НОВОСТИ

Мәдениет және ақпарат министрі Аида Балаева қазақ тіліндегі телерадио хабарлары 70 пайызға артатынын мәлімдеді, деп хабарлайды Алатау телеарнасы. 

Бұл туралы министр орталық коммуникациялар қызметі алаңында өткен баспасөз мәслихатында айтты. Сөзіне сүйенсек, бүгінде БАҚ-та мемлекеттік тілде шығарылатын контенттің үлесі 80 пайыздан асқан. Осы орайда телерадио тілін де қазақшалау жоспарланып отыр.

“Масс-медиа” туралы заң жобасы аясында телерадиоарналарды мемлекеттік тілде тарату көлемін 50 пайыздан 70 пайызға арттыру ұсынылды. 1999 жылы қолданысқа енгізілген “БАҚ туралы” заңға сәйкес 50-де 50 еді. 25 жылға жуық уақыттан кейін елдегі трендтер мемлекеттік тіл мен отандық контентті дамыту бағытында өзгерді. Бүгінгі таңда БАҚ-та мемлекеттік тілде шығарылатын контенттің үлесі 80 пайыздан асты. Аталған факторларды ескере отырып, қазақ тіліндегі телерадио хабарларын 70 пайызға дейін арттыру туралы шешім қабылданды. Ал 2025 жылдан бастап жыл сайын мемлекеттік тілдегі контенттердің үлесін 5%-ға арттыру кезең-кезеңмен жүзеге асырылады. Қазір “Масс-медиа” туралы заң жобасын Мәжілістің жұмыс тобы, шетел сарапшыларды, Қазақстанның медиа қоғамдастығы және азаматтық қоғам өкілдері талқылап жатыр”, - деді министр.

Қытайдың Ханжчоу қаласында өтіп жатқан Азия ойындарында қазақстандық спортшылар алтын санын тоғызға жеткізді. Бүгін каратеші Қайсар Алпысбай топ жарды, деп хабарлайды Алатау телеарнасы. 

60 келі салмақ дәрежесінде ел намысын қорғаған Қайсар финалда Кувейт елінің спортшысы Абдулла Шаабахпен сайысты. Аса тарытсты өткен жекпе-жектің есебі: 7-5. Осылайша отандасымыз қоржынға тоғызыншы алтын жүлдені салды. 

Еске салайық, бұған дейін қазақстандық спортшылар бір күнде 3 алтын медальға ие болғанын жазған едік.

Ел Президенті Қасым-Жомарт Тоқаев "Самұрық-Қазына" АҚ басқарма төрағасы Нұрлан Жақыповты қабылдады, деп хабарлайды Алатау телеарнасы. 

"Самұрық-Қазына" АҚ басқарма төрағасы Мемлекет басшысына Қордың биылғы 8 айда атқарған жұмысының қорытындысы жөнінде баяндады. Нұрлан Жақыпов «Самұрық-Қазына» АҚ компаниялар тобының өндірістік және қаржылық көрсеткіштері, сондай-ақ жыл қорытындысы бойынша күтілетін нәтижелерін таныстырды. Әрі қорға қарасты компаниялар тобының маңызды жобаларын жүзеге асыру барысы жөнінде мәлімет берді. Атап айтқанда:

• жыл соңына дейін алты ірі жобаны, атап айтқанда Астрахан – Маңғышлақ су құбырын реконструкциялау;
• «Сарша» және «Жылы жағажай» елді мекендеріне газ құбырын тарту;
• Бейнеу – Жаңаөзен газ құбырының 2-ші желісін және Мақат – Солтүстік Кавказ газ құбырының лупингін салу;
• Бірінші ГРЭС-тің 1-ші блогын қалпына келтіру;
• Еліміздің Бірыңғай электрэнергетикалық жүйесіне қарасты батыс аймағындағы электр желілерін күшейту жобаларын аяқтау жоспарланып отыр.

Мемлекет басшысына Қор активтерін жекешелендіру жоспарының іске асырылу барысы жөнінде мәлімет берді.

Кездесу соңында Қасым-Жомарт Тоқаев инвестициялық жобаларды жүзеге асыру, сондай-ақ "Самұрық-Қазына" қорына қарасты бейінді емес активтерді жекешелендіру және компанияларға халықтық IPO өткізу жөнінде бірқатар нақты тапсырма берді.

Қытайдың Ханжчоу қаласында өтіп жатқан Азия ойындарында қазақстандық спортшылар алтын санын бүгін сегізге жеткізді, деп хабарлайды Алатау телеарнасы. 

Джиу-джитсу сайысында финалға шыққан Нұржан Батырбеков 69 келіге дейінгі салмақта Біріккен Араб әмірлігінің өкілі Мохаммед Аль-Суваидимен күресті. Қазақстандық спортшы қарсыласын 4:2 есебімен жеңіп, Азиада чемпионы атанды.

Осылайша алтын қорын жетіге жеткізген. Көп ұзамай қазақстандық каратэші 75 келіге дейінгі салмақта иорданиялық Хасан Масарвехпен алтын жүлдені сарапқа салды. Нұрқанат қарсыласын 8:0 есебімен айқын басымдықпен ұтып, Қазақстан қоржынына сегізінші алтын медальді салды.

Сонымен қатар қазақстандық велошабандоз Евгений Федоров Ханчжоудағы Азия ойындарында алтын медаль иеленді. Ол топтық жарыста 207,7 шақырым қашықтықты 4:25:29 уақытта жүріп өтті.

Мемлекет басшысы Қасым-Жомарт Тоқаев CNPC компаниясы Директорлар кеңесінің төрағасы Дай Хоулянды қабылдады, деп хабарлайды Алатау телеарнасы. 

Кездесу барысында Қазақстан мен China National Petroleum Corporation (CNPC) компаниясының мұнай-газ саласындағы ынтымақтастығының перспективасы талқыланды.

Қасым-Жомарт Тоқаев Дай Хоулянға көмірсутегі кен орындарын барлау және өндіру жұмыстарын жалғастырудың маңыздылығын айтып, Шымкент мұнай өңдеу зауытының өндірістік қуатын арттыру жөніндегі жобаның еліміз үшін мәні зор екенін атап өтті. 

Сонымен қатар кездесуде Қытайға газ экспорттауға және Бейнеу – Бозой – Шымкент жаңа газ құбырының желісін салу жобасына, сондай-ақ Қазақстан мұнайының ҚХР-ға экспорт көлемін ұлғайтуға қатысты мәселелер қарастырылды.

Азия ойындарында ел спортшылары қоржынға бесінші алтын салды, деп хабарлайды Алатау телеарнасы. 

Бұл жолғы жүлде веложарыстан. Алексей Луценко шосседегі веложарыста ұзындығы 39,6 шақырым қашықтықта 48:05.75 нәтижемен үздік шықты. Осылайша Қытайдың Ханжчоу қаласында өтіп жатқан Азия ойындарында жеңімпаз атанды. 

Бұл сайыс бойынша қытайлық Сю Мин екінші, гонконгтық Винсент Лау үшінші орынға ие болды.