https://www.youtube.com/embed/nBZdOUKp_mE?si=5BF_UF3K4-Xh1xxO" 

Бразилиялық агроном Рубенс Брас алып әтештер мен тауықтарды өсіреді. Ол Бразилиядағы үй құстарының генетикасын жақсартқысы келеді.

Рубенс Брас алғашында бұл жұмысты жай ғана хобби ретінде жасап бастаған. Кейін оның қызығушылығы артып, жұмысын табысты бизнеске айналдырған. Соның бірі мына алып әтеш. Бұл тұқымды Рубенс 20 жыл бұрын өсірген екен.

РУБЕНС БРАС АГРОНОМ: «Біз құстарды табиғи түрде өсіреміз. Бұл әтештің өсуі 116 сантиметрге дейін жетеді».

Агроном жаңа тұқымды өсіру үшін торда ұсталмайтын әтештерді қарапайым тауықтармен төбелестіретін әтештермен будандастырады. Агрономның айтуынша мұндай құстар төзімді және сау болып келеді.

РУБЕНС БРАС АГРОНОМ: «Біз бұл құстардың генетикасын жақсарту үшін жұмыс істеп жатырмыз. Кейін оларды ауылдық өндіріс жүйесіне қайта қайтарамыз».

Рубенс Брас бразилиялық құстарды өсіруге және сатуға мамандандырылған компания ашты. Фермада екі түрі өсіріледі: алып Үнді әтеші Канелас Амарелас пен ірі қанатты Урубус. Ересек құстар 4000 доллар тұрады. Сіз сондай-ақ ұрықтандырылған жұмыртқаларды сатып алып, құстарды өзіңіз өсіре аласыз. 12 жұмыртқа 70 доллар тұрады. Кейбір тұтынушылар үй жануарлары ретінде алып әтештерді сатып алады. Бірақ олар негізінен ет алу үшін өсіріледі. Қазір Бразилияда бұл құстарды 20 мың селекционер өсіреді. Рубенс фермасында шамамен 300 құс бар. Сату жылдамдығы әзірге баяу. Себебі, Бразилияда құс тұмауының өршуіне байланысты тасымалдауға тыйым салынған. Жағдай қайта жақсарған кезде, агроном Сан-Паулу штатындағы азиялық мейрамханаларға алып әтештерді жеткізеді.

https://www.youtube.com/embed/UPAMglYBdVM?si=2zYu9AONwNU_jvEH"

Солтүстік Македониядағы Преспа көліндегі ағаш айлақ бір кездері сумен қоршалып тұрған. Бірақ соңғы онжылдықтан бері мұндағы су деңгейі үнемі төмендеп келеді. Енді су айлағы құрлыққа айналмақ.

Преспа көлі Албания, Греция және Солтүстік Македония территорияларында орналасқан. Бұл Еуропадағы ең көне көлдердің бірі. Мұнда балықтардың, құстардың және сүтқоректілердің 2000-нан астам түрі мекендейді. Бүгінгі таңда ондағы су деңгейі 70-ші жылдардың аяғынан бері есептегенде шамамен 8 метрге төмен.

АЛЕКСАНДР ИЛИЕВСКИ ЖЕРГІЛІКТІ ТҰРҒЫН:«Мен осы ауылда өстім. Біз үнемі айлақтан суға секіретінбіз. Әсіресе, 2018 жылы біз көбірек демалуға келіп жүрдік. Бірақ қазір көріп отырғаныңыздай, жағдай жақсы емес. Су азайып барады».

NASA суреттері көрсеткендей, 1984 жылдан 2020 жылға дейін көл бетінің 7% және өз көлемінің жартысын жоғалтқан.

ВАНЧО ВАСИЛЕВСКИ БАЛЫҚШЫ:«Соңғы 2-3 айда көл 36 сантиметрге төмендеді. Соңғы екі-үш күнде тағы 2-3 сантиметрге түскен. Деңгей әлі де төмендейді. Жаңбыр жаумайды. Қыста қар болмайды. Өзендер саяз болмақ. Көлге тек 1 өзен құяды. Басқа су көздері жоқ. Бұл – табиғи апат».

Экологтар судың жоғалуының негізгі себептері жаңбырдың болмауы, булану және суару үшін суды шамадан тыс пайдалану екенін айтады.

ДРАГАН АРСОВСКИ БИОЛОГ:«Тарихта Преспа көлінің деңгейі бірнеше рет төмендеп, көтерілсе де аман қалған болатын. Соның салдарынан, көптеген жануарда биоалуантүрлілік сақталған. Бірақ қазір климат өзгеруде. Біз онымен енді қалай күресуге болатынын білмейміз. Өйткені біз көлге бұрынғыдай үйреніп қалдық».

БҰҰ көлдегі жабайы табиғаттың кейбір түрлеріне қауіп төніп тұрғанын да ескертеді.

МЕНДЕ ПАНДЕВСКИ ФЕРМА ҚЫЗМЕТКЕРІ:«Олар көл арқылы жер асты суларына еніп, барлық жерге таралады. Бұл жағдай Преспа үшін өте қауіпті болмақ».

Сынамаларға сәйкес, көлдің кейбір аудандарындағы судың сапасы соңғы айларда айтарлықтай төмендеген.

https://www.youtube.com/embed/ipAOCwSDAXE?si=cKKQM3dzQ0hXIfnH" 

Ғылым және халықаралық ынтымақтастық жобаларының бірі, өнертапқыш иесі Ақайдар Дайыров су электр станциясының жаңа түрін ойлап тапты. Патенттелген жоба Шоқан Уәлиханов атындағы Көкшетау университеті ғалымдарының ғылыми-техникалық кеңесінде талқыланып, тәжірибеден өтті. Жоба Атбасар ауданына қарасты, Сергеевка ауылының су электр станциясында алғаш рет сыналған.

Солтүстік өңірдің тумасы Ақайдар Дайыровтың мамандығы құрылысшы. Жастайынан жаңа дүниені ойлап табуға, түрлі техника мен құрылғыны дамытып жетілдіруге құмар. Өзінің авторлық 4 жобасы бар. Соның бірі су электр станциясының жаңа түрі. Ол электр станцияларының табиғи ресурсынан алынып жатқан қуаттан кем дегенде 5 есе көп алуға болатынын дәлелдеген. Әзірге жоба тәжірибелік сынақтан өтуде.

АҚАЙДАР ДАЙЫРОВ ЖОБА АВТОРЫ

«Бүкіл әлемде мына, гидроэлектр станциялары кинетический энергия дейді, судың итеру күшімен жұмыс істейді. Ал енді мен ойлап тауып отырған күш, ол жердің тартылыс күші. Яғни, осы кинетикалық энергияны мен механикалық энергияға ауыстырып отырмын. Оның себебі, осы кинетикалық энергияның механикалық энергияға қарағанда пайдасы аз».

Адамзаттың энергетикалық қажеттілігі үздіксіз артып келеді. Ғаламшарда электр энергиясын өндіру және тұтыну орташа есеппен әрбір 10-15 жыл сайын 2 еселенеді. Бүгінгі таңда көптеген елдерде, соның ішінде біздің елімізде де негізгі қуат көзі – көмір болып тұр. Ал оның қоры қопарылып алынған пайдалы қазбаның орнында. Жанған көмірден бөлінген газ бен шыққан қалдық биосфера қабатын ластауда.

АҚАЙДАР ДАЙЫРОВ, ЖОБА АВТОРЫ

«Дүние жүзі осы энергетикаға мұқтаж. Қазақстанның өзі міне атом энергия станциясын салғысы келіп жатыр. Қазір елде кем дегенде 5 есе энергия күші жетпейді. Біздің алып жатқан жарығымыз 70 пайыз көмірден алынады. Ал, ол экология үшін өте зиянды. Түбінде оны тоқтатып тастауы мүмкін. Сондықтан менің ұсынып отырған ұсынысым, бұл таза энергия. Су арқылы алынатын. Осы жұмысқа біздің мемлекет көңіл аударып, тиісті мамандар осыған қолдау білдіру керек деп ойлаймын. Бұл ғылыми заңдылықтарға негізделген».

Жоба 2017 жылы ЭКСПО халықаралық көрмесіне қабылданған. Дегенмен, сол уақыттан бері жоба әлі қолданысқа шығарылмаған. Ғылыми тұрғыдан дәлелденген жоба өз қолдаушысын таппай тұр. Экономика саласына оң әсер ететін жүйе тиісті бағасын алмаған сияқты. Жоба авторы 70-ке аяқ басса да, әлі де еліме қызмет етіп, пайдам тисе деген ниетте.

https://www.youtube.com/embed/dBS49oyHTFg?si=AnmneRPtDKwt1r6W" 

Алмалы мекен Алматы қаласында Қазақстан мұсылмандары діни басқармасы, «Халал Даму» стандарттау және сертификаттау мекемесінің ұйымдастыруымен «HALAL EXPO-2023» көрмесінің ашылу салтанаты өтті. Толығырақ келесі материалда.

Бұл – халалды насихаттау, тұтынушы мен өндіруші арасын жалғау, кәсіпкерлердің өзара байланысын нығайту, шет елдік мамандармен тәжірибе алмасу, халал өнімдерді таныту мақсатында III-ші рет өткізілгелі отырған халықаралық айтулы шара.

Елімізде Қазақстан мұсылмандары діни басқармасының «Халал» сертификатын алған 1500 жуық кәсіпорын бар. Іс-шараға ҚР Мәдениет және ақпарат министрлігі, Ауылшаруашылық министрлігі, сондай-ақ Алматы қаласы әкімдігі мен «Атамекен» ҚР ҰКП арнайы өкілдері, шетелдік «Халал стандарттау және сертификаттау» орталықтарының басшылары қатысты. Сонымен қатар, Өзбекстан мен Қырғызстан, Украина, Малайзия, Индонезия мемлекеттерінің халал сертификаттау саласы мамандары дәріс оқып, халал жөнінде мол мағлұмат берді.

НАУРЫЗБАЙ ҚАЖЫ ТАҒАНҰЛЫ ҚМДБ ТӨРАҒАСЫ БАС МҮФТИ:

«Негізгі біздің мақсатымыз – осы жамағатымыздың, мұсылман халқының асының адалдығына үлесімізді қосу».«Жалпы, «Халал» сертификатты беру Қазақстан мұсылмандары діни басқармасының бизнес көзі емес. Біздің мақсат – асымыздың адал болуына үлес қосу. Алла ниетімізді қабыл етсін. Елімізге береке берсін».

Алматы қаласының қонақтары мен тұрғындары ет, құс өнімдерін, сүт және балық өнімдерін, кондитерлік және бал өнімдерді, халал косметикалар, фаст-фудт тағамдар, балмұздақ, сусын секілді небір өнімдерді сауда орындарынан бірнеше есе төмен бағада ала алады. Аталған шара екі күнге жалғасады. Халал индустриясының дамуына ат салысып, отандық өнімдерді қолдайық, қолданайық!

https://www.youtube.com/embed/jgcfxLwp05Q?si=VcK52Sjsz84lqdpa" 

Жертөлеге талас. Талдықорғанда Мүшелтой ықшам ауданы 2-ші үйдің тұрғындары өзімізге тиесілі жертөлені пайдалана алмай отырмыз деп шағымданды. Базынасын айтып қалалық сотқа да арызданған.Сот процессінің жүріп жатқанына 1 жылдан асыпты.

Бұл 2-ші үйдің жертөлесі. Айтулы жағдайға сот нүкте қоймағандықтан ішіне кіруге рұқсат жоқ. Ал, тұрғын үй иелері жертөле жалпыға ортақ деп шағымдануда. Қолдануға еш мүмкіндіктің жоқтығын айтады. Себебі оны бәз біреулер иемденіп алған.

ШӘЛИПАН НҰРАХМЕТОВА - ҚАЛА ТҰРҒЫНЫ: «Подвал жабық. Аварейка келсе кіре алмайды. Сотқа бергенбіз. Сот бір жыл болып қалды әлі шешім бере алмай отыр бізге. Бұл не деген шешілмей жатқан подвал. Мына подвалдың мына жағында жем ұстайды. Көктемде 30-40 мешок жоңыршқаның семенасын алып келеді де, сатады мына жерде. Ал, енді онда неше түрлі тышқан, неше түрлі құмырсқа жиналып жатыр.Білмейміз біз уже үйіміздің бәріне құмырсқа қаптады мінеки».

ЖАННА КЕРЕЙБАЕВА - ҚАЛА ТҰРҒЫНЫ: «Бізге подвал керек. Себебі өткенде ана кісі айтып жатырғой, коляска бәрі тұр. Жолдасым енді сердечник. Приступ болып, скорый келгенде шығара алмады насилкаменен например. Үйде тұрған заттар бытқып жатыр. Дөңгелектерді қойғанға. Зимний и летний я сколко раз просила. Уменя муж сердечник. Инвалидность бар. Маған берші қаламаймын да даже. Қоя салайық. Бермейді».

Пәтер иелері коперативінің төрағасы Ержан Данабековтың айтуынша, жертөледе тұрғындардың келісімімен сауда жасап жүр.

ЕРЖАН ДАНАБЕКОВ - МҮШЕЛТОЙ ЫҚШАМ АУДАНЫ ПИК ТӨРАҒАСЫ: «Қолдарына құжат алып жасап, мына кісілердің көптеген адамдардан рұқсат алып жасағандар да бар. Өздеріне жеке кәсіпке я болмаса жеке пайдалануға алған бөлмелері бар. Енді бұл кісілердің жағдайында бұл кісілер кейіннен көшіп келді. Енді бұл кісілер жер жоқ емес бар. Астында бос орындар бар. Бірақ та бұл кісілер тұратын үйінің астынан орын берсін деп жатыр. Сондықтан бұл уже сотқа берілген».

Бұл мәселеден қалалық ТҮКШ бөлімі хабардар екен. 2003 жылы дәл осы тұрғын үйден пәтер сатып алған. Заң бойынша жертөледен орын алуға да құқылы. Десе де есікке қара құлып салып, толықтай меншіктеп алған азамат пен тұрғындар арасында үлкен дау туған.

ЖҰЛДЫЗ ИМАНҒАЗИНОВА -ТАЛДЫҚОРҒАН ҚАЛАЛЫҚ ТҮКШ БӨЛІМІНІҢ БАС МАМАНЫ: «ҚР тұрғын үй қатынастары заңына сәйкес, жертөле ол кондоминиум объектісінің ортақ мүлкі болып есептеледі. Сондай-ақ, пәтер иелері, тұрғын емес меншік иелері осы кондоминиумға қатысушылар болып табылады және де осы кондоминиум объектісін басқаруға, кондоминиум объектісінің ортақ мүлкін пайдалану бойынша барлығы да тең құқыққа ие. Сонымен қатар, тұрғын үйге, құқықтық қатынастарға туындайтын даулар сот арқылы шешіледі».

Белгілі болғандай тұрғындар сот шешімінсіз жертөлені қолдануға құқығы жоқ. Қараша халықтың күтуден басқа амалы жоқ.

https://www.youtube.com/embed/4e_IGmsfMkc?si=_8Tnubh1yRPMfrHA" 

Маңғыстау облысы, Ақтау қаласындағы "Шығыс-2" тұрғын үй массивіндегі ағайындар тақтайдай болу керек тас жолдың ұзаққа созылған құрылысына шағымданды. Олар шенеуніктердің құр уәдесіне әбден тойғандарын айтады. Ал, қалалық әкімдік өкілдері жобаны қаржыландыру тек биыл ғана жүзеге асты - деп, отыр.

Бұл "Шығыс-2" шағын ауданындағы жолдың сиқы. Тұрғындар тас жол салынады деген дәмемен шенеуніктердің уәдесін әлі күнге дейін күтуде. Тұрғындардың айтуы бойынша асфальт салу жұмыстары әр жылда басталып, жарты жолдан тоқтатылады екен.

РАУШАН НҰР ТҰРҒЫН: «Мамыр айында басталды, жазда жасауға уәде берді. енді олар Желтоқсанда не істейтіндерін айтады. Әрі қарай не болады. Енді компания қайтадан ақша сұрайды. Егер мердігерде техника да, жабдық та болмаса, онда олар неге басқа компанияға берілмейді. Неліктен халықтық ақша жұмсалады. Бүкіл жол шұңқырларда, өтуге де, жүруге де болмайды. Таңертең балаларды балабақшаға апару керек, оқушылар мұнда өте алмайды. Неліктен балалардың қауіпсіздігі мен өмірі туралы ешкім ойламайды».

Күте-күте шаршаған тұрғындар өздерінің қалталарынан қаржы шығарып, өлместің күнін жасап қиыршық тас төсеткен. Себебі жаңбыр жауса бұл жол балшыққа айналады екен. Екі ай бұрын мердігер компанияның мамандары тегістелген жолды сүріп тастаған. Осылайша, асфальттау жұмыстары тоқтатылды.

РАИСА ҚОДАСОВА ТҰРҒЫН: «Бұл қысқа учаске, тіпті бір шақырым жоқ, шамамен 500 метр, олар бір ай бойы қазып алды. Осыдан кейін мұнда шаң бағаналы болды. Тротуар жоқ, көліктер жүре алмайды. Мұнда өз техникалары қалды. Тамыз айында техника осында тұрды. Қазір біз бұрынғыдан да нашарладық. Кем дегенде олар бізге ескі қиыршық тасты қайтарып, бәрін тегістесін».

Мәселеге жауаптылар учаскедегі жол құрылысын қаржыландыру биыл ғана басталғанын алға тартты. Биыл Шығыс-2 және Шығыс-3 шағын ауданішілік жолдарды асфальттауға қазынадан шамамен 550 млн теңге бөлінген.

АСХАТ НҰРМҰХАН АҚТАУ ҚАЛАЛЫҚ ЖОЛАУШЫЛАР КӨЛІГІ ЖӘНЕ АВТОМОБИЛЬ ЖОЛДАРЫ БӨЛІМІНІҢ БАСШЫСЫ:«Жоспар бойынша біз осы жылы жұмысты аяқтағымыз келді. Бірақ мердігер баяу жұмыс істейтінін мойындауымыз керек, біз шынымды айтсам, жылдам қарқынмен жүрмейміз. Шығыс - 2-де жиектерді орнату және қиыршық тасты төсеу жұмыстары жүргізілуде. Шамамен 70-80 пайыз қалашық маңындағы жолға келетін болсақ, біз тұрғындардың өтініші бойынша осы учаскені қарастырдық. Ол бұрын жобада болмаған. Енді біз оны жобаға енгіздік. Егер жыл соңына дейін шекаралар мен қиыршық тастар төселсе, онда асфальттау келесі жылдың бірінші жартыжылдығында аяқталады».

Жауаптылар аталмыш проблеманың түйіні 2024-ші жылы шешіліп қалу мүмкін деген болжамдарын айтты. Ал қырқына шыдаған тұрғындарға қырық біріне шыдас бермесінен басқа амал жоқ сыңайлы.

https://www.youtube.com/embed/9hbs_p595Ms?si=6Z9tbESPLuUogS7K" 

Қасым-Жомарт Тоқаев Тәжікстанға жұмыс сапары барысында Халықаралық Аралды құтқару қорының құрылтайшы мемлекеттері басшылары кеңесінің отырысына қатысты. Мемлекет басшысы, ең алдымен, құрмет көрсеткені әрі іс-шараны жоғары деңгейде ұйымдастырғаны үшін тәжік тарапына және Президент Эмомали Рахмонға алғыс айтты, сондай-ақ форумға қатысып отырған БҰҰ Бас хатшысының арнаулы өкілі Кахи Имнадзеге ілтипат білдірді.Президент өз сөзінде Халықаралық Аралды құтқару қорының 30 жылдығы қарсаңында өткізіліп отырған мерейтойлық саммиттің символдық мәні бар екенін атап өтті.

ҚАСЫМ-ЖОМАРТ ТОҚАЕВ ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:

«Қор құрылғаннан бергі уақыт аралығында трансшекаралық су ресурстарын бірлесіп пайдалану, Арал теңізі бассейніндегі экологиялық және әлеуметтік-экономикалық проблемаларды шешу мәселелері бойынша аймақтық ынтымақтастықтың маңызды институтына айналды. Орталық Азияның қауіпсіздігін, тұрақтылығын және орнықты дамуын қамтамасыз ету ісінде Қор зор рөл атқарады. Бұған қоса халықаралық аренада Орталық Азияның субъектілігін танытатын аймақтық ынтымақтастықтың санаулы әрі табысты механизмдерінің бірі. Тәжікстан мен Нидерландының төрағалығымен жарты ғасырға жуық уақыт ішінде алғаш рет Нью-Йоркте БҰҰ-ның Су жөніндегі конференциясы өтті. Бұл біздің аймақ үшін айтулы оқиға екені даусыз. БҰҰ Бас Ассамблеясының биік мінберінен Аралдың болашағы туралы Орталық Азия өңірінің біртұтас үні естілді. Орталық Азия мемлекеттерінің бірлескен мәлімдемесі ұсынылды».

Бұдан бөлек Қасым-Жомарт Тоқаев саммитке қатысушылардың назарын аймақ алдында тұрған бірқатар сын-қатерлер мен проблемаларға аударды.

ҚАСЫМ-ЖОМАРТ ТОҚАЕВ ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:

«Жаһандық климаттық өзгерістер, су тапшылығы кезеңінің басталуы және суармалы егістікке судың жетіспеушілігі Орталық Азияның қауіпсіздігіне қатер төндіреді. Халықаралық сарапшылардың мәліметіне сәйкес біздің аймақтағы температура жер шарындағы орташа көрсеткішпен салыстырғанда, әлдеқайда тез көтеріліп келеді. Бұл Арал теңізі бассейнінің негізгі су көзі саналатын мұздықтар көлемінің кішіреюіне әкеп соқтырады. Олардың көлемі соңғы 50 жылда 30 пайызға кішірейген. Сарапшылардың бағалауы бойынша 2050 жылға қарай Орталық Азиядағы қуаңшылық жылына ЖІӨ-нің 1,3 пайыз мөлшерінде зиян келтіруі мүмкін. Бұл 5 миллионға жуық ішкі «климаттық» мигранттың пайда болуына түрткі болады».

Президент аймақтағы барлық елдің мүдделерін ескере отырып, Орталық Азияның су-энергетика ресурстарын тиімді пайдалану үшін ұзақ мерзімді әрі орнықты аймақтық ынтымақтастық механизмін құру қажет екенін айтты. Қасым-Жомарт Тоқаев Бішкектің Қорды жетілдіру жөніндегі Жұмыс тобының қызметіне атсалысуын оң бағалап, Қырғыз Республикасын қайтадан Халықаралық Аралды құтқару қорының толыққанды мүшесі болуға шақырды.Президент сөзін қорытындылай келе, тығыз ынтымақтастық, өзара тиімді серіктестік жасау және бір-біріміздің мүдделерімізді құрметтеу арқылы ғана аймақтың тұрақты дамуы, қауіпсіздігі мен экономикалық әл-ауқаты қамтамасыз етілетінін атап өтті.Мемлекет басшысы Халықаралық Аралды құтқару қорының аясындағы жоғары деңгейдегі келесі кездесуді еліміз бастамашы болған БҰҰ шеңберіндегі Аймақтық климаттық саммитпен біріктіре отырып, 2026 жылы Қазақстанда өткізуді ұсынды.Саммит қорытындысы бойынша мынадай құжаттарға қол қойылды.

https://www.youtube.com/embed/rg78RbzetWc?si=e6p6azntJgyhhc-7"

https://www.youtube.com/embed/83FBlsJjdjY?si=7kzj-6dTwh90SaF4" 

Халықаралық отбасы күні әлем бойынша 15 мамыр күні аталып өтілсе,біздің мемлекетте бұл мерекелік күн жыл сайын қыркүйек айының екінші жексенбісінде тойланады. Отбасы қоғамның негізгі бөлшегі ретінде адами құндылықтардың, мәдениет пен ұрпақтардың тарихи сабақтастығының сақтаушысы және тұрақтылық пен дамудың бастауы болып табылады.

Отбасы, адалдық және махаббат – әр адамның өміріндегі ең маңызды құндылықтар. Адамның өмір жолы өз отбасынан басталады: дүние есігін ашу, сол ортада тәрбиелену, рухани құндылықтар мен адамгершілік көзқарастары жанұясы арқылы қалыптасады. Осындай құндылықтарды бойға жинаған Қызылорда қаласындағы Ыдырысовтар әулетінде бір отбасындағы екі адам, төтенше жағдай қызметінде жұмыс жасап, өз ошақтарының ғана емес қоғамның да қауіпсіздігін қамтамасыз етіп отыр. Бақытты отбасын құрған ерлі-зайыптылардың шаңырағының алтын қазығы болып отырған анасымен тілдескен едік.

АҚАЛТЫН ОМАРОВА Н.АСЫЛХАНҰЛЫНЫҢ АНАСЫ

Отбасы құндылықтарын қадірлеп, дәріптеп келе жатқан ерлі-зайыптылар өрт сөндіру қызметінің мамандары. Түсіністік пен мейірім үйлесімділік тапқан отбасы саланың қиындығын біле тұра, баянды өмір сүріп келеді.

ЛӘЙЛӘ ЖҰМАТАЕВА ҚЫЗЫЛОРДА ҚАЛАСЫ №6 ӨРТ СӨНДІРУ БӨЛІМІНІҢ РАДИОТЕЛЕФОНИСТІ

Отбасы – әрбіріміз үшін қадірлі ұғым. Дегенмен, шаңырақтың беріктігі – үлкендердің үлгі-өнегесі, өзара сыйластық пен қамқорлыққа байланысты. Отбасы құндылығын қадірлеген өнегелі шаңырақ иелері, сұхбат барысында «Отан- отбасынан басталатынын» дәріптеді.

НҰРСҰЛТАН АСЫЛХАНҰЛЫ ҚЫЗЫЛОРДА ҚАЛАСЫ №6 ӨРТ СӨНДІРУ БӨЛІМІНІҢ БӨЛІМШЕ КОМАНДИРІ

Еліміздегі әрбір отбасы – қоғам айнасы. Келер ұрпақтың көкейінде күмән, көңілінде түйткіл болмай, рухани толыққанды болып қалыптасуы отбасылық тәлімге тікелей байланысты. Өнегелі отбасын құруға, сақтауға және үлгі етуге әрбіріміз жауапты болуымыз керек.

https://www.youtube.com/embed/0IXZY_M5wkc?si=MEN2buiQowq30RlK" 

Ыстық кезде көптеген адамдар кондиционерді пайдаланады. Австралия ұлттық университетінің зерттеушілері заманауи құрылғыны көп пайдаланудың зиянын анықтаған. Ғалымдар кондиционерді үнемі пайдаланған жағдайда адамдар табиғи ыстыққа ағзаларының бейімделуін жоғалтады деген тұжырым жасаған.

Австралия тұрғындары да заманауи технологияны пайдаланудан кенде емес.

ДАРВИН ТҰРҒЫНЫ:
«Мен оны тәулік бойы қолданамын. Ешқашан өшірмеймін».

ДАРВИН ТҰРҒЫНЫ:
«Мен де үнемі кондиционер пайдаланамын, өйткені біз қатты ыстыққа үйренбегенбіз».

Аталмыш технология адамдарға аптап ыстықтан аман қалуға көмектеседі дегенмен,Австралия ұлттық университетінің зерттеушілері қауіптің де жоқ емес екендігін айтты.

[Саймон Квилти, зерттеуші]:
«Қазір Кэтрин сияқты қалада 45 градустық күнде сіз ыстықтан өлуіңіз ықтимал. Себебі кондиционер ыстыққа бейімделуді қиындатады».

Мысалы,Австралиялық аборигендер әлі күнге дейін ыстық ауа-райына жақсы төзеді. Олардың көпшілігі бұл технологияны қолданып та көрмеген.

САЙМОН КВИЛТИ ЗЕРТТЕУШІ:
«Тәулігіне он, тіпті 20 сағатты кондиционері бар бөлмелерде өткізу ағзаның ыстыққа бейімделуіне жол бермейді».

Ғалымдар кондиционерді мүмкіндігінше аз пайдалануға немесе температураны 25 немесе 26 градусқа орнатуға кеңес береді. Ал,мынадай желдеткішті қосу қауіпті емес екенін айтады. Бұған қоса зерттеушілер ыстық елдерде күндіз жұмыс істемейтінін алға тартады.

https://www.youtube.com/embed/EIosrtr0H4g?si=_ht18u84wcS3fzOJ" 

Лондонда жаңа көрме ашылды. Көрме сән әлемінің ең ірі есімдерінің бірі, француз дизайнері Габриэль Коко Шанельдің твид костюмдерінен бастап әртүрлі кішкентай қара көйлектерін көрерменге ұсынатын болады.

Көрме Виктория мен Альберт мұражайында ашылды. Сән көрмесі «Габриэль Шанель. Сән манифесі» деп аталады. Бұл жерде дизайнердің туындылары туралы, сондай-ақ оның жалпы сән индустриясына қалай аяқ басқаны толық көрсетілетін болады.

КЭРОЛ БЁРКС КӨРМЕ КУРАТОРЫ: «Бұл көрмеде Шанельдің сән әлеміне кіруінен бастап, 1971 жылғы шыққан соңғы топтамасына дейін көрсетіледі. Осылайша, көрме оның сәнге деген ерекше көзқарасының айқындаушы элементтерін қамтиды».

Ұсынылған киімдердің арасында атақты твид костюмдері, кең және белі төмен көйлектер, сондай-ақ жарқыраған кешкі көйлектер де бар.

КЭРОЛ БЁРКС КӨРМЕ КУРАТОРЫ: «Габриэль Шанель ең алдымен өзі үшін киімдер шығарды. Ол шынымен де белсенді, тәуекелшіл әйел болды. Сондықтан да ол қозғалыс еркіндігін қамтамасыз ететін, ыңғайлы, практикалық элементтері бар, қарапайым болса да талғамды көрінетін киімдерді шығаруды қалады».

Оның шығарған киімдері, аксессуарлары мен әтірлері әрқашан сатылымда сәтті болды. 1910 жылы негізі қаланған Chanel бүгінгі күнге дейін әлемдегі ең танымал люкс брендтерінің бірі болып қала береді.

КЭРОЛ БЁРКС КӨРМЕ КУРАТОРЫ: «Габриэль Шанельдің біздің бүгінгі киіну үлгімізге берген негізгі әсерлерінің бірі - бейімделгіштік пен практикалық сезім. Ол үнемі ең алдымен қозғалыс, жайлылық және киім киюден ләззат алу мүмкіндігі туралы ойлады».

Коко Шанель 1971 жылы 87 жасында қайтыс болды. Марқұм дизайнер Карл Лагерфельд 1984 жылы люкс брендінің тізгінін қолына алды. Кейін, ол дизайнер өмірден өткен соң, 2019 жылы оның орнына шығармашылық директор болып Вирджини Виард келген болатын.

https://www.youtube.com/embed/y7hkzZiFg9Y?si=HaLayIrhR2JSk7wU" 

Талдықорғандық оқушылар биылдан бастап қоғамдық көліктерде электронды жол жүру картасы арқылы қатынайтынын осыған дейін хабарлағанбыз. Алайда, алақандай картаны алу бүгінде мұң болып отыр. Оқу жылы басталғанына екі аптаға жуықтады, ал қала әкімдігі билеттерді үлестіру жүйесін жасай алмай жатыр.

Бұл «Әлемпей» кеңсесінің ғимараты. Бүгінде жол жүру билетін тарататын компаниясының алды құжынаған адам. Ата-аналар сарылып кезек күтіп жүріп, әрең дегенде билеттерді сатып алады. Шәлипан Нұрахметова соның бірі. 4 бірдей немересіне электронды жол жүру билетін алу үшін ертеңмен жеткен. 2 сағаттан артық кезекте тұрған зейнеткер бүгін кезегім жетпесе ертең тағы келем деп отыр.

ШӘЛИПАН НҰРАХМЕТОВА ҚАЛА ТҰРҒЫНЫ «Мына жерде иә балалардың жүретін проезднойы беріліп жатыр. Осыны дұрыстап ұйымдастурға болмады ма акиматқа. Акимат қайда қарап отыр? Нестеп отыр акиматтар? Мінекей қырылысып жатыр елдің бәрі. Неше күн 3 күн толпа болып жатыр. Қазір елдің бәрін тарқатып, мынаны жөндеп берсін бізге акимат. Мына образованиеге звондасақ телефонын алмайды. Мына интернеттегі нөмердің барлығы өтірік, қойып қойған. Звондасаң өтірік номер терілді деп шығарады мінекей».

Бұған дейін қалалық білім бөлімі электронды карталар Қаз пошта бөлімшелері арқылы таратылады деген. Бірақ ол шаруа басталмай жатып тоқтатылды. Себебі, жол жүру карталарын сатып алып, үстіне ақша қосып сататын алыпсатарлар пайда болған. Сондықтан, жол жүру картасын тек ата аналардың өздері келіп, жеке ЖСН нөмерлері арқылы тіркеп алатын болды.

АЙДОС СЕКСЕНБАЕВ «ALEMPAY» ЖШС ДИРЕКТОРЫ:«Әр баланың ИНН мен ата ананың телефонына регистраия жасалады. Егер де жоғалтып алған жағдайда картаның номері мен осындай картаның номерін тіркейді ғой. Айтады менің осындай балам карта жоғалтып алды. Соған міне басқа карта алам тіркеймін деп. Бір балаға 2 карта тіркелмейді. Сол себептен ата-ананың нөмерімен келеді. Қай номерге тіркелгенін көрсетеді. Мына номерге тіркелген деп. Сол номерді біздікілер базадан алып тастайды. Содан кейін басқа карта тіркеуге болады».

Оқушылардың жол жүру карталары Талдықорғанда алғаш рет іске қосылмақ. Алдымен 1 ай бойы лимитсіз жұмыс істейді. Яғни оқушылар қанша мәрте автобусқа мініп-түссе де өзі біледі. Кейінірек, әрбір балаға шектік норма бекітіледі.

АЙДОС СЕКСЕНБАЕВ «ALEMPAY» ЖШС ДИРЕКТОРЫ:«1-2 ай көреміз қанша лимит. Бұрын мысалы үшін жанағы бәленбай миллион төлесе, қазір 1 айда көреміз қанша шығады. Егерде сол бұрынғы лимиттан аспаса, онда без лимита қоямыз».

Талдықорғанда барлығы 26 мектеп бар. Онда қазір 34 мыңға жуық оқушы білім алады. Әзірге соның 1500 ғана электронды билетке қол жеткізген. Яғни «Әлемпейдің» алдындағы құжынаған кезек әлі біразға созылуы мүмкін.