ЖАҢАЛЫҚТАР

Елдегі туристік аймақтардың тізімі кеңейеді. Осылайша министрлік оның санын арттыруды көздеп отыр, деп хабарлайды Алатау телеарнасы. 

Өткен жылдың қорытындысы бойынша 131 миллиард теңгеге 33 жоба жүзеге асырылған. Енді туристік аймақтардың тізімі ТОП-20-ға дейін кеңейтілмек. Бұл туралы Үкімет отырысында Туризм және спорт министрі Ермек Маржықпаев айтты.

"Биыл басым туристік аймақтардың тізімі ТОП-20-ға дейін кеңейтілді. Осылайша, барлық аймақта өсудің ең перспективалы орындары анықталды. Әр дестинацияда басым туристік аймақтар құру жоспарланып отыр. Министрлік туризмде инфрақұрылымдық жобалардың іске асырылуына тұрақты негізде мониторинг жүргізеді. Өткен жылдың қорытындысы бойынша 131 млрд теңгеге 33 жоба жүзеге асырылды", - деді ол.

Оның атап өтуінше, 2023 жылы Маңғыстау облысының "Жылы жағажайына" инфрақұрылымды жеткізу бойынша бірқатар жобалар аяқталды. Биыл Алматы, Шымкент және Қызылорда қалаларында үш әуежай терминалының құрылысын аяқтау жоспарланған.

Әйелін азаптап өлтірді деген күдікке ілінген экс министр Қуандық Бишімбаев кінәлі деп танылып, 24 жылға бас бостандығынан айырылды, деп хабарлайды Алатау телеарнасы.

Ал, оның туыс інісі Бақытжан Байжанов 4 жылға түрмеге тоғытылады. Бүгін үкім шығатын күні сот отырысына марқұм Салтанат Нүкенованың ата-анасы келді. Олар бұл өте қиын жағдай, ешкімнің басына бермесін. Біз неше рет өліп, неше рет тірілдік деп БАҚ өкілдеріне сұхбат берді. Алайда, бүгінгі үкіммен Бақытжан Байжанов келіспейтінін айтып, соттан не үшін өзін бұлай ауыр жазаға кескінін сұрады. Өз кезегінде, судья Құлбаева сот үкімі күшіне енгеннен кейін 15 күн ішінде аппеляциялық шағым беруге болатынын ескертті. 

"Қуандық Бишімбаев кінәлі деп танылып, 24 жылға бас бостандығынан айырылсын. Бақытжан Байжанов кінәлі деп танылып, 4 жылға бас бостандығынан айырылсын.Бишімбаевтан мемлекет кірісіне сот сараптамасын жүргізуге кеткен сот шығындары 2 млн 306 мың 382 теңге, Байжановтан 3 324 теңге өндірілсін. Бишімбаевтан жәбірленушінің өтемақы қорына  30 АЕК 103 500 теңге сомасында, Байжановтан– 20 АЕК - 69 мың теңге өндірілсін", - деді судья АЙЖАН ҚҰЛБАЕВА.

Жәбірленуші тарап өкілі Айтбек Амангелді сот отырысынан кейін үкім бойынша ойын айтты. Бұл өмір бойы бас бостандығынан айырумен тең жаза. Себебі, 24 жылдан кейін Бишімбаев 68 жасқа келеді деді.

"Kazakh Everest Team" қазақстандық команда құрамындағы қазақ қызы тұңғыш рет Эверест шыңына шықты. Жалпы команданың шыңға көтерілуі бес тәулікке созылған, деп хабарлайды Алатау телеарнасы. 

Непалдың Гималайда көтерілуге маманданған және қазақстандық экспедицияның ресми жолсерігі "Seven Summit Treks" компаниясының мәліметіне сүйенсек, қазақ қызы шыңға сәтті көтерілген. 

"Құрамында Анар Бурашева мен Мақсат Жұмаев бар "Kazakh Everest Team" қазақстандық команда әлемнің ең биік шыңы – Эверест шыңына (8 848 м) сәтті көтерілді", - делінген хабарламада.

8 000 метрден жоғары биіктіктегі дауыл мен боран түріндегі күрделі ауа райы жағдайларына байланысты шыңды бағындыруға ниеттенген экспедициялардың көпшілігі бағытынан кері қайтты, тек бес елдің альпинистері Эверестке сәтті көтеріле алды. Олардың арасында біздің отандастарымыз бар: тарихта әлемнің ең биік шыңына шыққан тұңғыш қазақ қызы Анар Бурашева және еңбегі сіңген қазақстандық альпинист Мақсұт Жұмаев, бұл – оның Эверест шыңына осымен үшінші рет шығуы.

Жалпы "Kazakh Everest Team" командасының шыңға көтерілуі бес тәулікке созылды. Эверест шыңына Анар Бурашева мен Мақсат Жұмаев Қазақстанның мемлекеттік туын орнатты.

Оралдағы саяжай тұрғындары табиғи апаттан кейін үйлеріне орала бастады, деп хабарлайды Алатау телеарнасы БҚО әкімдігінің ақпаратына сүйеніп. 

Дерекке сүйенсек, Орал қаласындағы Венера, Речник, Труд, Газовик, Волна, Үміткер саяжайларының 200-ден астам тұрғыны өз үйлеріне оралған. 

Бұдан бөлек, бүгінде су тасқынынан зардап шеккен саяжай иелеріне 100 айлық есептік көрсеткіш көлемінде бір жолғы әлеуметтік көмек берілуде. Сондай-ақ, тұрғындардан түскен өтініштер негізінде төлемдер жалғасуда.

Қазіргі уақытта Орал қаласында су тасқынынан зардап шеккендердің шығынын есептеу және материалдық көмек төлеу жөніндегі арнайы комиссия жұмыс істеуде. Комиссия тексеру актілері аясында суы кеткен саяжайларды қарауда. Кезең-кезеңімен барлық саяжайлар техникалық зерттеуден өтеді.

Алматыда соңғы күндері кене шаққан азаматтар саны артқан. Наурыз айының басынан 5 мамырға дейін 518 адам медициналық көмекке жүгініп отыр, деп хабарлайды Алатау телеарнасы. 

Десе де, ҚазАқпараттың дерегіне сүйенсек, бұл көрсеткіш 2023 жылдың сәйкес кезеңімен салыстырғанда (579 адам) 10,5 пайызға төмен көрінеді. 

“Кене шаққан 14 жасқа дейінгі балалардың үлесі 53,4% (277 бала) құрады. Барлығына дер кезінде шұғыл медициналық көмек көрсетіліп, көрсеткіштері бойынша кенеге қарсы иммуноглобулин енгізілді. Жыл басынан бері кене инфекциясы тіркелген жоқ, - дейді қалалық санитарлық-эпидемиологиялық бақылау басқармасының басшысы Қасымхан Алпысбайұлы.

Денеге кене жабысқаны анықталса, мүмкіндігінше тезірек (кене қадалғаннан кейін төрт күннен кешіктірмей) білікті медициналық көмек көрсететін ұйымдарға хабарласу және кене энцефалитіне қарсы иммуноглобулин енгізу қажет.

Кене шаққаннан зардап шеккендерге шұғыл медициналық көмек қаладағы медициналық ұйымдардың келесі травматологиялық пункттерінде көрсетіледі:

Орталық қалалық клиникалық аурухана (Жандосов көшесі, 6);
Жедел жәрдем ауруханасы (Қазыбек би көшесі, 96);
№ 4 қалалық клиникалық аурухана (Папанин көшесі, 220);
№ 7 қалалық клиникалық аурухана (Қалқаман шағын ауданы, 20);
Балаларға жедел медициналық көмек көрсету орталығы (Манас көшесі, 40).

Сондай-ақ, кенелер санын азайту және кене инфекциясының алдын алу мақсатында 1 сәуірден бастап қаланың орман-тоғай, саябақ, алаңқайларында кенеге қарсы профилактикалық шаралардың бірінші кезеңі жүргізілуде.

Елдегі мектептерде жұмыс істейтін ер мұғалімдердің саны жарияланды. Мәліметке сүйенсек, ер адамдар жалпы ұстаздардың 19 пайызын ғана құрайды екен, деп хабарлайды Алатау телеарнасы. 

Мектептерде жұмыс істейтін ер мұғалімдердің санын Оқу-ағарту министрлігі жазды. Онда Ахмет Байтұрсынұлы атындағы «Талдау» ұлттық зерттеулер және білімді бағалау орталығы еліміздің білім беру ұйымдарындағы ер педогогтер санын жинақтағаны жазылған. Яғни дерекке сүйенсек, жалпы саны 93 048 ер педагог жұмыс істейді екен. Оның ішінде:

13 867 — колледж

76 502 — мектептерде

2 679 — мектепке дейінгі ұйымдарда.

Ал елдегі білім беру ұйымдарында еңбек ететін әйел педагогтер саны 469 533. Оның 28 340-ы колледж, 324 596-і мектептерде, 98 434-сы мектепке дейінгі ұйымдарда жұмыс істеп жүр.