ЖАҢАЛЫҚТАР

Алматы қаласында жыл басынан бері 19 778 жұп заңды некеге тұрған. “Азаматтарға арналған үкімет” мемлекеттік корпорациясынан мәліметіне сүйенсек, биыл ел бойынша оңтүстік шаһар неке саны бойынша көш бастады, деп хабарлайды Алатау телеарнасы. 

Жалпы қала бойынша аудандық АХАТ бөлімдерінде күніне 160-қа жуық жұп некесін қидырып заңдастырады екен. Некеге өтініш берген жұптардың орташа жасы ерлер үшін 27 жас, әйелдер үшін 25 жас.

“ҚР «Неке және отбасы туралы» Кодексінің 10-бабына сәйкес, неке жасы еркектер мен әйелдер үшін он сегіз жас болып белгіленген. Десе де заң ортақ бала болғанда немесе жүктілік кезінде бұл жасты төмендетуге мүмкіндік береді”, – дейді Әуезов аудандық АХАТ бөлімінің басшысы Гүлзия Баимбетова.

Сондай-ақ, Алматыда ажырасуға өтініш бергендердің де саны азаймай отыр. Жыл басынан бері 4429 жұп некесін бұзған. Әдетте АХАТ қызметкерлері ерлі-зайыптыларға ажыраспас бұрын 1 ай уақыт беретінін еске салды.

“Көбіне ажырасуға өтінішті жастар беріп жатады. Ондай кезде барынша некені сақтап қалуға тырысамыз, ойлануға уақыт береміз. Өтініш берген 10 жұптың, 3-4 жұбы қайтып келмейді. Ол да біздің жұмысымыздың жемісі деп есептейміз”, – деп атап өтті АХАТ қызметкерлері.

Естеріңізге салса кетейік, неке қию туралы өтініш 15 күнтізбелік күн бұрын берілу керек. Аталмыш қызмет электронды үкімет порталы немесе екінші деңгейлі банктердің қосымшалары арқылы онлайн режимінде қолжетімді. Жас жұбайлар АХАТ бөлімінде некелерін салтанатты түрде қиятын болса, қосымша қызметке тапсырыс бере алады.

Елімізде енді жолаушылар пойыз күтпей-ақ, вагоннан вагонға ауысу қызметі арқылы билет сатып ала алады, деп хабарлайды Алатау телеарнасы. 

Жаңа бастама неміс мамандарымен бірлесіп іске қосылды. Оған сәйкес, пойызбен белгілі бір жерге апаратын билет болмаса, вагоннан вагонға ауысып жетуге болады.

Қызметті пайдалану тәртібі:

Жолаушы bilet.railways.kz сайтына кіреді;

Бағыт пен сапар күнін таңдайды;

Тікелей билет болмаған жағдайда, жүйе автоматты түрде "пойыз+пойыз" немесе "вагон+вагон" ауысу қызметтерін ұсынады;

Балама нұсқаларды қарау үшін "Вагоннан вагонға ауысу" бөлімін таңдау қажет;

Ұсынылған нұсқалардың ішінен бір пойыз аясындағы қолайлы билет нұсқасын таңдайды.

Билетті рәсімдеу үшін жолаушы қажетті жеке ақпаратты толтырады.

"Мәселен, жолаушы 28 желтоқсан күні "Астана-Алматы" бағытына билет сатып алуды жоспарлайды. Алайда бұл бағытта орын болмаған жағдайда жолаушы әуелі "Астана-Ағадыр" бағытына билет сатып алып, кейін "Ағадыр-Алматы" бағытына сол пойыздың басқа вагонынан билет рәсімдей алады", - дейді мамандар.

"Вагоннан вагонға ауысу" қызметі жолаушыға бір пойызда орын ауыстырып, екі бөлек билет арқылы баратын жерге жетуге мүмкіндік береді.

Елімізде төл теңгенің құлдырауы 2025 жылы да күтілмек. Қазақстан қаржыгерлер қауымдастығы тіпті көк қағаздың бұдан әрі де нығая беретінін болжап отыр, деп хабарлайды Алатау телеарнасы ҚазАқпаратқа сілтеме жасап. 

Сарапшылар мәліметіне сүйенсек, 2025 жылы теңгенің 1 АҚШ долларына шаққандағы мәні 542,2-ге дейін өспек. 

“Ұлттық валютаның бағамы 2023 жылдың қорытындысындағы деңгейге қарағанда 12,7 пайыз бәсең деңгейде нығайғаннан кейін 2024 жылды 10 пайыздан асатын құлдыраумен аяқтауы мүмкін. Оған ішкі нарықта шетелдік валютаға деген сұраныс ұсыныстан әлдеқайда артуы түрткі болады. 2025 жылы USDKZT бағамы 545,2 теңгеге дейін (қазіргі мәнінен 6 пайыз жоғары) жетуі мүмкін. Теңгенің бағамына шикізат бағасының төмендігі, ОПЕК+ келісімінің аясында мұнай өндіру көлемінің кемуі, Қазақстан шикізатын тұтынатын Қытай, Еуроодақ сияқты негізгі серіктестердің экономикасындағы іркілістері, күннен-күнге өсіп жатқан импорт қысым жасауы ықтимал,” - деп жазады қауымдастық сарапшылары.

Елімізде несие мәселесі көп халықтың мойнындағы жүгі ауыр жайттың бірі. Десе де қаржылық реттеу агенттігі кредитке әйел адамдардың барынша жауапты екенін анықтаған, деп хабарлайды Алатау телеарнасы.

Агенттік дерегіне сүйенсек, елдегі әйелдерге қарағанда ерлер кредитін көп кешіктіретін көрінеді. Қазақстанда банктер мен түрлі қаржылық ұйымдардан қарыз алып, уақытында қайтара алмай жүрген жеке тұлғалардың 52 пайызы – ер адамдар.

Бұл ретте ер адамдар кейінгі 5 жыл ішінде дефолтқа түскен қарыздардың 59 пайыз үлесін алған. Яғни, ерлерге қарағанда әйелдер аз да болса несиені мезгілінде төлеуге тырысады.

Тиісінше, әйелдерге қарағанда ерлердің кредиттері көбірек кешірілген. Қаржылық реттеу агенттігінің мәліметінше, есептен шығару статистикасында заемдардың саны бойынша да (52%), кешірілген берешектің сомасы бойынша да (59%) еркектер басым түсіпті. Кешірілген несиелердің орта мөлшері ерлерде – 545,5 мың теңге болса, әйелдерде – 438,3 мың теңге.

Осыған қарамастан банктер сомасы 15 миллион теңгеден асатын ірі кредиттерді ерлерге көбірек береді. 2 миллионға дейінгі ұсақ қарыздарда ғана әйелдердің үлесі басым.

Елімізде бүгіннен бастап жол қауіпсіздігін арттыруға және жол-көлік оқиғаларының санын азайтуға бағытталған заң күшіне енді. Жаңашылдық халықаралық және республикалық маңызы бар жолдармен жүретін барлық жүргізушілерге қатысты, деп хабарлайды Алатау телеарнасы Polisia.kz-ке сілтеме жасап.

Жаңа заң бойынша енді тас жолдағы орташа жылдамдық камералар арасында есептелетін болады. Яғни автобандағы белгілі жылдамдық шегінен асырып, келесі камералы учаскеге есептелген уақыттан бұрын жеткен көлік жүргізушілеріне айыппұл салынбақ.

«Бұл өзгерістердің негізгі мәні автоматты түрде тіркеу жүйелерімен анықталатын түзу сызықты учаскелерде «орташа жылдамдықтан» асып кеткені үшін жауапкершілікті енгізу болып табылады. «Орташа жылдамдық» жүріп өткен жолды сол жолды жүріп өткен уақыт аралығына бөлу арқылы есептеледі. Айыппұл рұқсат етілген «орташа жылдамдықтан» асып кетуіне байланысты 5-тен 40 АЕК-ке дейін болады. Яғни, жолдардың әр түрлі учаскелерінде «орташа жылдамдық» әр түрлі болады, себебі формулаға сәйкес әр автокөлік автоматты түрде есептеледі. Бұл жаңалық талдауды ескере отырып енгізілді, себебі қала маңындағы трассалардағы әрбір үшінші адам жылдамдық режимінің асып кетуінің салдарынан көз жұмған. Осы өзгерістерге байланысты ІІМ жол жүрісіне қатысушылардың барлыған қағидаларды сақтауға және басқа қатысушыларды құрметтеуге шақырады. Жолдағы қауіпсіздікті арттыру — бұл ортақ міндет», — деді ІІМ әкімшілік полиция комитеті ерекше тапсырмалар жөніндегі аға инспекторы Ақтоты Боранова.

https://www.youtube.com/embed/dH0PAnjXvlw?si=6rWy8sd53bfeXN3V" 

Алматы облысы Кеген ауданы Кеген ауылындағы балалар өнер мектебіне халқымыздың адал ұлы, Мемлекет және қоғам қайраткері Заманбек Нұрқаділовтің есімі берілді. Салтанатты шарада сондай-ақ, бюсті де ашылып отыр, деп хабарлайды Алатау телеарнасы.

Аталмыш өнер мектебі 2015 жылы қолданысқа берілген. Содан бері мұнда балалар 3 бағыт, 9 мамандық бойынша білім алады. Домбыра, баян, қобыз, дәстүрлі ән, эстрада-вокал, фортепиано, хореография, бейнелеу және мүсін, бейнелеу және графика, қолөнер және ағаш бұйымдарын жасау, сәндік қолданбалы өнер, сонымен қатар түрлі үйірмелердің бағыттары бойынша  жұмыс істейді.  

Қосымша - кәсіби білім беру мектебінде 44 жоғарғы білімді мұғалім жұмыс істейді. Бүгінде бала саны 890 оқушыға жеткен. Соған байланысты аудан ауылдарында өнер мектебінің бөлімшелері ашылған. Атап айтқанда Жалағаш, Жылысай, Ұзынбұлақ, Ақсай, Жалаулы, Тұйық, Қарқара, Бөлексаз, Талды, Шырғанақ, Тасашы ауылдық интернаттағы балаларды қосымша білімге тартып  салт-дәстүрге, өнерге деген құлшыныстарын арттырып, әр түрлі мамандық бойынша білім алып келеді.

Сонымен қатар, биылғы оқу жылында Шырғанақ  ауылынан  ата – аналардың  сұранысы бойынша домбыра сыныбы ашылды.

Мектептің 38 оқушысы халықаралық байқаулардан, 176 білім алушы Республикалық байқаулардан, тағы 158-і облыстық, 82-сі аудандық, әрі 63 өнерпаз аймақтық байқаулардан жүлделі орындарға ие болған.

Салтанатты шара аясында, сонымен қатар Мемлекет және қоғам қайраткері Заманбек Қалабайұлы Нұрқаділовтің «Не только о себе» кітабын тарату рәсімі өтеді.