ЖАҢАЛЫҚТАР

Алматыда араға айдан аса уақыт салып тағы бір жойқын жер сілкінісі болды. Бұл жолғы апаттың қуаты әлдеқайда күшті, деп хабарлайды Алатау телеарнасы. 

Төтенше жағдайлар департаменті дерегіне сүйенсек, күндізгі сағат 11:22-де Қазақстан мен Қырғызстан шекарасында жер сілкінісі тіркелген. Қуаты - 5 балл. Ал ошағы небәрі Алматыдан 31 шақырым қашықтықта. Шошынып қалған жұрт бұл жағдайдан кейін ұзақ үйлеріне оралмады. Тіпті сейсмологтар да кешкі сағат 16:00-ге дейін қауіпсіздік сақтауды ескертті. 

Жер сілкінісінен 1 адам зардап шекті. Бірнеше ғимарат қабырғасының бет қабаты құлап қалды. 

Сонымен қатар қала тұрғындары үшін 384 қабылдау пункті, оның ішінде 229-ы - мектептерде, 115-і балабақшаларда, 15-і ЖОО-ларда, 20-сы колледждерде және 5-і стадионда жұмыс істеді. 

Ал оқушылар мен студенттер оқудан босатылды. 

Десе де үрейге берілген тұрғындар қауіпсіз жерге ағыламыз деп көшеде көліктерімен қалып кетті. Бүгінгі кептеліс 10  баллдық мөлшерде болды. 

Түс ауа Мемлекет басшысы Төтенше жағдайлар министрі Шыңғыс Әріновті қабылдады. Ведомства басшысы Алматыдағы жер сілкінісіне байланыстыатқарылып жатқан жұмыстар туралы баяндаған. Ақпаратты ҚР Президентінің кеңесшісі – Баспасөз хатшысы Берік Уәли Фейсбуктегі парақшасында жазды. 

Президент министрге мегаполис тұрғындарының амандығын сақтау және Алматыдағы жағдайды бақылауды қамтамасыз ету үшін қала әкімі Ерболат Досаевпен, сондай-ақ қаладағы барлық жауапты мекемелермен тығыз қарым-қатынаста жұмыс істеуді жалғастыруды тапсырды.

Осылайша кеш қарая мамандар қала тұрындарына үйге орала беруге рұқсат екенін хабарлады. Әрі бүгінгі жер сілкінісіне байланысты талқыланған комиссия отырысының қорытынды шешімін жариялады. 

"Кезектен тыс комиссия отырыстың қорытындысы бойынша Сейсмологиялық байқаулар мен зерттеулердің ұлттық ғылыми орталығының сейсмикалық жағдайды бағалау жөніндегі комиссиясы алдағы күндері Алматы болжамды полигоны аумағында 70 пайыз ықтималдықпен жойқын жер сілкінісі күтілмейтінін, алайда елеулі қауіп төндірмейтін қайталама дүмпулер болуы мүмкін екенін айтты", - делінген хабарламада.

Еске салайық, бұған дейін қаңтардың 23-і күні түн мезгілінде Алматыда 5 балдық жер сілкінісі болған еді. 

Мемлекет басшысы Қасым-Жомарт Тоқаев Ресей Президенті Владимир Путинмен телефон арқылы сөйлесті, деп хабарлайды Алатау телеарнасы. 

Бұл туралы Ақорда жазды. Әңгімелесу барысында мемлекеттер басшылары стратегиялық серіктестік пен одақтастық рухындағы екіжақты әрі көпжоспарлы ынтымақтастықтың қарқынды дамып келе жатқанына назар аударды.

Тараптар Ресей Президентінің былтыр қараша айында Астанаға жасаған ресми сапары және Қасым-Жомарт Тоқаевтың жуырда Қазан қаласына жұмыс сапары аясында қол жеткізілген уағдаластықтардың жүзеге асырылу барысын талқылады. Сонымен қатар энергетика, транзит және логистика салаларындағы бірлескен жобаларды тиімді түрде ілгерілету маңызды екені атап өтілді.

Мемлекеттер басшылары халықаралық күн тәртібіндегі өзекті мәселелер жөнінде пікір алмасты.

Туризм және спорт министрлігі елдегі ТОП-20 туристік орындардың тізімін жариялады, деп хабарлайды Алатау телеарнасы. 

Министрлік дерегіне сүйенсек, бұған дейін тізімге 10 аймақ кірген. Қазіргі кезде танымал туристік орындардың саны 20-ға дейін кеңейтіліп отыр.

Тізім мынадай:

Хан Ордасы (Батыс Қазақстан облысы);

Қарғалы су қоймасы (Ақтөбе облысы);

Туристік кешен (Қостанай облысы);

Щучье-Бурабайдағы "Ақбура" курорттық аймағы (Ақмола обысы);

Имантау-Шалқар курорттық аймақтары (Солтүстік Қазақстан облысы);

Баянауыл (Павлодар облысы);

Қатон-Қарағай курорттық аймағы (Шығыс Қазақстан облысы);

Алакөл курорттық аймағы (Абай мен Жетісу облыстары);

Түрген-Қаскелең тау кластері (Алматы қаласы, Алматы облысы);

"Көксай resort" (Жамбыл облысы);

Балқаш (Қарағанды облысы);

Түркістан (Түркістан облысы);

Байқоңыр ғарыш айлағы (Қызылорда облысы);

Ұлытау ауылы (Ұлытау облысы);

Жылы жағажай (Маңғыстау облысы);

Сарайшық қалашығы (Атырау облысы);

Шымкент – гастрономиялық туризм орталығы (Шымкент қаласы);

Туристік аудан (Астана қаласы).

Министрлік ішкі туризмнің өскенін ескере отырып, атқарушы органдармен бірлесіп аталған туристік бағыттарда инфрақұрылымды дамыту бойынша жол карталарын әзірледі.

Алматыда соңғы бір ай аралығында 7400-ден аса жер сілкінісі тіркелген, деп хабарлайды Алатау телеарнасы. 

Бұл туралы сейсмологиялық бақылаулар мен зерттеулер ұлттық ғылыми орталығының басшысы Дәулет Сәрсенбаев айтты. Сөзіне сүйенсек, бұл 23 қаңтар күні қала халқын түн ұйқысынан оятқан қатты жер дүмпуінен кейінгі тіркелген көрсеткіш көрінеді. 

“23 қаңтар күні Қытай мен Қырғызстан шекарасында болған күшті жер сілкінісінен бері 7406 жер сілкінісін тіркеді. Алматылықтар оның 16-ын сезді”, - дейді Дәулет Сәрсенбаев.

Сондай-ақ, ол жер асты дүмпуі әлі тіркеліп жатқанын да айта кетті.

Елімізде қаңтардан бастап көп балалы отбасыларға тағайындалатын мемлекеттік жәрдемақылардың мөлшері 7%-ға артқан, деп хабарлайды Алатау телеарнасы. 

Қаңтар айында 571,6 мың көпбалалы отбасы жалпы сомасы 38,1 млрд теңге мөлшерінде мемлекеттік жәрдемақы алыпты. Еңбек және халықты әлеуметтік қорғау министрлігі дерегіне сүйенсек, бұл мемлекеттік жәрдемақыға төрт және одан да көп бірге тұратын кәмелетке толмаған немесе 23 жасқа дейінгі күндізгі бөлімде оқитын студент балалары бар отбасылар табысына қарамастан үміткер бола алады.

Төлем мөлшері бала санына қарай есептеліп төленеді және 2024 жылы:

4 баласы бар отбасыларға – 16,03 АЕК немесе 59 183 теңге;

5 балаға – 20,04 АЕК немесе 73 988 теңге;

6 балаға – 24,05 АЕК немесе 88 793 теңге;

7 балаға – 28,06 АЕК немесе 103 598 теңге;

8 және одан да көп баласы бар отбасыларға – әр балаға 4 АЕК немесе 14 768 теңге мөлшерінде төленеді.

2024 жылғы 1 қаңтардан бастап балалы отбасыларға тағайындалатын мемлекеттік жәрдемақылардың мөлшері 7%-ға артты.

Биыл көпбалалы отбасыларға мемлекеттік жәрдемақы төлеуге 474,8 млрд теңге қарастырылып отыр.

Елімізде ет өндірісі өскен. 2023 жылғы қаңтар-желтоқсан айларының өзінде 80,2 мың тонна ет өндіріліпті. 2022 жылғы сәйкес кезеңмен салыстырғанда 10,1%-ке артқан, деп хабарлайды Алатау телеарнасы. 

Әсіресе ел тұрғындары сиыр етін көп тұтынған. 2023 жылғы қаңтар–қыркүйекте жан басына шаққанда орташа есеппен 18,33 кг болды — 2022 жылғы ұқсас кезеңмен салыстырғанда 3,2%-ке артық.

Energuprom.kz-тің дерегіне сүйенсек, биыл қаңтарда 7,1 мың тонна жаңа сойылған немесе салқындатылған ет өндіріліпті. 2023 жылғы қаңтарға қарағанда бірден 39,4%-ке өскен.

Ал жылқы еті: жан басына шаққанда орта есеппен 4,88 кг, бір жылдағы өсім — 11,7%.

Қой етін тұтыну бір жылда 4%-ке азайып, өткен жылдың қаңтар-қыркүйек айларында жан басына шаққанда орта есеппен 4,02 кг болды.

Шошқа етін тұтыну 2,5%-ке төмендеді: жан басына шаққанда орташа есеппен 2,46 кг.

2024 жылдың қаңтар айының қорытындысы бойынша қой еті 0,1%, жылқы еті 0,6%-ке дейін қымбаттады.

Бір жылда сиыр еті бірден 8,7%-ке қымбаттаған.