ЖАҢАЛЫҚТАР

Алматыдағы Орталық стадионды ретке келтіру жұмыстары қауырт жүргізілуде. Қатаң кестеге сай ойын алаңы Чемпиондар лигасының матчына уақытында дайын болуы тиіс, деп хабарлайды Алатау телеарнасы. 

Бұл туралы Спорт ғимараттары дирекциясы хабарлады. ҚазАқпараттың жазуынша, Алматының орталық стадионы УЕФА-ның төртінші санатына ие. Бұл деңгей Чемпиондар лигасы мен өзге де еурокубоктердің жартылай финалына дейінгі ойындарын өткізуге мүмкіндік береді. Футбол алаңы, жарықтандыру жүйесі, киім ауыстыратын бөлмелер, командалар мен төрешілерге арналған аймақтар барлық талапқа толық сәйкес келеді. Сондай-ақ халықаралық матчтарды өткізуге құқық беретін сертификаттар да бар.

Дегенмен нысанда әлі де жөндеу мен жаңарту жұмыстарын жүргізу керек. Дирекция өкілдері стадиондағы басты олқылықтар ретінде сынып қалған орындықтар мен ескі дәретханаларды атады.

"Стадион ескілеу, ал көрермендердің бір бөлігі нысан мүлкіне ұқыпсыз қарайды", — делінген хабарламада.

Дирекция орталық стадион алдағы «Қайрат» — «Реал Мадрид» ойынына толық дайын болатынын мәлімдеді. Атап айтқанда, қажетті жөндеулер жасалып, тазалық пен қауіпсіздікті сақтау шаралары күшейтіледі, халықаралық деңгейдегі ойындарды өткізуге қойылатын барлық талап орындалады.

"Әдетте матчтардан кейін орындықтардың бір бөлігі зақымдалады, сондықтан олар үнемі тексеріліп, ауыстырылып отырады. Қазір бұл мәселе қатаң бақылауда: креслоларды ауыстыру және қалпына келтіру жұмыстары жүргізіліп жатыр, аумақ абаттандырылды. Бұған дейін санитарлық-гигиеналық тораптарға (дәретханаларға — авт.) жеңіл жөндеу жасалса, қазір кешенді жөндеу басталды", — деп атап өтті Спорттық нысандар дирекциясы.

Елімізде микрокредит беру қағидалары бекітілді. Бұл ақпаратпен Қаржы нарығын реттеу және дамыту агенттігі бөлісті, деп хабарлайды Алатау телеарнасы. 

Бұйрық 2026 жылғы 2 шілдеде күшіне енеді. 

"Микрокредит бойынша сыйақы мөлшерлемесі туралы ақпаратты қамтитын жарнаманы тарату немесе орналастыру кезінде, жылдық тиімді сыйақы мөлшерлемесі цифрлық түрде көрсетіледі. Жылдық тиімді сыйақы мөлшерлемесін жарнамада өзге ақпаратты көрсету кезінде пайдаланылатын қаріптен кіші қаріппен көрсетуге жол берілмейді", — делінген құжатта. 

Микроқаржы ұйымдары клиенттермен жұмыс істеу тәртібі жөніндегі ереже келесі тармақтарды қамтиды:

— клиенттердің құқығы мен мүддесін сақтау саясаты мен рәсімі;
— микрокредит беруге өтінішті қарау рәсімі мен мерзімі (өтініш беру қажет болған жағдайда);
— микрокредит беру кезінде клиентпен өзара іс-қимыл рәсімі;
— мүгедектігі бар және қозғалысы шектеулі жандарға қызмет көрсету тәртібі, қаржы ұйымдарына қойылатын ұлттық стандарт талаптарын ескере отырып (2026 жылғы 2 шілдеден бастап);
— мүгедектігі бар және қозғалысы шектеулі жандарға сенімді тұлғаның қатысуымен қызмет көрсету ерекшеліктері (2026 жылғы 2 шілдеден бастап).

"Микроқаржы ұйымына, микроқаржы омбудсмен немесе сотқа көрсетілетін микроқаржылық қызмет бойынша дау туындаған кезде клиентке оның жүгіну құқығы туралы хабарлайды. Осы мақсатта клиентке микроқаржы ұйымының, микроқаржы омбудсменнің орналасқан жері, электрондық поштасы және интернет-ресурсы (бар болса) туралы ақпарат берілуі тиіс", — деп түсіндірілген бұйрықта.

Елімізде электровелосипедтерді де тіркеу міндеттелді. Алматы полициясы қазірдің өзінде қуаты 250 ваттан асатын және сағатына 25 шақырымнан жоғары жылдамдықпен жүретін электровелосипедтердің міндетті түрде тіркелуі керек екенін ескертуде, деп хабарлайды Алатау телеарнасы.

Полиция мәлімдеуінше, мұндай санаттағы электровелосипедтер заң бойынша мопед санатына жатады. Бұл туралы ҚазАқпарат жазды. 

Алматы Полиция департаменті әкімшілік полиция басқармасының процессинг орталығының басшысы Айдын Меркімбаев Өңірлік коммуникациялар қызметінде өткен брифингіде кейінгі жылдары электровелосипедшілер саны едәуір артқанын айтты. Алайда бұл қала тұрғындарына ыңғайлы әрі экологиялық тұрғыда таза көлік болғанымен, оны пайдаланар кезде заң талаптары ескеріле бермейді.

Тіркеу қалай жүргізіледі?

Қазіргі үлгідегі көптеген электровелосипед сағатына 40-45 шақырымға дейін жылдамдық алып, қуаты 400 ваттан асатын қозғалтқышпен жабдықталған. Бұл қарапайым велосипед емес, заң бойынша мопед ретінде тіркелуі қажет.

Тіркеу рәсімі мыналарды қамтиды:

• техникалық паспорт алу;

• мемлекеттік тіркеу нөмірін беру;

• сақтандыру полисін рәсімдеу;

• жүргізушінің «А» санатындағы куәлігінің болуы.

Бұл үшін иесі арнайы автоХҚО-ға жүгінуге тиіс. Онда көлік құралы тексеріліп, VIN-код беріледі және нөмірлік белгі рәсімделеді. Барлық қызмет қолданыстағы заңнама аясында көрсетіледі. Айдын Меркімбаевтың айтуынша, процедура мопедті тіркеумен бірдей.

Айыппұл мен жауапкершілік

Тіркелмеген электровелосипедті айдағандарға 10 АЕК (39 320 теңге) көлемінде айыппұл салынады. Сондай-ақ көлік айыптұраққа қойылады.

Айдын Меркімбаевтың сөзінше, тіркелмеген электровелосипедтер жол қозғалысына қатысушыларға қауіп төндіреді. Мұндай көліктерді ұрлық немесе апат кезінде бақылау қиын, ал жол-көлік оқиғасының барлық салдары жүргізушінің өз мойнында.

Жол апаты статистикасы

Полицияның дерегінше, жыл басынан бері Алматыда мопедтер 534 рет жол апатына ұшыраған.

10 мыңнан астам жүргізуші әкімшілік жауапкершілікке тартылып, 1 700 көлік айыптұраққа қойылыпты. Электросамокат пен электровелосипедтің иелері 12 мыңға жуық құқықбұзушылық жасаған.

Алматылық "Қайрат" футбол клубы чемпиондар лигасының негізгі кезеңіне жолдама алғаннан кейін елімізге карольдік клуб Реал Мадрид келетін болды. Тіпті алғашқы ойын 30 қыркүйекке белгіленіп отыр, деп хабарлайды Алатау телеарнасы. 

"Қайрат" футбол клубы "Селтик" командасының әлсіз тұсын пенальти кезеңінде тапқаннан кейін Чемпиондар лигасының негізгі туында өнер көрсетеді. Жеребе тартылды. Футболшыларымызды әлемдік ірі клубтармен ойын күтіп отыр. Алғашқы кездесу карольдік клуб Реал Мадридпен Алматының Орталық стадионында өтеді. 

Десе де, бүгінде әлеуметтік желіде бұл ойынға билеттердің сатылымға шығып кеткені, бағасының тым жоғары болуы халықты әбден сарсаңға салды. Осы олқылықтың шын-өтірігіне қатысты алматылық клуб ресми мәлімдеме жасады. Онда ойынға қатысты билеттердің әлі сатылымға шықпағанын кесіп айтты. 

"Әлеуметтік желілерде таралып жатқан «Қайрат» — «Реал Мадрид» УЕФА Чемпиондар лигасы матчының билетін сату немесе алдын ала брондау жайлы ақпарат — шындыққа жанаспайтын, жаңсақ хабарлама. Билетке қатысты жалғыз ресми дереккөздер — клубтың ресми сайты мен «Қайрат» ФК-ның әлеуметтік желідегі ресми парақшалары. Қазіргі уақытта билеттің сатылымға шығу күні мен бағасы бекітілген жоқ. Жанкүйерлерден бөгде хабарландыруларға сенбеулерін және билетті бейресми арналар арқылы сатып алмауларын қатаң түрде сұраймыз", — делінген клубтың хабарламасында.

Сонымен қатар, футбол клубы өзінің instagram-дағы парақшасында нақты ойындар кестесін жариялаған. 

18.09 – «Спортинг» (қонақта)
30.09 – «Реал Мадрид» (өз алаңында)
21.10 – «Пафос» (өз алаңында)
05.11 – «Интер» (қонақта)
26.11 – «Копенгаген» (қонақта)
09.12 – «Олимпиакос» (өз алаңында)
20.01 – «Брюгге» (өз алаңында)
28.01 – «Арсенал» (қонақта)

Айта кетейік, Реал Мадридпен кездесу 30 қыркүйек күні Алматының Орталық стадионында өтеді. Матч жергілікті уақыт бойынша сағат 21:45-те басталады.