен баспасөз мәслихатында олардың ең көп бөлігі қай өңірлерде екенін айтып берді. Сөзінше, ең көп жұмыссыздық Түркістан облысы, Астана қаласы, Алматы қаласы.

Сонымен қатар,  елімізде жұмыссыз ретінде тіркелген азаматтардан бөлек, тіркелмей жұмыссыз жүрген азаматтар да бар.

Жалпы былтыр елімізде 714 мың адам тұрақты жұмыспен қамтылған еді. 

Қазақстандықтар енді кредиттен бас тарту үшін бір ауыз сөзбен тыйым сала алады. Мұндай мүмкіндік тіпті смартфон ұстай алмайтын азаматтарға да қолжетімді, деп хабарлайды Алатау телеарнасы. 

Спутниктің жазуынша, енді қазақстандықтар алаяқтардан бір ғана сөзбен қорғана алады. Бірінші кредиттік бюро дерегіне сүйенсек, адамда ЭЦҚ болмаса, бірақ ол мобильді азаматтар базасында тіркелген болса, онда дауыстық боттың көмегімен кредит рәсімдеуге оңай тыйым салып, қайтадан оңай қоса алады.

Мұны жасау жолдары мынадай:

• 1414 нөміріне қоңырау шалыңыз – бұл тегін;
• сізге ыңғайлы тілді таңдаңыз: қазақ немесе орыс;
• "кредитке тыйым салу" тіркесін айтыңыз;
• осыдан кейін сіз несиелеуге тыйым сала аласыз, оны алып тастай аласыз немесе қызмет туралы ақпарат ала аласыз;
• дыбыстық сигналдан кейін ЖСН енгізіңіз;
• Сізге растау үшін енгізілетін коды бар SMS келеді.

Бұл қызмет әсіресе смартфон пайдаланбайтын немесе интернет қолжетімсіз жандар үшін пайдалы.

Елімізде қазақ тілін оқыту орталықтарында 29 мың қазақ өз ана тілін үйрену үшін барады екен. Мұндай мәліметті ҚазАқпарат жазды, деп хабарлайды Алатау телеарнасы.

Ғылым және жоғары білім министрлігі елдегі тіл оқыту орталықтарында өзінің ана тілін оқып жүргендердің нақты саны туралы ақпаратты ресми сауалға жолдаған. Онда елімізде жергілікті атқарушы органдардың жанынан құрылған 114 тілдерді оқыту орталығы жұмыс істейтіні, олардың 95-і - негізгі орталықтар болса, 19-ы – филиалдары екені жазылған.

2024 жылдың қорытындысы бойынша тіл үйрету курсынан өткендер саны – 63 857 адам. Оның ішінде мемлекеттік тілді оқу курсынан өткендер – 45 841, орыс тілі курсынан өткендер – 4 700, ағылшын тілі – 13 316 адам.

Жергілікті атқарушы органдарда қазақ тілі курсынан өткендер саны – 45 114 адам, оның ішінде 16 517 этнос өкілдері деп жазылған жауапта.

Министрліктің мәліметіне қарағанда тілдерді оқыту орталықтарының бәрі жергілікті бюджеттен қаржыландырылады. Оқу курсына 18 жастан асқан мемлекеттік қызметшілер мен бюджеттік сала қызметкерлері, ұлттық компания өкілдері, үй шаруасындағы адамдар, зейнеткерлер, шетелдік азаматтар, этнос өкілдері тағы да басқа кез-келген өтінім берген азаматтар қатыса алады. Ал мемлекеттік органдар мен ұлттық компаниялар оқыту курстарын өз есебінен қаржыландырады.