ЖАҢАЛЫҚТАР

Елімізде күн сайын балаға қарсы 6 қылмыс жасалады. Үш бала жыныстық зорлық-зомбылыққа ұшырайды. Бұл туралы Бала құқықтарын қорғау жөніндегі уәкіл Динара Зәкиева айтты, деп хабарлайды Алатау телеарнасы El.kz ақпарат агенттігіне сілтеме жасап. 

Елордада сарапшылар мен уәкілетті орган қызметкерлері Бала құқықтары жөніндегі заң жобасын талқылады. Динара Зәкиеваның айтуынша, күн сайын 342 адам тұрмыстық зорлық-зомбылыққа ұшырайды. Жалпы тергеу кезінде бір адамның бір немесе бірнеше деректі көргені, естігені анықталып жатады.

Біз халықаралық тәжірибені зерттедік. Барлық елде халықтың барлығы білетін бірыңғай мемлекеттік сенім телефоны бар. Президенттің тапсырмасына сәйкес, 16 қазан күні 111 бірыңғай мемлекеттік сенім телефоны жұмысын бастады. Қазіргі таңда бұл байланыс орталығы барлық мемлекеттік органдармен, әкімдіктермен, полиция департаменттерімен жұмыс істеп жатыр. Күн сайын 500-ден астам өтініш келеді, - деді Бала құқықтары жөніндегі уәкіл.

Динара Зәкиева жаңа заң жобасында бірыңғай сенім телефонына қатысты өзгерістер болатынын атап өтті.

Заң жобасы негізінде өңірлерде бала құқықтары жөніндегі уәкілдердің мәртебесі бекітіледі. Себебі, сарапшылардың айтуынша, тұрмыстық зорлық-зомбылықтың басым бөлігі ауылдық елді мекендерде болады.

Бала құқықтарын қорғау жөніндегі заң жобасы қазіргі таңда Парламентке жолданған. Заң жобасы мемлекеттік органдармен, сарапшылармен және үкіметтік емес ұйымдармен қосымша талқыланып жатыр.

Ресей Президенті Қазақстанға ресми сапармен келді. "Ақорда" резиденциясында Владимир Путинді салтанатты түрде қарсы алу рәсімі өтті, деп хабарлайды Алатау телеарнасы. 

Бұл туралы Ақорда жазды. Қасым-Жомарт Тоқаев пен Владимир Путин бір-біріне ресми делегация мүшелерін таныстырды. Құрмет қарауылының бастығы мемлекеттер басшыларына рапорт беріп, екі елдің әнұрандары шырқалды.

Мұнан кейін Мемлекет басшысы Қасым-Жомарт Тоқаев пен Ресей Президенті Владимир Путин Қазақстан мен Ресейдің XIX Өңіраралық ынтымақтастық форумының пленарлық отырысына бейнебайланыс режимінде қатысты. Ел Президенті Өңіраралық ынтымақтастық форумы 20 жыл ішінде екі елдің өзара тиімді стратегиялық серіктестігін нығайтуға зор үлес қосып, өзінің маңыздылығы мен тиімділігін көрсеткенін атап өтті. Оның айтуынша, Қазақстан мен Ресейдің сауда-экономика, инвестиция салаларындағы және өнеркәсіптік кооперациядағы ықпалдастығы жылдан-жылға тұрақты түрде артып келеді.

“Бүгінде екіжақты тауар айналымы 27 миллиард долларға жетті. Бұл – рекордтық көрсеткіш. Ресейден тікелей тартылған инвестиция көлемі 20 миллиард доллардан асты. Қазақстанда жұмыс істейтін шетелдік үлесі бар 42 мыңнан астам кәсіпорынның жартысына жуығы, яғни 19 мыңы ресейлік компаниялар. Біз экономиканың өнеркәсіп, ауыл шаруашылығы, көлік, инфрақұрылым сияқты салаларында тығыз қарым-қатынас жасаймыз. Энергетика бағытындағы ынтымақтастық деңгейі артып келеді. Жақында Ресей газын Қазақстан аумағы арқылы Өзбекстанға тасымалдау жобасының іске қосылуы айтулы оқиға болды. Бұл жоба Орталық Азияның өңірлік тұрақтылығы мен энергетикалық қауіпсіздігін нығайтуда шешуші рөл атқарады. "Татнефть" компаниясымен бірге қуаты жылына 340 мың тоннаға дейін бутадиен өндіретін Қазақстан-Ресей зауытының құрылысы басталды. Полиэтилен шығаратын кәсіпорын салуға қатысты келіссөздер аяқталды. 2019 жылдан бастап Өндірістік кооперация саласындағы бірлескен іс-қимыл бағдарламасы табысты жұмыс істеп жатыр", – деді Мемлекет басшысы.

Қасым-Жомарт Тоқаев ауыл шаруашылығы тақырыбына арналған Форумның Қостанай облысында, яғни Қазақстанның нағыз астықты өлкесінде өткізілуінің символдық мәніне назар аударып, агроөнеркәсіп кешені саласындағы сауда мен өзара тиімді кооперацияны кеңейту үшін зор мүмкіндік бар екеніне тоқталды. 

Қазақстан мен Ресей ауыл шаруашылығы өнімінің ірі өндірушісі саналады және астық экспорты бойынша әлемдік көшбасшылардың ондығына кіреді. Сондай-ақ әлемдегі егістік алқаптарының шамамен 10 пайызы, жайылымдық және шабындық жерлердің 9 пайызы осы екі мемлекетке тиесілі.

Сондай-ақ, Мемлекет басшысы таяу арада Қазақстанның машина жасау саласына көрсетілетін мемлекеттік қолдау шарасының бағыты кезең-кезеңмен өзгеретінін айтты. Алдағы уақытта техниканы ірі бөлшектерден ғана емес, бірте-бірте ұсақ бөлшектен құрастыратын аралас өндіріске басымдық берілетінін жеткізді.

Қазақстан Президенті сөзін қорытындылай келе, бұрын-соңды болмаған жаһандық сын-қатерлер жағдайында азық-түлік қауіпсіздігін қамтамасыз етуге бағытталған екі елдің күш-жігерін үйлестіру маңызды екенін атап өтті.

Мемлекет басшысы бірлескен нәтижелі жұмысқа атсалысқаны үшін Ресей Президенті Владимир Путинге, Форумның ресейлік және қазақстандық қатысушыларына алғыс айтты.

Мемлет бассысы Қасым-Жомарт Тоқаев ресейлік "Известия" газетіне сұхбат берді. Онда екі ел арасындағы байланысқа кеңінен тоқталхан, депбарлайды Алатау телеарнасы. 

Сұхбаттың қазақшы мәтінін Ақорда жариялады. Онда ел Президентінің Ресей мемлекетімен қарым-қатынасы, достық, әріптестік, ынтымақтастық негіздегі бағыттары барыша қамтылған. 

Сонымиен қатар, сұхбатта санкция жайы да қозғалған. Әрі Ресей мен Қазақстан арасындағы көлик дәлізі, атомная электростанциясын салу мәселеси, газдандыру, Шанхай Ынтымақтастық Ұйымы жұмыстары жөнінде де жақсы пікір айтылған. 

Айта Кетейик, Бұған Дейін Елімізге Ресей Президенти Владимир Путиннің жұмыс сапарымен келетінін жазған болатынбыз. 

Сұхбаттың толық нұсқасы мына сілтемеде .

Елімізде газ бағасы жанармай құнымен теңесуі мүмкін. Мұндай ойды Мәжілістің жалпы отырысынан кейін энергетика министрі айтты, деп хабарлайды Алатау телеарнасы. 

Министрдің сөзінше, бұған басты себеп көлік жүргізушілерінің жаппай автогазға ауысуы көрінеді. Салдарынан сұйытылған мұнай газын тұтыну көлемі күрт өсіп кеткен. 

“Бізде сұйытылған мұнай газын тұтыну көлемі күрт өсіп кетті. Ол негізі автомобильдерді газға ауыстырумен байланысты. Әсіресе көліктерді әуесқой тәсілмен газ жағатын етіп қайта жабдықтау жаппай белең алды. 9 айдың ішінде сұйытылған газдың өндірісінен туындайтын теңгерім 25 пайыз артты. Бізге қосымша көлемдер іздеуге тура келіп отыр. Біз «Теңізшевройлмен» келіссөз жүргіздік. Олар ішкі нарыққа ай сайын қосымша 10 мың тонна жеткізіп тұр. Біз «ҚазМұнайГаздың бүкіл көлемін ішкі нарыққа бағыттадық. Осының есебінен теңгерімді ұстап тұрмыз. Яғни, қазір сұйытылған газ тапшылығы жоқ. Өңірлерде жеткізуден туындаған мәселелер бар шығар. Біз осыны проблема деп отырмыз”, - деді министр.

Осы орайда Алмасадам Сәтқалиев жүргізушілерге көлігін газға ауыстыруға асықпау керек деген кеңесін қайталады.

“Машиналарды осындай қарқынмен газға ауыстыра беретін болса, келешекте газ өңдеу қуаттарының әлеуеті қысқа мерзімдегі қажеттіліктерге жетпей қалуы мүмкін. Тіпті сұйытылған мұнай газын импорттауға мәжбүр болуымыз мүмкін. Ол кезде баға мүлде басқаша болады. Тіпті бензин бағасымен салыстыратындай деңгейге шығуы ықтимал. Сондықтан автомобиль тізгіндеушілерді көліктерін газға ауыстыруға асықпауға үндеп жүрміз”, - деді Алмасадам Сәтқалиев.

Мемлекет басшысы Қасым-Жомарт Тоқаев Әл-Фараби атындағы ҚазҰУ ректоры Жансейіт Түймебаевты қабылдады, деп хабарлайды Алатау телеарнасы. 

Президентке университеттегі маман даярлау ісінің, ғылыми-зерттеу жұмыстарының нәтижелері туралы баяндалып, келесі жылы 90 жылдығын атап өтетін жоғары оқу орнының стратегиялық даму жоспары таныстырылды.

Жансейіт Түймебаевтың баяндауынша, қазір университетте жалпы құны 8,1 миллиард теңге болатын 400 ғылыми жоба іске асырылып жатыр, әрі Президенттің мамыр айындағы ҚХР-ға ресми сапары аясында ҚазҰУ-да Қытайдың Солтүстік-Батыс политехникалық университетінің филиалын ашу жөнінде келісімге қол қойылған болатын. 12 қазанда университет базасында аталған оқу орнының филиалы ашылған. 

Сонымен қатар, ректор 2024-2026 жылдары ҚазҰУ қалашығы құрылысының екінші кезеңі жүзеге асырылатыны жөнінде мәлімет берді. Сөзінше жаңа қалашықта 8 оқу корпусы, технопарк және 12 жатақхана бой көтермек және жуық арада 3180 орындық 3 жатақхананың құрылысы басталады.

Кездесу соңында Қасым-Жомарт Тоқаев білім сапасын жақсарту, еліміздің дамуына ғылымның қосатын үлесін арттыру және университет қалашығын жаңғырту жөнінде нақты тапсырмалар берді. 

Мемлекет басшысы Қасым-Жомарт Тоқаев Cыбайлас жемқорлыққа қарсы іс-қимыл агенттігінің төрағасы Асхат Жұмағалиды қабылдады, деп хабарлайды Алатау телеарнасы.  

Президентке Сыбайлас жемқорлыққа қарсы қызметтің биылғы 10 айда атқарған жұмысының нәтижелері жөнінде баяндалды. Асхат Жұмағалидың айтуынша, осы уақыт ішінде елімізде жемқорлыққа қатысты 1500-ге жуық қылмыс тіркеліп, 1100-ден астам адамның ісі әшкереленді. Оның 158-і – түрлі деңгейдегі басшылар. 

Сонымен қатар, сотқа мыңнан астам іс жолданып, 282 миллиард теңге шығын өтелген. Әрі 2022 жылдан бері бюджетке және квазимемлекеттік сектор субъектілеріне құны шамамен 857 миллиард теңге болатын мүлік активтері мен қаржы қайтарылған. Сыбайлас жемқорлық тәуекелдері картасын жүзеге асыру аясында тапсырылу мерзімі кешіктірілген, қаржы жымқыру қаупі бар әлеуметтік нысандар құрылысына мониторинг жүргізіліп жатыр. Агенттік еліміздің барлық өңірі бойынша жалпы бюджеті 2,44 триллион теңгені құрайтын осындай 156 нысан бар екенін анықтаған. 

Азаматтық қоғаммен өзара тығыз қарым-қатынас орнату арқылы «Сыбайлас жемқорлыққа қарсы волонтерлік» жобасы іске асырылуда. Қазіргі уақытта жемқорлықтың белең алуына бей-жай қарамайтын 2 мыңнан астам азамат бұл бастамаға атсалысып жатыр.

Кездесу соңында Қасым-Жомарт Тоқаев жемқорлыққа қарсы іс-қимылды және алдын алу шараларын күшейтуге бағытталған жүйелі жұмысты жалғастыру жөнінде бірқатар нақты тапсырма берді.