https://www.youtube.com/embed/RxYUPDcaQr8?si=aM7oCP0iwuBe_TDo" 

Парламент төрінде өтірік есеп беруді қойыңыздар. Болмаса жұмыстан кетіңіздер! Цифрлық даму, инновациялар және аэроғарыш өнеркәсібі вице-министрінің жауабына қанағаттанбаған мәжілісмен осылай деді. Бүгін Парламент Мәжілісі ақпараттық қауіпсіздік мәселелері бойынша өзгерістер мен толықтыруларды қабылдады. Толығырақ тілші тарқатады.

Әр азаматтың жеке деректерін құпия сақтауды енді мемлекет өз мойнына алады. Бүгін Парламент Мәжілісі ақпараттық қауіпсіздік туралы заңды мақұлдады. Енді заңмен жеке құжаттың көшірмесін жасауға тиым салынады. Бұл ел азаматтарының дербес деректерін сақтау үшін жасалуда. Осы заң жобасын талқылау барысында депутат Бақытжан Базарбек өкілетті органнан жер кадастрына қатысты деректер ашық әрі халыққа қолжетімді болуы керек емес пе деген сауал қойды.

БАҚЫТЖАН БАЗАРБЕК ҚР ПАРЛАМЕНТІ МӘЖІЛІСІНІҢ ДЕПУТАТЫ:

«2016 жылы үлкен жерге қатысты митингтер болды. Салдарынан халық көтерілді. Ондағы ең негізгі мәселе жер кадастрын ашуға байланысты болды. Әрбір жердің артында қандай жемқор шенеунік, прокурор, әкім, судья және осы жүйемен ауыз жаласқан қандай олигарх тұрғанын халық білуі керек. Өкінішке қарай, бұл ақпарат ашылмады. Цифрлық даму, инновациялар және аэроғарыш өнеркәсібі министрлігі («Қазақстанның кейбір заңнамалық актілеріне ақпараттық қауіпсіздік мәселелері бойынша өзгерістер мен толықтырулар енгізу туралы») заң жобасы жер кадастрындағы (мәліметті) ашуға көмектесе ме? Ертең жер кадастры ашылмай қалмай ма?»

МӘЛІК ОЛЖАБЕКОВ ҚР ЦИФРЛЫҚ ДАМУ,ИННОВАЦИЯЛАР ЖӘНЕ АЭРОҒАРЫШ ӨНЕРКӘСІБІ ВИЦЕ-МИНИСТРІ: «Мемлекет басшысының тапсырмасын орындау аясында біз ашықтықты қамтамасыз ету үшін арнайы жария кадастрлық картаны іске қостық. Оның негізінде жер учаскелері туралы ақпаратқа қол жеткізуге мүмкіндік ұйымдастырылатын болады. Ал қазіргі уақытты осы жария кадастрлық картаның негізінде жер құқықтық және қала құрылысы кадастрларының деректері жарияланды».

 Алайда, жауапты органның жауабына депутат еш қанағаттанбады.

БАҚЫТЖАН БАЗАРБЕК ҚР ПАРЛАМЕНТІ МӘЖІЛІСІНІҢ ДЕПУТАТЫ:

«Қазақта «Домбырам не дейді, мен деймін» деген мақал бар. Мен сізден жария кадастрлық карта туралы сұрап тұрған жоқпын. Мен сізден жердің иесі кім? деп сұрап тұрмын.Жердің иесі мен оның аты-жөні туралы ақпарат ашық болуға тиіс. Орхус конвенциясына қосылдық. Конвенцияның күші Конституцияның 4-бабына сәйкес ұлттық заңнамадан басым болады. Өтірік әңгімені қашан тоқтатасыздар? Жер кадастрын ашу керек. Халықтың мұңы осы. Мұндай өтірік әңгімені Парламент төрінде айтуды қойыңыздар. Болмаса, жұмыстан кетіңіздер».

Ал, депутат Нартай Аралбайұлы болса, жастар болашағына алаңдаулы. Жастар ресурстық орталығының жұмысын сынады. Айлығы шайлығына жетпей  90 мың теңгеге жұмыс істеп жүрген жаз азаматтар бар екенін айтып, олардың жалақысын көтеруді сұрады.

НАРТАЙ АРАЛБАЙҰЛЫ ҚР ПАРЛАМЕНТІ МӘЖІЛІСІНІҢ ДЕПУТАТЫ:

«Жастардың басын біріктіретін бір ресурстық орталық бар бізде. Аты дардай болғанмен, заты болмай тұр. Қай өңірге барсақ та алдымыздан шыққан жастар жұмыста жүйе жоқ екенін айтады. Өздерін жергілікті билік білгенінше жұмсап, негізгі жұмыстарына жолатпайтынын айтады. Орталықтың жастары ортаңқол деп сөгеді кейді. 3000-нан аса белсенді жас әр әкімнің бұйрығымен таң атысы, кеш батысы сабылып жүргенде жастарға қатысты жұмыс далада қалатыны әмбеге аян».

Бүйте берсек, жастар жұмыста қалмайды деген депутат бұл мәселеге Үкіметтің өзі араша түсуін сұрайды.  

https://www.youtube.com/embed/G1asfQjbVOM?si=DlwKX9gX2LjSCZO1"

https://www.youtube.com/embed/SRjk6CPRbho?si=rJKc4cNpKF7ST42d" 

Әзербайжанның әскери операциясынан кейін шекаралас жатқан Армения қаласына  Таулы Қарабақтан мыңнан астам бейбіт тұрғындар келді. Оларға жергілікті қонақүйлерде баспана мен тамақ беріледі.

Бұл адамдар Таулы Қарабақтан қашып кеткен этникалық армяндар.Олар Әзербайжан үкіметінің қол астында өмір сүрмейтінін, 120 мыңға жуық армянның барлығы дерлік Арменияға қоныс аударуға шешім қабылдағандарын айтады.

БОСҚЫН: «Ол жерде жан түршігерлік жарылыс болды. Алдымен олар бірнеше сағат бойы бомбалады. Содан кейін шабуылдар басталды. Балалар мектепке қашып кетті. Олар  тура миномётпен оқ жаудырды. Біздің балаларымыз да жарақат алды.  Жертөлелерде тыныштық сақтаушылардың келуін күтіп отырды».

Эвакуацияланғандардың айтуынша, көптеген адамдар бітімгершілік күштері орналасқан Степанакерт әуежайына қарай бет алған. Олар өздерін сол жерден алып кетуге болады деп үміттенеді.Әзербайжан билігі өз азаматтарына жасалған шабуылдан кейін Қарабақ күштеріне қарсы операция бастағанын мәлімдеді. Президент Ильхам Әлиев өз армиясының тек Қарабақ содырларын нысанаға алғанын және бейбіт тұрғындардың зардап шекпейтінін айтты.Ресей осыдан үш жыл бұрын Қарабахтағы 44 күндік соғысты аяқтаған бітімгершілік келісімінің кепілі болды. Айта кетейік, жақында Армения Премьер-Министрі Никол Пашинян Ресейді Армения үшін жеткілікті түрде әрекет етпеді деп ашық түрде айыптап, оның елі Мәскеумен одақтастығын қайта қарайтынын айтқан болатын.Ресейліктердің пікірінше, Пашинян дағдарысты нашар шешуге өзі кінәлі.

https://www.youtube.com/embed/ZZrHR_bdo_4?si=iJkaz7-4HaHswNC1" 

Косовоның солтүстігінде сербтер мен албан полициясы арасында қақтығыс орын алды. Үш сербтің қаза тапқаны белгілі болды. Тағы бір адам қайтыс болуы мүмкін, бірақ бұл ақпарат әлі расталған жоқ.

Косово Ішкі істер министрлігінің басшысы алты шабуыл жасаушының ұсталғанын хабарлады. Оның айтуынша, полицейлер көптеген қару-жарақ, оқ-дәрілер мен жарылғыш заттарды тапқан.Косово премьер-министрі Альбин Курти шабуылшыларға Сербия демеушілік еткенін айтты.

АЛЬБИН  КУРТИ КОСОВО ПРЕМЬЕР-МИНИСТРІ: «Біздің полицияға қарсы шабуылдар жалғасуда. Кем дегенде 30  қаруланған адам -​​әскери немесе полиция - біздің полиция күштеріне жақын орналасқан. Мен бұл адамдарды біздің қауіпсіздік органдарына тапсыруды ұсынамын».

Косово билігі Баньска монастыріне бетперде киген қарулы адамдардың да шабуыл жасағанын мәлімдеді. Діни қызметкерлер шіркеуде жасырынып қалған . Олар оқтын-оқтын атыс дауыстарын естіген,ешкім зардап шеккен жоқ. Ал Сербия президенті Александр Вучич албан полицейінің өлтірілуін айыптады. Ол сондай-ақ қақтығысқа косоволық сербтердің қатысы барын және оған Белградтың еш қатысы жоқ екенін мәлімдеді.Вучич болған оқиғаға өз нұсқасын ұсынды. Оның айтуынша, косоволық сербтердің бір тобы екі жүк көлігін пайдаланып, Баньска ауылына өтетін жолды жауып тастаған. Жағдайды түземек болған полицейлердің әрекеті соңы қантөгіспен аяқталды.

АЛЕКСАНДР ВУЧИЧ СЕРБИЯ ПРЕЗИДЕНТІ: «Оларды қоршауға алып, аяусыз шабуыл жасады. Біз бұл операцияны «Косово үшін НАТО күштері» неге жүргізбегеніне таң қалдық? Құрбандар аз болар еді».

Бұл қақтығыстар мамыр айынан бергі аймақтағы алғашқы ірі қақтығыс болды.
 Сербия Косовоның тәуелсіздігін мойындамайды және оны өз территориясы деп санайды. Қақтығыс өткен жылдың тамыз айында өршіп кеткен. Ресми себеп Косовоның солтүстігінде тұратын сербтер үшін автокөлік құжаттарының 11 жылдық жарамдылық мерзімінің аяқталуы болды.

https://www.youtube.com/embed/UGuYm06Uiq0?si=5WohBdHQXhG8w3fx" 

https://www.youtube.com/embed/jbc3_-Mwawc?si=nbPDDQk44s4zKtpV" 

Бүгінгі Алматы қаласында  «IP Қазақстан» деп аталатын еліміздегі зияткерлік меншік құқықтарын қорғау мәселелері бойынша  Халықаралық дөңгелек үстел өтті. Шараның  миссиясы – контрафактілікпен күресте халықаралық ынтымақтастықты кеңейту және авторлық құқық иелерінің мүдделерін қорғаудың жаңа әдістерін әзірлеу. Қауымдастықтың негізгі мақсаттарының бірі тауар таңбаларын қорғауға және сақтауға көмектесу, тұтынушылардың құқықтарын қорғау және әділ және тиімді бизнес тәжірибесін насихаттау болып табылады.  Өнімдердің заңсыз айналымына қарсы күрес, нарықты контрафактілік пен бұрмалаудан қорғау мәселелерін талқылау.
Аталған іс-шара бірінші кезекте жетекшілерге, сондай-ақ ірі авторлық құқық иеленуші компаниялардың корпоративтік заңгерлеріне, зияткерлік меншік мәселелерімен айналысатын мемлекеттік органдардың өкілдеріне, Қазақстандағы, Орталық Азия елдеріндегі және әлемнің басқа елдеріндегі патенттік өкілдер мен тәжірибелі заңгерлерге арналған.

КЕСЕБАЕВА БАЛАЙЫМ АЛМАТЫ ҚАЛАСЫ БОЙЫНША ӘДІЛЕТ ДЕПАРТАМЕНТІНІҢ БАСШЫСЫ:  «Біздің елімізде біріншіден меншік иелерінің құқықтары бұзылатын болса екіншіден бұл халыққа да өте тиімсіз нәрсе. Өйткені заңсыз тауарлардың келуі сапасыз тауарларды шетелден алып келген кезде біздің кәсіпкерлерге ғана емес азаматтардың денсаулығы мен өміріне де зиян келтіретін заттар келіп жатыр.  Олардың барлығында біріншіден осы Қазақстанға әкелмеу бойынша және азаматтар мен балалардың қолданбауы бойынша шаралар қаралды.  Сол бойынша көптеген мәселелер қаралатын болады. Ұсыныстар қабылданып, жүзеге асыру үшін мемлекеттік органдар,заң компаниялары,өзге де ұйымдар тиісті шаралар бойынша жұмыс атқаратын болады».

https://www.youtube.com/embed/d50HA3sCeC8?si=B9bnk6pdRGpsvsR6" 

Қыркүйектің 25-нен бастап қаланың барлық емханасында тұмауға қарсы екпе егу науқаны басталды, Бұл туралы Алматы Қалалық қоғамдық денсаулық сақтау басқармасы хабарлады.

Бұл – №17 қалалық емхана.Емдом мекемесіне 86468 тұрғын тіркелген. Кешегі күннен бері екпе салдыруға келіп жатқан адамдардың қарасы көбейген. Халықты иммундау үшін тұмауға қарсы «Гриппол+» вакцинасының 250 мың дозасы сатып алынған болатын. Соның 11278-і осы емханаға бөлінген.

Мамандар екпе салуды 22 қыркүйекте қызметкерлерге салып бастаған. Соңғы 2 күн ішінде 80% қызметкер вакцинацияланған. Ешқандай кері реакциялар болмаған. 25 қыркүйектен бастап тұрғындарға тұмауға қарсы екпе егу басталған.

ШҰҒЫЛА ЖҰМАЛЫҚЫЗЫ АЛМАТЫ ҚАЛАЛЫҚ  №17  ЕМХАНА ДИРЕКТОРЫНЫҢ ОРЫНБАСАРЫ: «Оның ішінде тұрғындарды 6 жас 6 айдан бастап үлкен кісілерге де, қарт кісілерге де салынып жатыр. Бізде 3 егу бөлмесі бар. Бірінші бөлме балалардікі. Ол жекеленген. Үшінші этажда ересектерге арналған бөлме. Төртінші этажда жүкті әйелдерге арналған. Сондықтан бірін-біріне қарым-қатынас болмас үшін, әр қабат әртүрлі егу бөлмелерге бөлінген. Бұл жерде бізде стус работниктарымыз бен психологтарымыз отырады, алдын-ала тұрғындардың келісім сұрақтары мен жауаптарын алу үшін. Өтініштерін алып, қабылдап дәрігеріміз отырады алдын-ала дайындалған. Сөйтіп алгоритм бойынша, кесте бойынша жұмыс істеп жатырмыз».

«Гриппол+» инактивацияланған вакцина Ресейде өндірілген және құрамында тұмау вирусының А (H1N1 және H3N2) және В қосалқы типінің штамдары бар.Егуге бірінші кезекте медицина қызметкерлері, медициналық мекемелерде есепте тұрған балалар, жетім және ата-анасының қамқорлығынсыз қалған балалар, жүкті әйелдер мен 60 жастан асқан адамдар жатады. Негізгі ауруға байланысты тұмаудың неғұрлым ауыр түріне бейім адамдар да вакцинациялануы керек.

ГҮЛЗӘУРЕ БАЙЫСБАЕВНА ҚАЛА ТҰРҒЫНЫ: «Осы жерде тіркеудемін. Неше жылдан бері «Гриппол+» вакцинасын алып жатырмын. Медицина қызметкерлері шақырды. Келдім. Бірінші согласие толтырдым. Дәрігер қарап, тексеріп бүкіл денсаулық жағдайымды қарап, ешқандай болмағандықтан, алдым вакцинаны. 30 минут күттім. Қазір жағдайым жақсы. Енді үйге қайтып бара жатырмын».

Вакцинация науқаны қараша айының соңына дейін жалғасады. Тұмауға қарсы екпеден кейін толық иммунитетке жету үшін екі апта қажет. Осы уақыт ішінде тұмау және басқа вирустық ауру белгісі бар адамдармен қарым-қатынасты шектеген жөн.

ШҰҒЫЛА ЖҰМАЛЫҚЫЗЫ АЛМАТЫ ҚАЛАЛЫҚ  №17  ЕМХАНА ДИРЕКТОРЫНЫҢ ОРЫНБАСАРЫ: «Бізде тіркелген тұрғындар, қала тұрғындарының барлығы тегін ала алады. Бізде ақылы бөлімдер жоқ ондай. Сатылмайды. Сондықтан келіп, грипп болып ауырмас үшін, балаларыңызды жұқпалы аурудан сақтау үшін келіп, Гриппол вакцинасын алуға өтініш жасап жатырмыз. Ақпараттар беріп жатырмыз. Келіп осында алуларыңызға болады».

Дәрігерлер тұмау асқынуы  өлім қатеріне байланысты қауіпті екенін еске салады.Жұқпалы инфекция тез таралады.Сондықтан жақындарыңызды сақтық шарасына шақырады.

https://www.youtube.com/embed/uAKpRLFIblQ?si=d6EBGNx1JV4pFpMi" 

Ақтау теңіз сауда портына халықаралық мәртебе берілді. Үкімет тиісті қаулы қабылдады. Онда «Ақтау теңіз сауда портына халықаралық маңызы бар теңіз порты мәртебесі берілсін», делінген. Үкіметтің қаулысы биыл 21 қыркүйекте қолданысқа енгізілген. Президент Қасым-Жомарт Тоқаев теңіз порттарын Каспий теңізінің жетекші хабтарының біріне айналдыруды тапсырған болатын.Айта кетсек, 2018 жылдың қыркүйегіне дейін Ақтау теңіз сауда портында халықаралық мәртебе болған. Бірақ кейін Үкіметтің қаулысымен аталған мәртебе алынып тасталған еді.

ҚАЙРАТ ҚАЛИОЛЛА - “АҚТАУ ХАЛЫҚАРАЛЫҚ ТЕҢІЗ САУДА ПОРТЫ” КӨЛІК БӨЛІМІНІҢ БАС МЕНЕДЖЕРІ: «2018-ші жылы халықаралық статус порттан алынды. Қазіргі уақытта бұл статус портқа қайтадан беріліп жатыр. Бұл порттың стратегиялық аймақ ретінде мемлекеттің меншігінде болуын қамтамасыз етеді.Яғни шетелдік инвесторларға жекешелендірілуге мүмкіндік берілмейді».

https://www.youtube.com/embed/tpFww0onmZ8?si=XJdYnioalUljTOUN" 

Қазақстандық мамандар сейсмикалық аудандастыру картасын әзірледі. Енді елдегі құрылыс сейсмикалық ережеге сәйкес жүргізіледі. Бұл туралы Алматыда өтіп жатқан «Орталық Азиядағы жер сілкінісін болжау, сейсмикалық қауіпсіздік пен қатерді бағалау» атты XI -ші Қазақстан-Қытай халықаралық симпозиумы барысында Сейсмология институты директорының орынбасары Нұрсәрсен Өзбеков мәлім етті.

Алматыда жер сілкінісін болжау сұрақтары бойынша XI Қазақстан-Қытай халықаралық симпозиумы өз жұмысын бастады. Шараның мақсаты – Қазақстан Республикасының және басқа да мемлекеттердің аумағын және халықтың сейсмикалық қауіпсіздігін қамтамасыз ету, сейсмикалық қауіпті азайту.Сонымен қатар, сейсмологиялық ғылымды, кешенді сейсмомониторинг жүргізуді, жер сілкінісінің алдын алу жүйелерін дамыту, екіжақты және жан-жақты трансшекаралық байланыстарды кеңейту.

НҰРСӘРСЕН ӨЗБЕКОВ СЕЙСМОЛОГИЯ ИНСТИТУТЫ ДИРЕКТОРЫНЫҢ ОРЫНБАСАРЫ « Жер сілкінісі қауіпін анықтау мәселесі бойынша, қазір еліміздің сейсмолог мамандары өздерінің ғылыми бағдарламалары бойынша қауіпті аймақтарды аудандастыру картасын жасады. Олар өндіріске енгізілді. Картада елдің сейсмологиялық материалдары, сейсмологиялық құжаттар мен деректер бар. Сондай –ақ құрылыс нормалары жасақталды. Осыны басшылыққа ала отырып Қазақстанда құрылыс сейсмикалық ережеге сәйкес жүргізіледі»,-

Қазақстан-Қытай симпозиумы халықаралық мәртебеге ие болғандықтан, шараға көптеген ғылыми ұйымдар, сондай-ақ Орталық Азия, ТМД, Әзірбайжан, Түркия және Шығыс Еуропа елдерінің басқа да ғалымдары белсенді қатысып жатыр. Ертең, симпозиум аясында секциялық баяндамалар тыңдалады. Ал, 28 қыркүйек күні Алматы облысындағы жер сілкінісіне палеосейсмологиялық зерттеулер жүргізу орнына экскурсия ұйымдастырылады.

https://www.youtube.com/embed/XT_CGZs0dj8?si=IQ_J2FpaBHNwwUss" 

Петропавлда жеке үй өртеніп, 20 жастағы әйел мен 2 бала қаза тапты. Қызыл жалын туралы ақпарат 25 қыркүйек күні кешкі сағат 21:35-те келіп түскен. Тілсіз жау 19 шаршы метрді шарпыған. Қазір өрттің шығу себептеріне байланысты сараптама жұмыстары жүріп жатыр.

Қызыл жалын Волочаевская көшесі, 113 мекенжайындағы жеке тұрғын үйде бас көтерген. Оқиға орнына өрт сөндірушілер 5 минутта жеткен. Тілсіз жауды ауыздықтау барысында 2003 жылғы әйел мен 2018-ші және 2022-ші жылы туған екі баланың денесі табылды.

НАЗЫМБЕК ЕЛЕМЕСОВ ПЕТРОПАВЛ ҚАЛАЛЫҚ ТЖБ БАСТЫҒЫ:

«Күйеуі үйдің ішінде болған. Жұмыстан кейін ұйықтап жатқан. Қаза тапқан әйел оны оятып үйде өрт болып жатқанын хабарлаған. Верандаға шыға бергенде, ол жерді толығымен қызыл жалын шарпыған. Күйеуі терезені жарғанша, әйелі балаларын алып веранда жаққа шығып кетеді. Күйеуі терезені жарып, енді арттарынан барғанда веранда толығымен отқа айналған. Ол шығара алмай, өзі шығып аман қалды».

Қызыл жалынды ауыздықтауға 15 маман мен 3 техника жұмылдырылды. Қазір өрттің шығу себебін анықтау үшін сараптама жұмыстары жүріп жатыр.

ӘСЕМ АЙТУЛОВА ПЕТРОПАВЛ ҚАЛАСЫ ӘКІМІНІҢ БАСПАСӨЗ ХАТШЫСЫ:

«Жергілікті атқарушы орган тарапынан жерлеу рәсіміне, уақытша жалдамалы пәтерге және басқа да қажеттіліктерге арнайы қаржы бөлінетін болады. Кеше қаламызда қайғылы жағдай орын алды. Бұл жерге облыс және қала басшылығы кеше түнде келді. Қаза тапқандардың туыстарына қайғырып көңіл айтамыз».

Жыл басынан бері облыста барлығы 400-ден астам өрт оқиғасы тіркелді. Салдарынан 23 адам қаза тапқан. Ал улы газдан иіс тиіп 27 адам зардап шекті. Оның 9-ы қайтыс болған.

https://www.youtube.com/embed/iGVplwq-cHE?si=BUTfGPOhGe0-44GY" 

Елде ұн бағасы көтерілді. Наубайханалар мен халық көп тұтынатын 1 сұрыптағы  ұн бұған дейін 8 мың теңге болса, бүгінде 14 мың теңгеге дейін жеткен. Бағаның күрт өсуіне не себеп? Келесі тақырыпқа назар аударсақ.

Бір апта бұрын 8 мың теңгеден сатылған бір қап ұнның бағасы шарықтап кетті. Саудагерлердің сөзінше, баға күн санап өсуде. Салдарынан нан өнімдерінің құны да көтеріле бастаған. Қымбатшылық қыспаққа алды деген қараша ұнды келілеп ала бастаған. Мәселен, мына 2 келілік ұнның өзі 850 теңге.  

Баға өсуі,талдықорғандық кәсіпкерлерді де тығырыққа тірей бастаған.Мәселен 

Жайнагүл Сейітқалиеваның кірісінен шығысы көбейген.Самса, бәліш, тұшпара түйіп, нәпақасын табатын келіншек, ұнның шарықтағанына қапалы. Тіпті, саудамызды ақтамайды деп отыр.

ЖАЙНАГҮЛ СЕЙІТҚАЛИЕВА  – ҚАЛА ТҰРҒЫНЫ: «Алдыңғы аптада ғана ұнның бағасы 7500 болған,осы жолы барсам 25кг 14 мың болып тұр. Мен мысалы, полуфабрикат жасап, магазиндерге өткіземін, оны біз енді бағасын қымбаттатайық десек, қымбаттата алмаймыз. Ал, үйтпесек, ұнның бағасы шарықтап тұр. Бәліш,тұшпара жасасаң өте қымбат бағаға елдер де ала аламайды, оны бізде үйтіп өткізе алмаймыз».

Сондай-ақ, өңірде ас атасының да бағасы өскен. Қаладағы кейбір дүкендерде нанға 5-10 теңге қосылған. Наубайшылар бағаның өсуін ұнның қымбаттауымен байланыстырады.Текелілік Сәкен Сандыбаев 8 түрлі нан, 2 түрлі тоқаш пісіреді. Әзірге ескі бағамен дүкендерге өнім өткізіп жатыр. Десе де, ұн бағасы осы қалыпта қала берсе, нанның да бағасы өседі  деп отыр.

СӘКЕН САНДЫБАЕВ — НАУБАЙХАНАШЫ

 Ал, салаға жауаптылар бағаның өсуін әлемдегі геосаяси жағдаймен байланыстырады. Салдары елдегі нарыққа бірден әсерін тигізіп отыр.

МИРАС АХМЕТСАПА -ТАЛДЫҚОРҒАН ҚАЛАЛЫҚ КӘСІПКЕРЛІК БӨЛІМІНІҢ БАСШЫСЫ

https://www.youtube.com/embed/tpY3Ih5Texo?si=uaajsyeap3Rg5fsM" 

Бұдан былай елімізде энергетикалық сусындар сатылмауы мүмкін. Олардан адам денсаулығына келетін зиян көп деген денсаулық сақтау министрлігі 21 жасқа дейінгі ел тұрғындарына шектеу енгізу туралы заң қабылдамақ. Бұл туралы бүгін Үкімет отырысында ведомство басшысы Ажар Ғиният айтты. Одан бөлек, министрлер кабинеті «қоқыс жинау мәдениетіне» қатысты мәселені көтерді. Енді рұқсат етілмеген жерге қоқыс тастағандар қомақты айыппұл арқалайды. 

Емханадағы кезек, сапасыз медициналық қызмет. Халықтың шағымы осы деді Үкімет басшысы Әлихан Смайылов. Әсіресе, Астана, Алматы, Ақмола, Атырау өңірлерінің дәрігерлеріне арыз шағым көп түсетін көрінеді. Бұл проблемаларды шешу үшін Денсаулық сақтау министрлігі алдағы уақытта бақылауды күшейтпек.

АЖАР ҒИНИЯТ ҚР ДЕНСАУЛЫҚ САҚТАУ МИНИСТРІ: «Медициналық объектілердің инфрақұрылымы әлі де жеткіліксіз. Бүгінде 200-ден астам ауылдық елді мекенде медициналық объектілер жоқ. Ғимараттардың тозуы 56, медициналық техникамен жарақтандыру 50 пайызды құрайды».

Ел жастарының денсаулығы үкіметтегілерді алаңдатып отыр. Себебі, 11-14 жастағы балалар жаппай вейп шегетін болған, оған қоса екінің бірі энергетикалық сусынды тұтынады. Сондықтан, жауапты министрлік 21 жасқа дейін энергетикалық сусын мен вейптерге толық тиым салатын заң жобасын әзірлемек.

АЖАР ҒИНИЯТ ҚР ДЕНСАУЛЫҚ САҚТАУ МИНИСТРІ: «Халықтың салауатты өмір салты дағдысын қалыптастыру мәселесі бар. Елімізде ересектердің 21% темекі тартады, балалардың 20% артық салмақтан, ал 6% семіздіктен зардап шегеді. 11-15 жастағы балалардың тұрақты түрде вейп шегетіндер – 10%, энергетикалық және тәтті сусындарды ішетіндер – 17,5%, артық салмақтың болуы – 15%. Зерттеулер бойынша».

Айтпақшы, енді онкология мен туберкулезді ерте анықтаған дәрігерлер жалақысына қосымша үстемақы төленеді. 5 айлық есептік көрсеткіш. 18 мың теңгеге жуық ақша қоса беріледі. Республика бойынша дәрігерлерді ынталандыратын осындай пилоттық жоба басталды.

ӘЛИХАН СМАЙЫЛОВ ҚР ПРЕМЬЕР-МИНИСТРІ: «Тиісті кадрлармен, бірінші кезекте аса қажет мамандармен қамтамасыз ету үшін медициналық университеттер және колледж түлектерімен бірге тәжірибелі мамандарды да өңірлерге, әсіресе ауылдық жерлерге тарту мәселесін пысықтау қажет. Көріп отырғанымыздай, жұмыстар әлі де жеткіліксіз. Ынталандырудың жаңа әдістерін әзірлеу керек».

Одан бөлек, бүгін үкіметте экологияны қорғауға қоқысты жинау және оны өңдеу мәселесі талқыланды. Бұдан былай балабақшадан бастап барлық университеттерде жастарды қоқыс мәдениетіне үйрететін болады. Рұқсат етілмеген жерге қоқыс тастағандарға жаза қатаңдатылады. Егер екінші рет қайталаса айыппұл мөлшері екі есеге қымбат болады.

ӘЛИХАН СМАЙЫЛОВ ҚР ПРЕМЬЕР-МИНИСТРІ: «Осы күнге дейін заманауи қоқыс өңдеу зауыттары іске қосылған жоқ. Өкінішке қарай, бізде қалдықтармен жұмыс істеу мәдениеті қалыптаспады. Көп жағдайда қоқысты көшеге тастай салу қалыпты әдетке айналған. Қоқыс үйінділеріне қатысты ауылдардағы жағдай бұдан да күрделі».

Жиын соңында Әлихан Смайылов қоқысты қайта өңдеу үшін дамыған мемлекеттердегідей түтін мен иіс шығармайтын жаңа технологияларды пайдалану керектігін баса айтты. Қоқыс мәдениетін қалыптастыру жұмыстарын экология министрлігіне және Роман Склярға тапсырды. Оның сұрауы жыл соңында болатынын ескертті.