ЖАҢАЛЫҚТАР

Елдегі даталы күндер қатарына тағы екі кәсіби мереке қосылады. Құжат жобасы “АшықНҚА” порталында жарияланды, деп хабарлайды Алатау телеарнасы. 

Еңбек министрлігі «Кәсіби мерекелердің тізбесін бекіту туралы» бұйрыққа өзгерістер әзірлеген. Онда кәсіби мерекелер қатарына тағы 2 даталы күн қосылатыны жазылып отыр. Яғни Азаматтық авиация күні мен Бұрғылаушы күні аталып өтіледі. 

Кәсіби мерекелер тізбесі "Қазақстан Республикасының Азаматтық авиация қызметкерлері күні – 1 ақпан"; "Бұрғылаушы күні – қарашаның үшінші сенбісі" тармақтарымен толықтырылсын", - делінген бұйрық жобасында.

Жобаның негіздемесінде 1991 жылы 1 ақпанда Алматы әуежайында Қазақ КСР Алматы авиациялық отряды командирінің бұйрығымен республикада тұңғыш рет Авиациялық қауіпсіздік қызметі (ӘҚҚ) құрылғаны көрсетілген. Қазір әуежайлар мен авиакомпаниялардың құрылымында 3000-нан астам мамандардың біріккен құрылымы - Авиациялық қауіпсіздік қызметі (ӘҚҚ) бар. Бұл ең үлкен қызмет болып саналады.

Сонымен қатар авиациялық қауіпсіздік қызметкерлері өз мерекелерінің болмауына байланысты кәсіби қауымдастықтың біртұтас авиация саласына жататынын сезінуге мүмкіндігі жоқ. Сондықтан мереке күндерінің тізбесіне жаңа мереке күні, Авиациялық қауіпсіздік қызметі қызметкерлерінің күні – 1 ақпан, Ауғанстан Демократиялық Республикасынан кеңес әскерлерінің шектеулі контингентін шығару 15 ақпан күнінен ертерек аталып өтетін боп енгізілген.

Екінші ұсынылып отырған мерекеге қатысты әзірлеушілер бұрғылаушы мамандығы тау-кен өнеркәсібінде кәсіби деңгейді көтеруге ықпал ететін жалпы мамандықтардың бірі екенін түсіндірді. Бұрғылаушылар - жердің қазбалы қабаттарына қол жеткізудің негізгі тірегі. Сондықтан бұрғылаушы күнін қарашаның үшінші сенбісінде атап өтетін кәсіби мерекелер қатарына қосу керек.

Жоба 2023 жылдың 2 қарашасына дейін қоғамдық талқылауда болады. 

Мемлекет басшысы Қасым-Жомарт Тоқаев Азаматтық қорғаныс саласының қызметкерлерін Құтқарушы күнімен құттықтады, деп хабарлайды Алатау телеарнасы. 

Азаматтық қорғаныс саласының қызметкерлерін Құтқарушы күнімен құттықтаймын! Сіздердің жұмыстарыңыз қауіп-қатерге толы әрі зор жауапкершілікті талап етеді. Мемлекет пен қоғам сіздердің антқа адалдықтарыңызды, қажырлы еңбектеріңізді жоғары бағалайды. Баршаңызға бақ-береке тілеймін! – деп жазды Қасым-Жомарт Тоқаев.

Айта кетейік, бұған дейін Алматыда Іле-Алатау табиғи паркіндегі тау баурайында болған өртті сөндіру кезінде қызметтік борышын өтеп, қайғылы жағдайда қаза тапқан Арслан Құрманбековке арналған мемориалдық ескерткіш тақтаның ашылу салтанаты өткенін жазған едік.

Елімізде шұғыл желілер қатарына 111 нөмірі қосылды. Бұған қоңырау шалу арқылы отбасындағы зорлық-зомбылық пен жасөспірімдерге буллинг мәселесін жеткізе аласыз, деп хабарлайды Алатау телеарнасы. 

ҚазАқпараттың жазуынша, Цифрлық даму министрі Бағдат Мусин, ҚР Бала құқықтары жөніндегі уәкілі Динара Зәкиева және «Amanat» партиясының атқарушы хатшысы Дәулет Кәрібек үшжақты меморандумге қол қойды. Келісімге сәйкес, "111" нөмірі "101", "102" және "103" шұғыл нөмірлерімен қатар бірыңғай мемлекеттік байланыс орталығына айналып, әрбір азамат үшін тәулік бойы және тегін көмек береді.

Бұл нөмір отбасындағы зорлық-зомбылық пен балалар мен жасөспірімдер арасындағы буллинг мәселелеріне арналған. 

Жалпы, "111" – "Amanat" шұғыл қызметі партия бастамасымен осыдан үш жыл бұрын жүзеге асып, өзінің өміршеңдігін дәлелдеген жоба. Оның мақсаты тұрмыстық өткір мәселелердің алдын алу болатын. Осы уақыт аралығында жылдам желі 40 мыңнан астам отбасылық-тұрмыстық зорлық-зомбылықтан зардап шеккен әйелдер мен балаларға кешенді көмек көрсетті.

Мемлекет басшысы Қасым-Жомарт Тоқаев Қытайға сапары аясында 40 жыл бұрын дәріс алған ұстазымен кездесті, деп хабарлайды Алатау телеарнасы.

Президент Бейжің лингвистикалық институтында тағылымдамадан өткен кезінде өзіне дәріс берген профессор Лю Шициньмен әңгімелесті. 

“40 жылдан кейін білім алған университетіме келіп, өзіңізді аман-сау көргеніме өте қуаныштымын. Мен сіздің еңбекқорлығыңызды, табандылығыңыз бен ерік-жігеріңізді ерекше бағалаймын. Сіздің шәкірттерге берген біліміңізге баға жетпейді. Мұның бәрі сіздің кәсібилігіңізді, ыждағаттылығыңызды және өз ісіңізге деген адалдығыңызды көрсетеді. Құрметті демалыста екеніңізді білемін. Соған қарамастан, университеттің қоғамдық өміріне атсалысуды жалғастырып, мәдениетаралық байланыстардың дамуына зор үлес қосып жүрсіз”, – деді Мемлекет басшысы.

Қасым-Жомарт Тоқаев Лю Шициньге алғыс айтып, оған зор денсаулық пен ұзақ өмір тіледі. Мұнан соң Мемлекет басшысына университетте оқыған кезіндегі өзінің архив құжаттарын көрсетті.

Іс-шара соңында Президент Бейжің Тіл және мәдениет университетіне Әбу Насыр Әл-Фарабидің портретін сыйлап, осы оқу орнында білім алып жатқан қазақстандық студенттермен әңгімелесті.

Казгидромет биыл қыс жылы болатынын болжап отыр. Синоптиктер дерегіне сүйенсек, қарашада жылы және аязды күндер алма-кезек ауысып отырады, ай бойы жауын-шашын (жаңбыр, қар) жауып, екпінді жел соғады, деп хабарлайды Алатау телеарнасы. 

"Алдағы қыста Қазақстан аумағында температуралық фон климаттық нормадан 1-2 градусқа жоғары болады деп күтіліп отыр, тек желтоқсан айында Қазақстанның басым бөлігінде ауа температурасы климаттық норма шегінде болады деп болжанды, ал Қазақстан Республикасының солтүстігі мен шығысында нормадан 1 градусқа төмен болады", - делінген ақпаратта. 

Синоптиктер биыл қыс 2001-2002 жылғыдай болады деп болжап отыр, яғни күн жылы әрі жауын-шашын нормаға жақын не одан жоғары болады.

Ал наурызда Қазақстанда ауаның орташа айлық температурасы нормадан 2 градусқа жоғары болады, жауын-шашын мөлшері де еліміздің басым бөлігінде нормадан жоғары болады деп болжанған.

Президент Қасым-Жомарт Тоқаев ҚХР Төрағасы Си Цзиньпинмен келіссөз жүргізді. Қытай елінің басшысы Қазақстан Президентін Бейжіңдегі Халық жиналысы үйінде қарсы алды, деп хабарлайды Алатау телеарнасы Ақордаға сілтеме жасап. 

Мәртебелі мейманның келуіне орай Құрмет қарауылы сап түзеп тұрды. Содан кейін мемлекеттер басшылары өз делегацияларымен бірге Үлкен шығыс залында келіссөз жүргізді. Қасым-Жомарт Тоқаев Си Цзиньпиннің “Бір белдеу, бір жол” халықаралық ынтымақтастығының III форумына қатысуға шақыруын зор ықыласпен қабыл алып, Қытайға тағы да сапармен келгенін атап өтті.

“Қазақстан Сіздің осы жаһандық бастамаңызға алғашқы күннен бастап қолдау білдірді және оны ілгерілетуге белсенді атсалысып келеді. Осыдан тура 10 жыл бұрын Астанада сөйлеген сөзіңізде Сіздің осы бастама туралы айтқаныңыз есімізде. Орайлы сәтті пайдалана отырып, Сізді осы мегажобаны жүзеге асыру барысында керемет нәтижеге қол жеткізуіңізбен құттықтаймын және айтулы шараның табысты өтуіне тілектестік білдіремін. Сондай-ақ Сізді Қытай Халық Республикасының құрылғанына 74 жыл толуымен және Ханчжоуда өткен XIX жазғы Азия ойындарындағы Қытай командасының зор жетістігімен құттықтаймын. Біз Қытайдың қарқынды дамуын ерекше ықыласпен бақылап отырмыз. Сіздің дана басшылығыңызбен Қытай әлемдік жетекші державаға айналуды көздеген асқақ мұратына жетуге батыл қадам жасап келеді”, – деді Президент.

Сонымен қатар Президент Қасым-Жомарт Тоқаев өзі білім алған Бейжің Тіл және мәдениет университетінің аумағында орта ғасырлық философ, ғалым Әбу Насыр Әл-Фарабиге арналған бюстті салтанатты түрде ашу рәсіміне қатысты. Ашылу рәсіміне ҚХР білім министрінің орынбасары Ван Гуанянь, университеттің Партия комитетінің хатшысы Ни Хайдун, ректоры Дуан Пэн және Мемлекет басшысына сабақ берген университет профессоры Лю Шицинь, сондай-ақ ҚХР Мемлекеттік өнер мұражайының директоры, мүсін авторы У Вэйшань болды.