НОВОСТИ

Алматы облысында жаңа Алатау қаласы құрылды. Бұл туралы Ұлттық экономика министрлігі жазды, деп хабарлайды Алатау телеарнасы. 

Ондағы дерекке сүйенсек, қала халқының саны 52,7 мың адамды құрайды. Ал қаланың жалпы ауданы – 88 мың гектар. 

ҚР Президентінің тапсырмасын іске асыру аясында Ұлттық экономика министрлігі Алатау қаласын құру жөніндегі ұйымдастыру іс-шараларының («Алматы облысының әкімшілік-аумақтық құрылысының кейбір мәселелері туралы») Жоспарын әзірледі.

Жоспарға сәйкес, Ұлттық экономика министрлігі Алматы облысының әкімдігімен бірлесіп экономикалық есептерді, жаңа қаланың схемалық картасын дайындау бойынша жұмыстар жүргізді. Сондай-ақ халықпен жиын өткізіліп, соның негізінде Алматы облысы мен Іле, Талғар аудандары және Қонаев қаласы мәслихаттарының шешімдері қабылданды.

Жаңа қаланы құру жол желілері, инженерлік, әлеуметтік инфрақұрылым объектілерін модернизациялауға, жаңа жұмыс орындарын ашуға, инвестицияларды, технологияларды, қосымша қаржы ағындарын тартуға, кәсіпкерлік белсенділікті дамытуға, салық түсімдерін ұлғайтуға мүмкіндік береді. Бұл өз кезегінде өңірдің инвестициялық тартымдылығы мен экономикалық тұрақтылығын жақсартуға ықпал етеді.

Сонымен қатар, Үкімет АЭА (арнайы экономикалық аймақ) аумағын 30 мың гектардан 96,5 мың гектарға дейін кеңейту мен G4 City АЭА-ны Alatau АЭА-ға қайта атау туралы шешімді мақұлдады. Осылайша, Алатау қаласының барлық аумағы және Қонаев қаласының бір бөлігі АЭА аумағына жатқызылады.

Арнайы экономикалық аймақ аумағында қызметтің басым түрлері бойынша ЭҚЖЖ-ның (экономикалық қызмет түрлерінің жалпы жіктеуіші) 17 атауы негізінде 110 мың жаңа жұмыс орнын құра отырып, жалпы сомасы 12,5 трлн теңгеге 170-тен астам жобаны орналастыру көзделіп отыр.

Болжамды деректерге сәйкес, АЭА объектілері жобалық қуатына шыққаннан кейін бүкіл кезеңдегі бағаланған жиынтық үлесі 47,3 трлн теңгені, оның ішінде мультипликативтік әсері 17 трлн теңгені құрайды. Айта кетерлігі, мемлекеттік инвестицияның әрбір 1 теңгесіне 3,8 теңге жеке инвестиция тартылатын болады.

Елімізде биыл көпбалалы отбасыларға берілетін жәрдемақы көбейді, деп хабарлайды Алатау телеарнасы. 

Закон.кз-тің жазуынша жәрдемақы мөлшері бала туған кезде берілетін жәрдемақылар Әлеуметтік кодекстің 80-ші бабында айқындалады және ол айлық есептік көрсеткіштермен (АЕК) белгіленеді.

"2024–2026 жылдарға арналған республикалық бюджет туралы" Заңға сай, 1 АЕК - 3 мың 692 теңге болып белгіленген. Алғашқы 3 баласын туғандарға 38 АЕК – яғни 140 296 теңге жәрдемақы тағайындалды. 4-ші және одан да көп бала туғандарға 63 АЕК көлемінде бірретік жәрдемақы төленеді. Сонымен қатар егер егіз немесе үшем туған болса, жәрдемақы баланың әрқайсысына жеке тағайындалады.

Бұл – бір реттік жәрдемақы мөлшері. Көпбалалы отбасыларға ай сайынғы жәрдемақы да көбейген.

Әлеуметтік кодекстің 91-бабына сай, оның мөлшері мынадай: 4 балаға шамамен 59183 теңге, ал 5 балаға шамамен 74 мың, егер отбасында 8 немесе одан да көп болса, әр балаға 4 айлық есептік көрсеткіш көлемінде төленеді.

Егер отбасында 8 және одан да көп бала болса, әр балаға 4 АЕК, яғни 8 балаға 32 АЕК (118 144 теңге).

2024 - тарихтағы ең ыстық жыл болмақ. Ғалымдар тіпті аптап барлық рекордты бұзу мүмкін екенін алға тартуда, деп хабарлайды Алатау телеарнасы. 

Закон.кз-тің жазуынша, 2023 жыл тарихтағы ең ыстық жыл болған. Десе де биыл бұл рекорд бұзылуы мүмкін. 

"Температураның жоғарылауы Эль-Ниньо құбылысымен байланысты болады. Бұл экваторлық Тынық мұхитындағы судың беткі қабатының температурасының ауытқуымен байланысты жылыну", - дейді ғалымдар.

2023 жылы Эль-Ниньо зардаптарының бірі Орталық Америкадағы құрғақ ауа райы болды, бұл Панама каналын, Гатунды қоректендіретін негізгі көлдің құрғауына әкелген. Соның салдарынан арнадағы судың деңгейі төмендеп, өткізу қабілеті айтарлықтай төмендепті.

Дүниежүзілік метеорологиялық ұйым жетекшісі Петтери Таалас 2024 жыл бұрынғыдан да "жылырақ" болатынын, әрі құрғақшылық немесе су тасқыны сияқты төтенше оқиғалардың көбейетінін де болжап отыр. 

Дүние жүзіндегі температураның бұлайша көтерілуі ғалымдардың бірнеше жылдар бойы ескертіп келе жатқан қайтымсыз климаттық өзгерістерге қауіпті түрде жақындатады. Одан әрі жылыну - дауыл, құрғақшылық, су тасқыны және орман өрттері сияқты экстремалды ауа райы оқиғаларына әкелмек.

Соңғы күндері коронавирус індетінің қайта күш алуы әлемді алаңдатып отыр. Осы орайда денсаулық сақтау министрлігі елімізде бетперде тағу мәселесіне жауап берді, деп хабарлайды Алатау телеарнасы. 

Министр Ажар Ғинаяттың айтуынша, елде індетті жұқтыру жағдайға бақылауда. Көбіне бұл вирустың шырмауына қарттар түсіп жатқан көрінеді. Одан бөлек созылмалы ауруы бар науқастар, әсіресе тыныс алу және жүрек-қан тамырлары дертіне шалдыққандарға да оңайға соқпайтың көрінеді.

"Біз маска тағуды ұсынамыз. ЖРВИ маусымы қалай басталады, яғни қазан-мамыр айлары аралығында бас санитарлық дәрігердің қаулысымен маска кию ұсынылады. Сонымен қатар медициналық ұйымдарда да маска режимі енгізіледі. Маскаға қатысты тағы бір нақтылағым келеді, біз тек ұсынамыз", - дейді министр. 

Сондай-ақ, ол осы орайда жоғарыдағы азаматтарға ревакцинациядан өтуді ұсынды. Әрі өткен жылы 350 мың азамат COVID-19 инфекциясына қарсы екпе алғанын да айта кетті. 

Еске салайық, бұған дейін Дүниежүзілік денсаулық сақтау ұйымы COVID-19 вирусының қайта күш алғанын мәлімдеп, халықты бетперде киюге шақырғанын жазған едік.

Дүниежүзілік денсаулық сақтау ұйымы COVID-19 вирусының қайта күш алғанын мәлімдеп, халықты бетперде киюге шақырды, деп хабарлайды Алатау телеарнасы. 

COVID-19 күшейді деп дабыл қаққан ұйым басшысы Тедрос Гебрейесус көптеген елде бірнеше апта ішінде сырқаттар санының артуына байланысты барлығын бетперде киюге және COVID-19-ға қарсы вакцина алуға шақырды.

"COVID-19, тұмау және басқа қоздырғыштар тудыратын респираторлық аурулар саны бірнеше апта ішінде көптеген елде өсті және бұл мерекелерден кейін де артуы мүмкін деген болжам бар", - деп жазды Тедрос әлеуметтік парақшасында.

Осыған байланысты ол барлығын COVID-19-ке тест тапсыруға және қажет болған жағдайда медициналық көмекке жүгінуге шақырған. Әрі барынша жұқпалы аурудан сақтану үшін маска киіп, қашықтықты сақтауға үндеп отыр. 

Соңғы күндері такси жүргізушілерінің қолма-қол ақша талап етуі мәселесі жиі айтыла бастады. Осы орайда Алматы қаласының Мемлекеттік кірістер комитеті өзекті жайтқа жауап берді, деп хабарлайды Алатау телеарнасы. 

Өңірлік коммуникациялар қызметінде өткен брифингте Алматының Мемлекеттік кірістер департаментінің өкілдері өзекті мәселелерге жауап берді. Ол қатарда такси қызметкерлерінің төлемді аударыммен қабылдаудан бас тартып, қолма-қол ақша талап еткен мәселесі де бар. Департаменттің түсіндіру жұмыстары және байланыс орталығы басқармасының басшысы Айжан Бекеева мұндай әрекеттер заңсыз екенін алға тартты. 

«Егер адам такси қызметін көрсетсе, онда ол тиісінше жеке кәсіпкер ретінде тіркелуі тиіс. Сіз такси агрегаторлары арқылы, арнайы қосымшаларда тіркеле аласыз. Оның өз пайыздары бар. Сіз e-Salyq Business немесе Яндекс таксиде жеке кәсіпкер ретінде тіркеліп, басқа әлеуметтік төлемдермен бірге ай сайын 1 пайыз төлей аласыз. Қазір салық міндеттемелерін орындау жеңілдетілді. Есеп беруді тапсыру да жеңілдетілген. QR-кодтарды орналастыру да қиындық туғызбайды. Қолма-қол ақшасыз төлемдерді қабылдаудан бас тарту заңсыз болып табылады. Біз бұған дейін айтқанымыздай, салық режимдерін қолданудың арнайы түрлері бар. Такси жүргізушілері үшін салық жүктемесінің пайызы небәрі 1 пайыз болатын режим өте ыңғайлы. Яғни, адам бір ай бойы такси болып жүріп, 100 мың теңге тапса, оның 1 пайыз салығы – 1000 теңге. Оған қоса оның әлеуметтік төлемдері. Сонымен, бұл қосымша не үшін ыңғайлы? Кассалық машина қазірдің өзінде орнатылған. Ай сайынғы қызметті сатып алу, төлеу қажеттілігі жоғалады. Яғни, ол такси қызметін көрсете алады, чекті электронды форматта жазып, оны клиентке жібере алады», – деп атап өтті ол. 

Сонымен қатар, мамандар қолма-қол ақшасыз төлемдерді қабылдаудан бас тарту фактілері болған жағдайда Мемлекеттік кіріс органдарына хабарлау қажет екенін еске салды.