ЖАҢАЛЫҚТАР

2024 - тарихтағы ең ыстық жыл болмақ. Ғалымдар тіпті аптап барлық рекордты бұзу мүмкін екенін алға тартуда, деп хабарлайды Алатау телеарнасы. 

Закон.кз-тің жазуынша, 2023 жыл тарихтағы ең ыстық жыл болған. Десе де биыл бұл рекорд бұзылуы мүмкін. 

"Температураның жоғарылауы Эль-Ниньо құбылысымен байланысты болады. Бұл экваторлық Тынық мұхитындағы судың беткі қабатының температурасының ауытқуымен байланысты жылыну", - дейді ғалымдар.

2023 жылы Эль-Ниньо зардаптарының бірі Орталық Америкадағы құрғақ ауа райы болды, бұл Панама каналын, Гатунды қоректендіретін негізгі көлдің құрғауына әкелген. Соның салдарынан арнадағы судың деңгейі төмендеп, өткізу қабілеті айтарлықтай төмендепті.

Дүниежүзілік метеорологиялық ұйым жетекшісі Петтери Таалас 2024 жыл бұрынғыдан да "жылырақ" болатынын, әрі құрғақшылық немесе су тасқыны сияқты төтенше оқиғалардың көбейетінін де болжап отыр. 

Дүние жүзіндегі температураның бұлайша көтерілуі ғалымдардың бірнеше жылдар бойы ескертіп келе жатқан қайтымсыз климаттық өзгерістерге қауіпті түрде жақындатады. Одан әрі жылыну - дауыл, құрғақшылық, су тасқыны және орман өрттері сияқты экстремалды ауа райы оқиғаларына әкелмек.

Соңғы күндері коронавирус індетінің қайта күш алуы әлемді алаңдатып отыр. Осы орайда денсаулық сақтау министрлігі елімізде бетперде тағу мәселесіне жауап берді, деп хабарлайды Алатау телеарнасы. 

Министр Ажар Ғинаяттың айтуынша, елде індетті жұқтыру жағдайға бақылауда. Көбіне бұл вирустың шырмауына қарттар түсіп жатқан көрінеді. Одан бөлек созылмалы ауруы бар науқастар, әсіресе тыныс алу және жүрек-қан тамырлары дертіне шалдыққандарға да оңайға соқпайтың көрінеді.

"Біз маска тағуды ұсынамыз. ЖРВИ маусымы қалай басталады, яғни қазан-мамыр айлары аралығында бас санитарлық дәрігердің қаулысымен маска кию ұсынылады. Сонымен қатар медициналық ұйымдарда да маска режимі енгізіледі. Маскаға қатысты тағы бір нақтылағым келеді, біз тек ұсынамыз", - дейді министр. 

Сондай-ақ, ол осы орайда жоғарыдағы азаматтарға ревакцинациядан өтуді ұсынды. Әрі өткен жылы 350 мың азамат COVID-19 инфекциясына қарсы екпе алғанын да айта кетті. 

Еске салайық, бұған дейін Дүниежүзілік денсаулық сақтау ұйымы COVID-19 вирусының қайта күш алғанын мәлімдеп, халықты бетперде киюге шақырғанын жазған едік.

Дүниежүзілік денсаулық сақтау ұйымы COVID-19 вирусының қайта күш алғанын мәлімдеп, халықты бетперде киюге шақырды, деп хабарлайды Алатау телеарнасы. 

COVID-19 күшейді деп дабыл қаққан ұйым басшысы Тедрос Гебрейесус көптеген елде бірнеше апта ішінде сырқаттар санының артуына байланысты барлығын бетперде киюге және COVID-19-ға қарсы вакцина алуға шақырды.

"COVID-19, тұмау және басқа қоздырғыштар тудыратын респираторлық аурулар саны бірнеше апта ішінде көптеген елде өсті және бұл мерекелерден кейін де артуы мүмкін деген болжам бар", - деп жазды Тедрос әлеуметтік парақшасында.

Осыған байланысты ол барлығын COVID-19-ке тест тапсыруға және қажет болған жағдайда медициналық көмекке жүгінуге шақырған. Әрі барынша жұқпалы аурудан сақтану үшін маска киіп, қашықтықты сақтауға үндеп отыр. 

Соңғы күндері такси жүргізушілерінің қолма-қол ақша талап етуі мәселесі жиі айтыла бастады. Осы орайда Алматы қаласының Мемлекеттік кірістер комитеті өзекті жайтқа жауап берді, деп хабарлайды Алатау телеарнасы. 

Өңірлік коммуникациялар қызметінде өткен брифингте Алматының Мемлекеттік кірістер департаментінің өкілдері өзекті мәселелерге жауап берді. Ол қатарда такси қызметкерлерінің төлемді аударыммен қабылдаудан бас тартып, қолма-қол ақша талап еткен мәселесі де бар. Департаменттің түсіндіру жұмыстары және байланыс орталығы басқармасының басшысы Айжан Бекеева мұндай әрекеттер заңсыз екенін алға тартты. 

«Егер адам такси қызметін көрсетсе, онда ол тиісінше жеке кәсіпкер ретінде тіркелуі тиіс. Сіз такси агрегаторлары арқылы, арнайы қосымшаларда тіркеле аласыз. Оның өз пайыздары бар. Сіз e-Salyq Business немесе Яндекс таксиде жеке кәсіпкер ретінде тіркеліп, басқа әлеуметтік төлемдермен бірге ай сайын 1 пайыз төлей аласыз. Қазір салық міндеттемелерін орындау жеңілдетілді. Есеп беруді тапсыру да жеңілдетілген. QR-кодтарды орналастыру да қиындық туғызбайды. Қолма-қол ақшасыз төлемдерді қабылдаудан бас тарту заңсыз болып табылады. Біз бұған дейін айтқанымыздай, салық режимдерін қолданудың арнайы түрлері бар. Такси жүргізушілері үшін салық жүктемесінің пайызы небәрі 1 пайыз болатын режим өте ыңғайлы. Яғни, адам бір ай бойы такси болып жүріп, 100 мың теңге тапса, оның 1 пайыз салығы – 1000 теңге. Оған қоса оның әлеуметтік төлемдері. Сонымен, бұл қосымша не үшін ыңғайлы? Кассалық машина қазірдің өзінде орнатылған. Ай сайынғы қызметті сатып алу, төлеу қажеттілігі жоғалады. Яғни, ол такси қызметін көрсете алады, чекті электронды форматта жазып, оны клиентке жібере алады», – деп атап өтті ол. 

Сонымен қатар, мамандар қолма-қол ақшасыз төлемдерді қабылдаудан бас тарту фактілері болған жағдайда Мемлекеттік кіріс органдарына хабарлау қажет екенін еске салды. 

Елімізде 1 қаңтардан бастап “Ұлттық қор - балаларға” жобасы ресми түрде іске қосылды. Енді осы айдың 15-не дейін тізім жасалынбақ, деп хабарлайды Алатау телеарнасы. 

Жоба аясында ел азаматы саналатын әр балаға жыл сайын Ұлттық қордың инвестициялық табысының 50 пайызы есептеліп бөлінеді. Әрі ол сома әр бала есепшотына теңдей аударылып отырады. Тек 18 жасқа толған кезде ғана жинақ қаражатын өз мақсатына пайдалануға болады. 

Закон.кз-тің жазуынша, бағдарламаны жүзеге асыру мынадай кезеңдерден тұрады. Яғни 2023 жылдың қазан айында БЖЗҚ Қазақстан Республикасы Ұлттық қорының инвестициялық кірісі туралы ақпарат алған. 

2024 жылғы 15 қаңтар

БЖЗҚ 2023 жылғы 31 желтоқсандағы жағдай бойынша "Жеке тұлғалар" мемлекеттік деректер базасынан алынған ақпарат негізінде нысаналы талаптарға қатысушылардың электрондық тізімін қалыптастырады.

2024 жылдың 1 ақпанынан кешіктірмей

БЖЗҚ 2023 жылғы есепті жылға бір балаға шаққандағы мақсатты талаптардың сомасын есептеп, ақпараттық жүйеге енгізеді.

2024 жылдың 1 ақпанынан бастап

БЖЗҚ 2024 жылы 18 жасқа толған және толатын мақсатты жинақтарды алушылар үшін нысаналы жинақ шоттарын ашады.

Ақшаны тұрғын үй жағдайын жақсартуға (Қазақстан Республикасында жылжымайтын мүлікті сатып алуға болады) немесе білім алуға (Қазақстан Республикасында да, одан тыс жерлерде де) пайдалануға болатынын айта кеткен жөн.

Десе де балалар есепшотына бірдей қаржы жиналмайды. Жас ерекшелігі мен бағдарлама іске қосылған мерзімге байланысты әртүрлі болмақ. Яғни, болжам бойынша, 2024 жылы 18 жасқа толған балалар бағдарлама аясында шамамен $160 ала алады. Сол секілді өзге балаларға да жас ерекшелігіне қарай 18-ге толғанда белгілі мөлшерде қаражат түседі. Ал 2023 жылы туылғандар есепшотына кәмелеттік жасқа толғанда шамамен 3,5-4 мың доллар жиналады.

Елімізде алтын мен күмістің қанша тонна қоры бары белгілі болды. Мұндай мәліметті Өнеркәсіп және құрылыс министрлігі айтты, деп хабарлайды Алатау телеарнасы ҚазАқпаратқа сілтеме жасап. 

Ведомство агенттің сауалына елімізде барланған алтын мен күміс қорына қатысты мынадай ақпар ұсынған.

"Пайдалы қазбалардың мемлекеттік есебінің 2023 жылдың 1 қаңтарындағы мәліметіне сәйкес алтын қоры — 1,4 мың тонна, күміс қоры — 29,1 мың тонна", — делінген жауапта. 

Министрлік мәліметінше, өткен жылы 9 айда уәкілетті ұйым бағалы металдар мен асыл тастан жасалған зергерлік бұйымдарды өндіретін 199 заңды және жеке тұлғаны тіркеген.

"Оның ішінде елімізде өндірілген алтын мен күмістен зергерлік бұйым жасайтын негізгі кәсіпорындар мыналар: "Қазақювелир" АҚ, "ЮП Жемчужина" ЖШС, "Алматинский ювелирный завод" АҚ, "Aisafi" АҚ, "Diamond Exclusive" АҚ, "Адамант Сервис" АҚ, "Зергер Плюс" ЖШС, "Kazyna Gold Jewelry" ЖШС, "KY Factory" ЖШС, "Senat Gold" ЖШС, "SILVER PRICE" ЖСШ, "ЮФ Тенгри Голд" ЖШС, "ADAMI" ЖК, "Т.Р.З.К." ЖК және "Кристалл-L" ЖК", — деп атап өтеді миинстрлікте.